Video: କଟକ ରେଳ ଷ୍ଟେସନରେ କନଷ୍ଟେବଳଙ୍କ ସାହସିକତା, ବଞ୍ଚାଇଲେ ଯାତ୍ରୀଙ୍କ ଜୀବନ
କଟକ: ଗୁରୁବାର ସକାଳ ୮:୦୫ ସମୟରେ କଟକ ରେଳ ଷ୍ଟେସନରେ ଏକ ହୃଦୟସ୍ପର୍ଶୀ ଘଟଣାରେ ରେଳ କନଷ୍ଟେବଳ ଟୁଲୁ ବେହେରାଙ୍କ ସାହସିକତା ଓ ତୁରନ୍ତ କାର୍ଯ୍ୟାନୁଷ୍ଠାନ ଯୋଗୁଁ ଜଣେ ଯାତ୍ରୀ ମହମ୍ମଦ ମୁଜାହିରଙ୍କ ଜୀବନ ରକ୍ଷା ହୋଇଛି।
ଘଟଣା ଅନୁଯାୟୀ, ମହମ୍ମଦ ମୁଜାହିର କିଶନଗଞ୍ଜ ଅଭିମୁଖେ ଯାଉଥିବା ଟ୍ରେନ ନଂ. ୨୨୫୦୩ (କନ୍ୟାକୁମାରୀ-ଡିବ୍ରୁଗଡ଼ ଏକ୍ସପ୍ରେସ)ରେ ଚଢ଼ିବାକୁ ଚେଷ୍ଟା କରୁଥିବା ବେଳେ ଟ୍ରେନଟି ଗତିଶୀଳ ଥିଲା। ଏହି ସମୟରେ ସେ ଟ୍ରେନର ପାହାଚରୁ ଖସି ପ୍ଲାଟଫର୍ମ ଓ ଟ୍ରେନର ଚକ ମଧ୍ୟରେ ଆସି ମରଣାନ୍ତକ ବିପଦରେ ପଡ଼ିଥିଲେ। ଏହି ହୃଦୟସ୍ପର୍ଶୀ ମୁହୂର୍ତ୍ତରେ କନଷ୍ଟେବଳ ଟୁଲୁ ବେହେରା ଅତ୍ୟନ୍ତ ସାହସିକତାର ସହ ତୁରନ୍ତ ମୁଜାହିରଙ୍କ ହାତ ଧରି ତାଙ୍କୁ ବିପଜ୍ଜନକ ସ୍ଥାନରୁ ଟାଣି ବାହାର କରି ଜୀବନ ରକ୍ଷା କରିଥିଲେ।
ଏହି ପ୍ରଶଂସନୀୟ କାର୍ଯ୍ୟ ପାଇଁ ଓଡ଼ିଶା ଡିଜିପି ୱାଇ.ବି. ଖୁରାନିଆ, ଆଇପିଏସ, କନଷ୍ଟେବଳ ବେହେରାଙ୍କୁ ୨,୫୦୦ ଟଙ୍କାର ପୁରସ୍କାର ଘୋଷଣା କରିଛନ୍ତି। ଏହାସହ କୋଷ୍ଟାଲ ସିକ୍ୟୁରିଟି ଓ ରେଳବାଇର ଏଡିଜି ଅରୁଣ ବୋଥ୍ରା କନଷ୍ଟେବଳ ବେହେରାଙ୍କ ସହ କଥା ହୋଇ ତାଙ୍କର ସାହସିକତା ଓ ତୁରନ୍ତ ନିଷ୍ପତ୍ତି ନେବାର କ୍ଷମତାକୁ ଉଚ୍ଚ ପ୍ରଶଂସା କରିଛନ୍ତି।
ଏହି ଘଟଣା ଷ୍ଟେସନରେ ଉପସ୍ଥିତ ଯାତ୍ରୀ ଓ କର୍ମଚାରୀଙ୍କ ମଧ୍ୟରେ ଖୁସିର ପରିବେଶ ସୃଷ୍ଟି କରିଛି ଏବଂ କନଷ୍ଟେବଳ ବେହେରାଙ୍କ କାର୍ଯ୍ୟକୁ ସମସ୍ତେ ମୁକ୍ତକଣ୍ଠରେ ପ୍ରଶଂସା କରିଛନ୍ତି।