ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସ ନେତା ବୁଟା ସିଂହଙ୍କ ପରଲୋକ
ନୂଆଦିଲ୍ଲୀ,୨ ।୧: ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ବୁଟା ସିଂହଙ୍କର ଆଜି ପରଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ୮୬ ବର୍ଷ ବୟସ ହୋଇଥିଲା। ଦିଲ୍ଲୀ ଏମ୍ସରେ ଚିକିତ୍ସାଧୀନ ଅବସ୍ଥାରେ ତାଙ୍କର ବିୟୋଗ ଘଟିଛି । ସେ ଦୀର୍ଘ ଦିନ ଧରି ବିଭିନ୍ନ ରୋଗରେ ପରୀଡିତ ଥାଇ ଚିକିତ୍ସିତ ହେଉଥିଲେ ।
ତେବେ୧୯୩୪ ମାର୍ଚ୍ଚ ୨୧ରେ ଜଳନ୍ଧର ଜିଲାର ମୁସ୍ତଫାପୁର ଗାଁରେ ଜନ୍ମିତ ବୁଟା ସିଂହ ୮ ଥର ଲୋକସଭାକୁ ନିର୍ବାଚିତ ହୋଇଥିଲେ । କେନ୍ଦ୍ର ଗୃହମନ୍ତ୍ରୀ ଏବଂ କେନ୍ଦ୍ର କୃଷିମନ୍ତ୍ରୀ ସମେତ ସେ ବିଭିନ୍ନ ସମୟରେ ଅନେକ ପଦପଦବୀରେ ଅବସ୍ଥାନ କରିଥିଲେ।
ବୁଟା ସିଂହଙ୍କ ଦେହାନ୍ତ କଂଗ୍ରେସ ପାଇଁ ବଡ଼ କ୍ଷତି ବୋଲି କୁହାଯାଉଛି । ନେହରୁ-ଗାନ୍ଧୀ ପରିବାରର ବିଶ୍ୱାସପାତ୍ର ରହିଆସିଥିବା ବୁଟା ସିଂହ କଂଗ୍ରେସ ଶାସନ କାଳରେ ଗୃହମନ୍ତ୍ରୀ, କୃଷି ମନ୍ତ୍ରୀ, ରେଳ ମନ୍ତ୍ରୀ, କ୍ରୀଡ଼ା ମନ୍ତ୍ରୀ ପଦ ସମେତ ଅନ୍ୟାନ୍ୟ ଦାୟିତ୍ୱ ସମ୍ଭାଳିଥିଲେ । ଏହା ବ୍ୟତୀତ ସେ ବିହାରର ରାଜ୍ୟପାଳ ଏବଂ ଜାତୀୟ ଅନୁସୂଚିତ ଜାତି ଆୟୋଗର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟଭାର ତୁଲାଇଥିଲେ । ତାଙ୍କୁ ଦଳିତଙ୍କ ମସିହା ଭାବେ ବିବେଚନା କରାଯାଏ ।
ସେ ମଧ୍ୟ ପଞ୍ଜାବୀ ସାହିତ୍ୟ ଓ ଶିଖ୍ ଇତିହାସର କେତେକ ଲେଖାର ସଙ୍କଳନ କରିଛନ୍ତି। ଏହାଛଡ଼ା ‘ପଞ୍ଜାବୀ ସ୍ପିକିଙ୍ଗ୍ ଷ୍ଟେଟ୍’ ନାମକ ଏକ ସମୀକ୍ଷାଭିତ୍ତିକ ପୁସ୍ତକ ରଚନା କରିଛନ୍ତି। ୨୦୦୭ରୁ ୨୦୧୦ଯାଏଁ ସେ ‘ନ୍ୟାସ୍ନାଲ୍ କମିସନ୍ ଫର୍ ସିଡ୍ୟୁଲ୍ଡ୍ କାଷ୍ଟ୍’ର ସଭାପତି ଥିଲେ।