ବ୍ୟାଙ୍କ ସହ ଜଡିତ ଏହି କାମକୁ ୩୧ ଡିସେମ୍ବର ସୁଦ୍ଧା ଶେଷ କରନ୍ତୁ, ନଚେତ ହୋଇପାରେ ଅନେକ ସମସ୍ୟା
ଆଉ ଅଳ୍ପ ଦିନ ପରେ ଆସିବାକୁ ଯାଉଛି ନୂଆବର୍ଷ । ତେବେ ଏହି ସମୟ ସୀମା ଭିତରେ ଯଦି ଆପଣଙ୍କର କିଛି ଆର୍ଥିକ କାରବାର ସମସ୍ୟା ରହିଛି ତେବେ ତୁରନ୍ତ ଏହାକୁ ସାରିଦିଅନ୍ତୁ । କାରଣ କିଛି ଗୁଡିଏ ଆର୍ଥିକ ସମସ୍ୟାର ସମାଧାନ ପାଇଁ ଏହି ମାସ ହେଉଛି ଶେଷ ମାସ । ଏହାବ୍ୟତୀତ ଅନେକ କାମର ଅବଧି ତାରିଖ ୩୧ ଡିସେମ୍ବରରେ ମଧ୍ୟ ଶେଷ ହେଉଛି। ଯେମିତିକି ମ୍ୟୁଚୁଆଲ୍ ଫଣ୍ଡ ଏବଂ ଡେମାଟରେ ନାମାଙ୍କନ ଯୋଡିବା, ଏସବିଆଇ ଅମୃତ କାଲାଶରେ ବିନିଯୋଗ କରିବା ଏବଂ ବ୍ୟାଙ୍କ ଲକର ଚୁକ୍ତିର ଶେଷ ତାରିଖ ଭଳି ଅନେକ ଗୁରୁତ୍ୱପୂର୍ଣ୍ଣ କାମ ଏଥିରେ ଅନ୍ତର୍ଭୁକ୍ତ ରହିଛି। ତେବେ ଆସନ୍ତୁ ଜାଣିବା ଏହିପରି ୫ ଟି ଗୁରୁତ୍ୱପୂର୍ଣ୍ଣ କାର୍ଯ୍ୟ ବିଷୟରେ ଯାହାକୁ ୩୧ ଡିସେମ୍ବର ସୁଦ୍ଧା ସମ୍ପୂର୍ଣ୍ଣ କରିବା ଆପଣଙ୍କୁ ନିହାତି ଦରକାର ।
BOB ଏବଂ SBI ଗ୍ରାହକମାନଙ୍କ ପାଇଁ ଜରୁରୀ ସୂଚନା
ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ ଏବଂ ବ୍ୟାଙ୍କ ଅଫ୍ ବରୋଦାରେ ବ୍ୟାଙ୍କ ଲକର ଥିବା ଗ୍ରାହକଙ୍କୁ ୩୧ ଡିସେମ୍ବର ସୁଦ୍ଧା ବ୍ୟାଙ୍କ ସହ ଜଡିତ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟ ସମ୍ପୂର୍ଣ୍ଣ କରିବାକୁ ପଡିବ। ସମସ୍ତ ବ୍ୟାଙ୍କକୁ ବ୍ୟାଙ୍କ ଲକର ପାଇଁ ନୂତନ ଚୁକ୍ତିନାମା ସ୍ୱାକ୍ଷର କରିବାକୁ ଗ୍ରାହକଙ୍କୁ ଜଣାଇବାକୁ ଆରବିଆଇ ପକ୍ଷରୁ କୁହାଯାଇଛି। ଯଦି ଆପଣଙ୍କର ଏସବିଆଇ କିମ୍ବା ବ୍ୟାଙ୍କ ଅଫ୍ ବରୋଦାରେ ବ୍ୟାଙ୍କ ଲକର ଅଛି, ତେବେ ଆପଣଙ୍କୁ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟକୁ ଆଗାମୀ ୧୪ ଦିନ ମଧ୍ୟରେ ସମ୍ପୂର୍ଣ୍ଣ କରିବାକୁ ପଡିବ।
ମ୍ୟୁଚୁଆଲ୍ ଫଣ୍ଡ ଆକାଉଣ୍ଟରେ ନାମାଙ୍କନ ଯୋଗକରିବାର ଶେଷ ତାରିଖ
