କର୍ଣ୍ଣାଟକ ହାତେଇବା ମୁଡ଼ରେ କଂଗ୍ରେସ:କର୍ଣ୍ଣାଟକ ନିର୍ବାଚନକୁ ପ୍ରାଥମିକତା ଦେଇ କହିଲେ…ଆଗେ ନିର୍ବାଚନ ତାପରେ ରାଜସ୍ଥାନ
ନୂଆଦିଲ୍ଲୀ: ଆଗକୁ କର୍ଣ୍ଣାଟକ ନିର୍ବାଚନ । ଆଉ ଏଠାରେ ବିଜୟ ବାନା ଉଡାଇବା ପାଇଁ ସବୁ ଦଳ ତାର ପ୍ରସ୍ତୁତି ଆରମ୍ଭ କରି ଦେଇଛନ୍ତି । ତେବେ ଏହି କ୍ରମରେ କଂଗ୍ରେସ ମଧ୍ୟ ନିର୍ବାଚନ ପ୍ରଚାରରେ ଲାଗି ପଡିଛନ୍ତି । କିନ୍ତୁ ଏବେ ଦଳ ମଧ୍ୟରେ ଯେଉଁ କନ୍ଦଳ ରହିଛି ତାହା ସବୁ ଠାରେ ଡିବ ଡିବ ହୋଇ ବାଜୁଛି । କିନ୍ତୁ ଦଳର ସଭାପତି କହିଦେଇଛନ୍ତି ଯେ ଏବେ ଦଳର ଫୋକସ କର୍ଣ୍ଣାଟକ ଉପରେ ରହିଛି । ରାଜସ୍ଥାନ କଥା ନିର୍ବାଚନ ପରେ ଶୁଣାଯିବ ।
ରାଜସ୍ଥାନ କଂଗ୍ରେସରେ ଚାଲିଥିବା ହଇଚଇ ଥମିବାର ନାମ ନେଉନାହିଁ। ତେବେ ଏହି ଭିତରେ କର୍ଣ୍ଣାଟକ ରାଜ୍ୟ ନିର୍ବାଚନ ପ୍ରଚାର ସହିତ କଂଗ୍ରେସ ନିଜର ପ୍ରାଥମିକତାକୁ ଦର୍ଶାଇ ରାଜସ୍ଥାନ ସଙ୍କଟର ସମାଧାନ ପାଇଁ ଆଉ କିଛି ସମୟ ନେଇଥିବା ସମ୍ଭାବନାକୁ ପ୍ରକାଶ କରିଛି। କଂଗ୍ରେସ ନେତା କହିଛନ୍ତି ଯେ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ବିରୋଧକୁ ଏବେ ଅଧିକ ପ୍ରାଥମିକତା ଦିଆଯାଉନାହିଁ। ଆଉ କର୍ଣ୍ଣାଟକ ନିର୍ବାଚନ ପରେ ରାଜସ୍ଥାନ ସଙ୍କଟ କମିବାର ସମ୍ଭାବନା ରହିଛି ବୋଲି ସେ ପ୍ରକାଶ କରିଛନ୍ତି ।
ସେ କହିଛନ୍ତି ଯେ ଏହି ସମୟରେ ପାଇଲଟଙ୍କ କ୍ୟାମ୍ପ ସହ ଆଲୋଚନା ଚାଲିଛି କିନ୍ତୁ କର୍ଣ୍ଣାଟକ ନିର୍ବାଚନ ପୂର୍ବରୁ ବିରୋଧୀ ଦଳର ବୈଠକ ହେବାର ସମ୍ଭାବନା ନାହିଁ। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ବର୍ତ୍ତମାନ ପ୍ରଚାରରେ ବ୍ୟସ୍ତ ଅଛନ୍ତି। କାରଣ ମେ ୧୦ ରେ କର୍ଣ୍ଣାଟକରେ ମତଦାନ ଅନୁଷ୍ଠିତ ହେବ ଏବଂ ଫଳାଫଳ ମେ ୧୩ ରେ ଆସିବ। ଆଉ ଏହା ପରେ ହିଁ ରାଜସ୍ଥାନ ରାଜନୀତିରେ ଧ୍ୟାନ ଦିଆଯିବ।
ସୂଚନାମୁତାବକ ପାଇଲଟ ଗେହଲଟଙ୍କ ବିରୋଧରେ ସ୍ୱର ଉତ୍ତୋଳନ କରିଛନ୍ତି ଏବଂ ଦୁର୍ନୀତି ବିରୋଧରେ ଅନଶନରେ ମଧ୍ୟ ବସିଛନ୍ତି। କିନ୍ତୁ ଦଳ ଏଥିରେ ସମର୍ଥନ ଦେଇନାହିଁ। କଂଗ୍ରେସ ଏହାର ବିରୋଧକୁ ଦଳ ବିରୋଧୀ କାର୍ଯ୍ୟକଳାପ ବୋଲି କହିଛି। ପାଇଲଟ ତାଙ୍କ ନିଷ୍ପତ୍ତିକୁ ଠିକ୍ କରିବାକୁ ଦଳ ତାଙ୍କୁ କହିଛନ୍ତି ।
ଅନଶନ ସମୟରେ ପାଇଲଟ ଦାବି କରିଛନ୍ତି ଯେ ରାଜ୍ୟ ସରକାରଙ୍କ ବିରୋଧରେ ଦୁର୍ନୀତି ଅଭିଯୋଗ ଉପରେ ସରକାର କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହାନ୍ତି ଏବଂ କଂଗ୍ରେସ ଯେଉଁ ପ୍ରତିଶ୍ରୁତି ଦେଇଛନ୍ତି ତାହା ପାଳନ କରୁନାହାନ୍ତି । ସେ କହିଛନ୍ତି ଯେ ଅନୁସନ୍ଧାନର ଅଭାବ ଗେହଲଟ୍ ଏବଂ ଭାରତୀୟ ଜନତା ପାର୍ଟି ମଧ୍ୟରେ ମିଳନ ହେବାର ଭ୍ରମ ସୃଷ୍ଟି କରିପାରେ।
ତେବେ ଏହା ଭିତରେ ଦଳର ଅନ୍ୟ କର୍ମୀ ମାନେ କହିଛନ୍ତି ଯେ ଦଳର ସମ୍ପୂର୍ଣ୍ଣ ଧ୍ୟାନ ଏବେ କର୍ଣ୍ଣାଟକ ନିର୍ବାଚନ ଉପରେ ରହିଛି, ଯାହା ଏବେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଦକ୍ଷିଣ ଭାରତରେ କୌଣସି କଂଗ୍ରେସ ସରକାର ନାହିଁ ଏବଂ ଦଳ ଏଠାରେ ନିର୍ବାଚନରେ ଜିତିବାକୁ ଆଶା ରଖିଛି। ଏଭଳି ପରିସ୍ଥିତିରେ କଂଗ୍ରେସ ନେତାମାନେ ସୂଚାଇ ଦେଇଛନ୍ତି ଯେ କର୍ଣ୍ଣାଟକ ନିର୍ବାଚନ ଶେଷ ହେବା ପୂର୍ବରୁ ବିରୋଧୀ ଦଳର ନେତାଙ୍କ ପ୍ରସ୍ତାବିତ ବୈଠକ ଆଦୌ ସମ୍ଭବ ନୁହେଁ।
