ଅକ୍ସଜେନ୍ ଅଭାବରୁ ରୋଗୀ ଅବସ୍ଥା ଗୁରୁତର, ଏପଟେ ଫଟୋ ଉଠାଇବାକୁ ଟ୍ୟାଙ୍କର ଅଟକାଇ ଦେଲେ ବିଜେପି ନେତା
ଇନ୍ଦୌର,୧୯ ।୪: ସବୁଆଡେ କରୋନା ମହାମାରୀର ପୁଣି ଥରେ ବଢୁଥିବା ବେଳେ ଗୁରୁତର ରୋଗୀଙ୍କୁ ମୃତ୍ୟୁମୁଖରୁ ବଞ୍ଚାଇବା ପାଇଁ ଅକ୍ସିଜେନର ବ୍ୟବହାରକୁ ଗୁରୁତ୍ୱ ଦିଆଯାଉଛି । କରୋନାର ଭୟାବହତା ମଧ୍ୟରେ ଗୁଜୁରାଟରୁ ୩୦ ଟନ୍ ଅମ୍ଳଜାନ ନେଇ ଏକ ଟ୍ୟାଙ୍କର ଶନିବାର ରାତିରେ ଇନ୍ଦୋରରେ ପହଞ୍ଚିଥିଲା । ଏଠାରେ ଥିବା ଡାକ୍ତରଖାନାଗୁଡ଼ିକରେ ରୋଗୀମାନଙ୍କ ପାଇଁ ତୁରନ୍ତ ଅମ୍ଳଜାନ ଆବଶ୍ୟକ ଥିଲା, କିନ୍ତୁ ଡାକ୍ତରଖାନା ନିଆଯିବା ପରିବର୍ତ୍ତେ ବିଜେପି ନେତାମାନେ ଟ୍ୟାଙ୍କର ଅଟକାଇ ଫଟୋ ଉଠାଇବାକୁ କହିଥିଲେ । ଦୁଇଟି ସ୍ଥାନରେ ଫଟୋ ଅଧିବେଶନ ପାଇଁ ଟ୍ୟାଙ୍କରକୁ ଦୁଇ ଘଣ୍ଟା ପାଇଁ ଅଟକାଯାଇଥିଲା । ପ୍ରଥମେ ବିଜେପି ନଗର ଅଧ୍ୟକ୍ଷ ଗୌରବ ରଣଦୀଭ ଟ୍ୟାଙ୍କରକୁ ଚନ୍ଦନ ନାଗରରେ ଅଟକାଇଥିଲେ । ତା’ପରେ ଇନ୍ଦୋର ସାଂସଦ ଶଙ୍କର ଲାଲୱାନି ଓ ବିଧାୟକ ଆକାଶ ବିଜୟଭର୍ଗିଆ ଏହି ଟ୍ୟାଙ୍କରକୁ ପୂଜା କରିଥିଲେ ଏବଂ ଫଟୋ ଉଠାଇଥିଲେ ।
ଗୋଟିଏ ପଟେ ରୋଗୀମାନେ ଅକ୍ସିଜେନ ନେବାକୁ ଚାହିଁ ବସିଥିବା ବେଳେ ଅନ୍ୟପଟେ ବିଜେପି ନେତାମାନେ ଫଟୋ ଉଠାଇବା ପାଇଁ ଟ୍ୟାଙ୍କରକୁ ଅଟକାଇଥିଲେ । ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ ଅମ୍ଳଜାନ ଟ୍ୟାଙ୍କରମାନଙ୍କୁ ଆମ୍ବୁଲାନ୍ସ ମାନ୍ୟତା ଦେବା ସହ ଏଥିରେ କୌଣସି ରୋକ୍-ଠୋକ୍ ନହେବା ପାଇଁ ପୋଲିସକୁ ନିର୍ଦ୍ଦେଶ ଦେବା ପରେ ବି ଏପରି ଏକ ଦାୟିତ୍ୱହୀନ କାର୍ଯ୍ୟ ଲୋକଲୋଚନକୁ ଆସିଛି ।