ଯଦି ଆପଣ ଆପଣଙ୍କ ମ୍ୟୁଚୁଆଲ୍ ଫଣ୍ଡ ଆକାଉଣ୍ଟରେ ଡିସେମ୍ବର ୩୧, ୨୦୨୩ ସୁଦ୍ଧା ନାମାଙ୍କନ ଘୋଷଣା କରୁ ନାହାନ୍ତି ତେବେ ଆପଣଙ୍କ ମ୍ୟୁଚୁଆଲ୍ ଫଣ୍ଡ ଆକାଉଣ୍ଟ ଫ୍ରିଜ୍ ହୋଇଯିବ । ଏହାର ଅର୍ଥ ହେଉଛି ଯଦି ଆପଣ ଏହି ସମୟସୀମାକୁ ହାତଛଡ଼ା କରନ୍ତି, ତେବେ ଆପଣ ଟଙ୍କା ପ୍ରତ୍ୟାହାର କିମ୍ବା ଜମା କରିବାରେ ସମର୍ଥ ହେବେ ନାହିଁ । ମ୍ୟୁଚୁଆଲ୍ ଫଣ୍ଡ ସହିତ, ଡେମାଟ୍ ଆକାଉଣ୍ଟଧାରୀଙ୍କ ପାଇଁ ମଧ୍ୟ ୩୧ ଡିସେମ୍ବର ସୁଦ୍ଧା ନାମାଙ୍କନ ଦେବା ବାଧ୍ୟତାମୂଳକ ।
ଅପଡେଟ୍ ହୋଇଥିବା ITR ଫାଇଲ୍ କରିବାର ଶେଷ ତାରିଖ
ଆର୍ଥିକ ବର୍ଷ ୨୦୨୨-୨୩ ଅର୍ଥାତ୍ ମୂଲ୍ୟାଙ୍କନ ବର୍ଷ ୨୦୨୩-୨୪ ପାଇଁ ଆୟକର ରିଟର୍ଣ୍ଣ ଦାଖଲ କରିବାର ଶେଷ ତାରିଖ ଥିଲା ଜୁଲାଇ ୩୧, ୨୦୨୩ । ଯେଉଁମାନେ ଏହି ତାରିଖ ସୁଦ୍ଧା ITR ଫାଇଲ୍ କରିପାରିନାହାନ୍ତି, ତଥାପି ସେମାନେ ଡିସେମ୍ବର ୩୧, ୨୦୨୩ ପର୍ଯ୍ୟନ୍ତ ବିଳମ୍ବ ଫି ସହିତ ଅପଡେଟ୍ ହୋଇଥିବା ITR ଫାଇଲ୍ କରିପାରିବେ ।
SBI ଅମୃତ କଳସ ସମେତ ଅନେକ ସ୍ୱତନ୍ତ୍ର FDର ସମୟସୀମା
ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆର ସ୍ୱତନ୍ତ୍ର ଏଫଡି ସ୍କିମ୍ ସହିତ ଅମୃତ କଳସ ସ୍କିମ୍ ଓ ଅନେକ ସ୍ୱତନ୍ତ୍ର ଏଫଡିର ଅବଧି ତାରିଖ ୩୧ ଡିସେମ୍ବରରେ ଶେଷ ହେଉଛି। ଏହି ପରିସ୍ଥିତିରେ, ଆପଣଙ୍କ ପାଖରେ ଆଉ ମାତ୍ର ୧୪ ଦିନ ବାକି ଅଛି । ଆପଣ ଡିସେମ୍ବର ୩୧ ପର୍ଯ୍ୟନ୍ତ ଏସବିଆଇର ସ୍ୱତନ୍ତ୍ର ଏଫଡି ସ୍କିମ ଅମୃତ କଳସ, ଆଇଡିବିଆଇ ବ୍ୟାଙ୍କର ସ୍ୱତନ୍ତ୍ର ଫିକ୍ସଡ ଡିପୋଜିଟ ସ୍କିମ ଅମୃତ ମହୋତ୍ସବ ଏବଂ ଇଣ୍ଡିଆନ ବ୍ୟାଙ୍କର ଇଣ୍ଡ ସେଭର ନାମକ ଏଫଡି ଯୋଜନାରେ ବିନିଯୋଗ କରିପାରିବେ।
ବନ୍ଦ ହୋଇପାରେ UPI ID
ଯଦି ଆପଣଙ୍କର କୌଣସି UPI ID ଅଛି ଯାହାକୁ ଆପଣ ଏକ ବର୍ଷରୁ ଅଧିକ ସମୟ ବ୍ୟବହାର କରିନାହାଁନ୍ତି, ତେବେ ଏହା ଡିସେମ୍ବର ୩୧ ପରେ ବନ୍ଦ ହୋଇଯିବ । ଏପରି ପରିସ୍ଥିତିରେ, ଯଦି ଆପଣ ଗତ ଏକ ବର୍ଷ ମଧ୍ୟରେ ଆପଣଙ୍କର UPI ID ବ୍ୟବହାର କରିନାହାଁନ୍ତି, ତେବେ ଯଥାଶୀଘ୍ର ଏହାକୁ ବ୍ୟବହାର କରନ୍ତୁ । ଫଳରେ ଆପଣଙ୍କ UPI ID ସୁରକ୍ଷିତ ଭାବେ ଚାଲୁ ରହିବ ।
