ଏଲଭିଶ ଯାଦବଙ୍କ ବିରୋଧରେ ଏଫଆଇଆର ରୁଜୁ କରିବାକୁ କୋର୍ଟଙ୍କ ନିର୍ଦ୍ଦେଶ

ନୂଆଦିଲ୍ଲୀ: ୟୁଟ୍ୟୁବର ଏଲଭିଶ ଯାଦବଙ୍କ ସମସ୍ୟା ବଢିପାରେ । ଗୁରୁଗ୍ରାମର ଏକ ଅଦାଲତ ଏଲଭିଶ ଯାଦବଙ୍କ ବିରୋଧରେ ଏତଲା ଦେବାକୁ ନିର୍ଦ୍ଦେଶ ଦେଇଛନ୍ତି। ହରିୟାଣବୀ ଗାୟକ ରାହୁଲ ଯାଦବ ଫଜିଲପୁରିଆଙ୍କ ବିରୋଧରେ ମଧ୍ୟ ଏଫଆଇଆର ଆଦେଶ ଦିଆଯାଇଛି । ୩୨ ବୋର ଗୀତର ସୁଟିଂ ସମୟରେ ବେକରେ ସାପ ରଖିବା କୁ ନେଇ ଏହି ଘଟଣା ଘଟିଛି । ଏନଜିଓ ପିପୁଲ ଫର ଆନିମଲ ପକ୍ଷରୁ କୋର୍ଟରେ ଏକ ପିଟିସନ ଦାଖଲ କରାଯାଇଥିଲା । ଗୁରୁବାର ସନ୍ଧ୍ୟାରେ କୋର୍ଟ ବାଦଶାହପୁର ଥାନାକୁ ଏତଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି।

ଗୁରୁଗ୍ରାମ ଅଦାଲତ ପଶୁ ନିର୍ଯାତନା ଆଇନ, ବନ୍ୟପ୍ରାଣୀ ଆଇନ, ଗାବ୍ଲିଂ ଆକ୍ଟ ଏବଂ ଅପରାଧିକ ଷଡ଼ଯନ୍ତ୍ର ର ଧାରା ଅନୁଯାୟୀ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି। ଅତିରିକ୍ତ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ମନୋଜ ରଣାଙ୍କ କୋର୍ଟ ବାଦଶାହପୁର ଥାନାରେ ମାମଲା ରୁଜୁ କରିବାକୁ କହିଛନ୍ତି। ଗୀତର ସୁଟିଂ ସମୟରେ ବିରଳ ସାପ ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଏହା ପୂର୍ବରୁ ୟୁଟ୍ୟୁବର ସାଗର ଠାକୁର ଓରଫ ମାକ୍ସଟନଙ୍କୁ ଆକ୍ରମଣ ମାମଲାରେ ଗୁରୁଗ୍ରାମ ର ଏକ ଅଦାଲତ ଏଲଭିଶ ଯାଦବଙ୍କୁ ଜାମିନ ପ୍ରଦାନ କରିଥିଲେ। ୟୁପି ପୋଲିସ ଏଲଭିଶ ଯାଦବଙ୍କୁ ଗୁରୁଗ୍ରାମ କୋର୍ଟକୁ ଆଣିଥିଲା, ଯେଉଁଠାରେ ଗୁରୁଗ୍ରାମ ପୋଲିସ ତାଙ୍କୁ ହେପାଜତକୁ ନେଇଥିଲା । ପରେ ଯାଦବଙ୍କୁ ମାଜିଷ୍ଟ୍ରେଟ୍ ଅକ୍ଷୟ କୁମାରଙ୍କ କୋର୍ଟରେ ହାଜର କରାଯାଇଥିଲା।

ଡ୍ୟୁଟି ମାଜିଷ୍ଟ୍ରେଟ୍ କୋର୍ଟ ଯାଦବଙ୍କୁ ଜାମିନରେ ମୁକ୍ତ କରିଥିଲେ। ଶନିବାର ଅପରାହ୍ନ ପ୍ରାୟ ସାଢ଼େ ଗୋଟାଏ ବେଳେ ତାଙ୍କୁ କୋର୍ଟଚାଲାଣ କରାଯିବା ପରେ ତାଙ୍କ ଓକିଲମାନେ ଜାମିନ ବଣ୍ଡ ଦାଖଲ କରିବା ପରେ ତାଙ୍କୁ ଜାମିନ ମିଳିଥିଲା। ଗୁରୁଗ୍ରାମର ସେକ୍ଟର ୫୩ ଅଞ୍ଚଳରେ ଥିବା ଏକ ସପିଂ ମଲ୍ରେ ମାର୍ଚ୍ଚ ୮ ତାରିଖରେ ଏହି ଘଟଣା ଘଟିଥିଲା। ଏହି ଘଟଣାର ଏକ ଭିଡିଓ ଭାଇରାଲ ହୋଇଥିଲା ଯେଉଁଥିରେ ଏଲଭିଶ ଯାଦବ ଦିଲ୍ଲୀର ଜଣେ କଣ୍ଟେଣ୍ଟ କ୍ରିଏଟରଙ୍କୁ ଆକ୍ରମଣ କରୁଥିବାର ଦେଖିବାକୁ ମିଳିଛି । ଏହାପରେ ସେକ୍ଟର ୫୩ ଥାନାରେ ଏଲଭିଶ ଓ ଅନ୍ୟମାନଙ୍କ ବିରୋଧରେ IPCର ଧାରା ୧୪୭ (ଦଙ୍ଗା), ୧୪୯ (ବେଆଇନ ସମାବେଶ), ୩୨୩ (ସ୍ବେଚ୍ଛାକୃତ ଭାବେ ଆଘାତ ଦେବା ପାଇଁ ଦଣ୍ଡ) ଏବଂ ୫୦୬ (ଅପରାଧିକ ଧମକ) ଅନୁଯାୟୀ ମାମଲା ରୁଜୁ କରାଯାଇଥିଲା।