ଅଧ୍ୟୟନରୁ ଖୁଲାସା, ୧୩ ବର୍ଷ ବୟସ ପୂର୍ବରୁ ପିଲାମାନଙ୍କୁ ସ୍ମାର୍ଟଫୋନ୍ ଦେବା ଅତ୍ୟନ୍ତ ବିପଦପୂର୍ଣ୍ଣ

ନୂଆଦିଲ୍ଲୀ: ୧୩ ବର୍ଷରୁ କମ୍ ବୟସର ପିଲାମାନେ ଯଦି ସ୍ମାର୍ଟଫୋନ ବ୍ୟବହାର କରନ୍ତି, ତେବେ କିଶୋର ଅବସ୍ଥାରେ ମାନସିକ ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହୋଇପାରନ୍ତି । ସୋମବାର ପ୍ରକାଶିତ ଏକ ବିଶ୍ୱସ୍ତରୀୟ ଅଧ୍ୟୟନରେ ଏହା ସାମ୍ନାକୁ ଆସିଛି, ଯେଉଁଥିରେ ଏକ ଲକ୍ଷରୁ ଅଧିକ ଯୁବକଙ୍କ ତଥ୍ୟ ଅନ୍ତର୍ଭୁକ୍ତ କରାଯାଇଛି ।

ଜର୍ଣ୍ଣାଲ ଅଫ୍ ହ୍ୟୁମାନ୍ ଡେଭଲପମେଣ୍ଟ ଆଣ୍ଡ୍ କ୍ୟାପାବିଲିଟିଜ୍ ରେ ପ୍ରକାଶିତ ଏହି ଅଧ୍ୟୟନ ଅନୁଯାୟୀ, ୧୨ ବର୍ଷ କିମ୍ବା ତା’ଠାରୁ କମ୍ ବୟସରେ ପ୍ରଥମ ସ୍ମାର୍ଟଫୋନ୍ ପାଇଥିବା ୧୮ ରୁ ୨୪ ବର୍ଷ ବୟସର ଯୁବକମାନଙ୍କ ମଧ୍ୟରେ ଆତ୍ମହତ୍ୟା ଚିନ୍ତାଧାରା, ଆକ୍ରମଣାତ୍ମକ, ଭାବପ୍ରବଣ ଅସ୍ଥିରତା ଏବଂ କମ ଆତ୍ମସମ୍ମାନର ଅଭିଯୋଗ ଅଧିକ ଦେଖାଯାଇଥିଲା।

କମ୍ ବୟସରେ ସୋସିଆଲ ମିଡିଆ ବ୍ୟବହାର କରିବା ଅସୁବିଧା- ଅଧ୍ୟୟନରୁ ଜଣାପଡିଛି ଯେ ସ୍ମାର୍ଟଫୋନ ଯୋଗୁଁ ପିଲାମାନେ କମ୍ ବୟସରେ ସୋସିଆଲ ମିଡିଆ ବ୍ୟବହାର କରିବା ଆରମ୍ଭ କରନ୍ତି । ଯାହା ସାଇବରବୁଲିଂ, ନିଦ୍ରା ବ୍ୟାଘାତ ଏବଂ ପରିବାର ସହିତ ସମ୍ପର୍କରେ ଦୂରତାର ବିପଦକୁ ବୃଦ୍ଧି କରେ ।

ଆମେରିକାର ସାପିଏନ୍ ଲ୍ୟାବ୍ସର ପ୍ରତିଷ୍ଠାତା ଏବଂ ବୈଜ୍ଞାନିକ ଡକ୍ଟର ତାରା ଥିୟାଗରାଜନ୍ କହିଛନ୍ତି, ଆମର ତଥ୍ୟ ଦର୍ଶାଉଛି ଯେ କମ୍ ବୟସରେ ସ୍ମାର୍ଟଫୋନ ଏବଂ ସୋସିଆଲ ମିଡିଆ ବ୍ୟବହାର ଯୁବପିଢ଼ିଙ୍କ ମାନସିକ ସ୍ୱାସ୍ଥ୍ୟ ଉପରେ ଗଭୀର ପ୍ରଭାବ ପକାଇଥାଏ।

ସେ ଭବିଷ୍ୟତ ପିଢ଼ିର ମାନସିକ ସ୍ୱାସ୍ଥ୍ୟକୁ ସୁରକ୍ଷା ଦେବା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି । ସେ କୁହନ୍ତି ଯେ ଏହି ପିଲାମାନେ ଡିପ୍ରେସନ୍ ଏବଂ ଚିନ୍ତାର ଲକ୍ଷଣ ଦେଖାନ୍ତି ନାହିଁ, ତେଣୁ ସାଧାରଣ ଯାଞ୍ଚରେ ଏହି ସମସ୍ୟାଗୁଡ଼ିକ ଚିହ୍ନଟ ହୁଏ ନାହିଁ ।

ଗବେଷକମାନଙ୍କ ସୁପାରିଶ- ଗବେଷକମାନେ ପରାମର୍ଶ ଦେଇଥିଲେ ଯେ ମଦ୍ୟପାନ ଏବଂ ତମାଖୁ ପରି, ୧୩ ବର୍ଷରୁ କମ୍ ବୟସର ପିଲାମାନଙ୍କ ପାଇଁ ମଧ୍ୟ ସ୍ମାର୍ଟଫୋନ୍ ବ୍ୟବହାରକୁ ସୀମିତ କରାଯିବା ଉଚିତ ।