ସିବିଏସଇର ବଡ ପରିବର୍ତ୍ତନ: ଛାତ୍ରଛାତ୍ରୀମାନେ ସେମାନଙ୍କର ଦକ୍ଷତା ଅନୁଯାୟୀ ବାଛିପାରିବେ ପରୀକ୍ଷା ସ୍ତର
ନୂଆଦିଲ୍ଲୀ: ସେଣ୍ଟ୍ରାଲ୍ ବୋର୍ଡ ଅଫ୍ ସେକେଣ୍ଡାରୀ ଏଜୁକେସନ୍ (ସିବିଏସଇ) ଆସନ୍ତା ବର୍ଷରେ ଛାତ୍ରଛାତ୍ରୀଙ୍କ ଦକ୍ଷତା ଅନୁଯାୟୀ ପରୀକ୍ଷା ଦେବାକୁ ଏକ ନୂଆ ବିକଳ୍ପ ଦେବାକୁ ଚିନ୍ତା କରୁଛି । ଏହି ଯୋଜନା ଅଧୀନରେ ଛାତ୍ରଛାତ୍ରୀମାନେ ସେମାନଙ୍କର ଦକ୍ଷତା ଉପରେ ଆଧାର କରି ପରୀକ୍ଷାର କଠିନ ସ୍ତର ବାଛିବାରେ ସକ୍ଷମ ହେବେ । ଜାତୀୟ ଶିକ୍ଷା ନୀତି (ଏନଇପି) ୨୦୨୦ ଅଧୀନରେ ଏହି ପଦକ୍ଷେପ ନିଆଯାଉଛି ଯେଉଁଥିରେ ଛାତ୍ରଛାତ୍ରୀମାନଙ୍କୁ ସେମାନଙ୍କର ଜ୍ଞାନ ଏବଂ ଦକ୍ଷତା ଅନୁଯାୟୀ ଦୁଇ ସ୍ତରରେ ପରୀକ୍ଷା ଦେବାକୁ ଅନୁମତି ଦେବାକୁ ପ୍ରସ୍ତାବ ଦିଆଯାଇଛି ।
ଗଣିତରେ ଏହି ପାଟର୍ନ ଲାଗୁ ହୋଇସାରିଛି :-
ସମ୍ପ୍ରତି ଏହି ନୂଆ ପରୀକ୍ଷା ଢ଼ାଞ୍ଚା ଗଣିତ ବିଷୟ ଉପରେ କାର୍ଯ୍ୟକାରୀ ହୋଇସାରିଛି, ଯାହା ଦଶମ ଶ୍ରେଣୀ ବୋର୍ଡ ପରୀକ୍ଷାର ଏକ ଅଂଶ । ସିବିଏସଇ ସୂତ୍ର ଅନୁଯାୟୀ, ଛାତ୍ରଛାତ୍ରୀମାନଙ୍କୁ ସେମାନଙ୍କର ଦକ୍ଷତା ଅନୁଯାୟୀ ପରୀକ୍ଷା ଦେବାର ସୁଯୋଗ ପ୍ରଦାନ କରିବା ଉଦ୍ଦେଶ୍ୟରେ ଏହି ପଦକ୍ଷେପ ଆରମ୍ଭ କରାଯାଇଛି, ଯାହା ଦ୍ୱାରା ସେମାନଙ୍କର ପ୍ରକୃତ ଦକ୍ଷତା ସଠିକ୍ ଭାବରେ ମାପ କରାଯାଇପାରିବ ।
ବିଜ୍ଞାନ ଏବଂ ସାମାଜିକ ବିଜ୍ଞାନରେ ମଧ୍ୟ ପାଟର୍ନ ଲାଗୁ ହେବ :-
ବର୍ତ୍ତମାନ ସିବିଏସଇ ବିଜ୍ଞାନ ଏବଂ ସାମାଜିକ ବିଜ୍ଞାନ ପରି ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକରେ ଏହି ଢ଼ାଞ୍ଚାକୁ କାର୍ଯ୍ୟକାରୀ କରିବାକୁ ଯୋଜନା କରୁଛି । ଏହି ପରିବର୍ତ୍ତନର ଉଦ୍ଦେଶ୍ୟ ହେଉଛି ଛାତ୍ରଛାତ୍ରୀମାନଙ୍କୁ ସେମାନଙ୍କର ଦକ୍ଷତା ଅନୁଯାୟୀ ପରୀକ୍ଷା ଦେବାକୁ ଏକ ସୁଯୋଗ ଦେବା, ଯାହା ଦ୍ୱାରା ସେମାନେ ନିଜ ବିଷୟଗୁଡ଼ିକରେ ଭଲ ପ୍ରଦର୍ଶନ କରିପାରିବେ ।