ପେନସନ ନିୟମରେ ବଡ଼ ପରିବର୍ତ୍ତନ କଲେ ସରକାର, ଚାକିରିରୁ ବହିଷ୍କୃତ ହେଲେ ମିଳିବନି ଏହି ସୁବିଧା…
ନୂଆଦିଲ୍ଲୀ,୨୭ା୫: ସରକାର ପେନସନ ନିୟମରେ ଏକ ବଡ଼ ପରିବର୍ତ୍ତନ କରିଛନ୍ତି । ପବ୍ଲିକ୍ ସେକ୍ଟର ଅଣ୍ଡରଟେକିଂ (PSU) ଅର୍ଥାତ୍ ସରକାରୀ କ୍ଷେତ୍ରର କୌଣସି କର୍ମଚାରୀଙ୍କୁ ବହିଷ୍କାର କରାଗଲେ ତାଙ୍କୁ ଅବସର ସମୟରେ ସୁବିଧା ମିଳିବ ନାହିଁ। ଏହି ସୂଚନା ଦେଇ କେନ୍ଦ୍ର ସରକାର କହିଛନ୍ତି ଯେ, ଏପରି ବହିଷ୍କାର ନିଷ୍ପତ୍ତି ସମ୍ପୃକ୍ତ ପ୍ରଶାସନିକ ମନ୍ତ୍ରଣାଳୟ ଦ୍ୱାରା ସମୀକ୍ଷା କରାଯିବ। ଏହି ପରିପ୍ରେକ୍ଷୀରେ କାର୍ମିକ ମନ୍ତ୍ରଣାଳୟ କେନ୍ଦ୍ରୀୟ ସିଭିଲ ସେବା (ପେନସନ୍) ନିୟମ ୨୦୨୧ରେ ବଡ଼ ପରିବର୍ତ୍ତନ କରିଛି।
ସମ୍ପ୍ରତି ଅଧିସୂଚିତ କେନ୍ଦ୍ରୀୟ ସିଭିଲ୍ ସର୍ଭିସେସ୍ (ପେନସନ୍) ସଂଶୋଧନ ନିୟମ,୨୦୨୫ ଅନୁଯାୟୀ, ଯେକୌଣସି କର୍ମଚାରୀଙ୍କୁ କୌଣସି ସରକାରୀ କ୍ଷେତ୍ରର କାର୍ଯ୍ୟରେ ଯୋଗଦେବା ପରେ କୌଣସି ଭୁଲ ପାଇଁ ଚାକିରିରୁ ବହିଷ୍କାର କିମ୍ବା ଛଟେଇ କରାଯାଏ, ତାଙ୍କୁ ତାଙ୍କର ଅବସରକାଳୀନ ସୁବିଧାରୁ ବଞ୍ଚିତ କରାଯିବ। ଏହି ନିୟମଗୁଡ଼ିକ ୨୨ ମଇରେ ଅଧିସୂଚିତ କରାଯାଇଥିଲା। ଏଥିରେ କୁହାଯାଇଛି ଯେ, ଜଣେ କର୍ମଚାରୀଙ୍କୁ ବହିଷ୍କାର କିମ୍ବା ଛଟେଇ କରାଯିବା କ୍ଷେତ୍ରରେ, ପ୍ରକଳ୍ପର ନିଷ୍ପତ୍ତିକୁ ସମ୍ପୃକ୍ତ ମନ୍ତ୍ରଣାଳୟ ପ୍ରଶାସନିକ ଭାବରେ ସମୀକ୍ଷା କରିବ।
ପୂର୍ବ ନିୟମ ଅନୁଯାୟୀ, କୌଣସି ସରକାରୀ କ୍ଷେତ୍ରର କର୍ମଚାରୀଙ୍କୁ ଚାକିରିରୁ ବହିଷ୍କାର କିମ୍ବା ଛଟେଇ କରାଯିବା କ୍ଷେତ୍ରରେ ଅବସରକାଳୀନ ସୁବିଧା ସମାପ୍ତ କରିବାକୁ ଅନୁମତି ନଥିଲା। କର୍ମଚାରୀମାନେ ଏଥିରୁ ଉପକୃତ ହୋଇପାରିଥାନ୍ତେ। କିନ୍ତୁ ଏବେ ସରକାର ଏହାକୁ ସମ୍ପୂର୍ଣ୍ଣ ଭାବରେ ସମାପ୍ତ କରିବାକୁ ନିଷ୍ପତ୍ତି ନେଇଛନ୍ତି। ଚାକିରିରୁ ବହିଷ୍କାର ପରେ କୌଣସି କର୍ମଚାରୀ ଅବସରକାଳୀନ ସୁବିଧା ପାଇବେ ନାହିଁ।
ନୂତନ ନିୟମରେ ଆହୁରି କୁହାଯାଇଛି ଯେ, ଭବିଷ୍ୟତରେ ଭଲ ଆଚରଣ ଅନୁଯାୟୀ ପେନସନ ଏବଂ ଫ୍ୟାମିଲି ପେନସନ, ଅନୁକମ୍ପା ଭତ୍ତା ଜାରି ରଖିବା କିମ୍ବା ପ୍ରଦାନ କରିବା ସମ୍ପର୍କିତ ବ୍ୟବସ୍ଥା ଏପରି ବହିଷ୍କୃତ କିମ୍ବା ଛଟେଇ ହୋଇଥିବା କର୍ମଚାରୀଙ୍କ ପାଇଁ ମଧ୍ୟ ପ୍ରଯୁଜ୍ୟ ହେବ।
କେନ୍ଦ୍ରୀୟ ସିଭିଲ୍ ସେବା (ପେନସନ୍) ନିୟମ ୩୧ ଡିସେମ୍ବର୨୦୦୩ ରେ କିମ୍ବା ପୂର୍ବରୁ ନିଯୁକ୍ତ ସରକାରୀ କର୍ମଚାରୀଙ୍କ ପାଇଁ ପ୍ରଯୁଜ୍ୟ, ରେଳ କର୍ମଚାରୀ, ଆକସ୍ମିକ ଏବଂ ଦୈନିକ ମଜୁରୀ ନିଯୁକ୍ତିରେ ନିୟୋଜିତ ବ୍ୟକ୍ତି ଏବଂ ଭାରତୀୟ ପ୍ରଶାସନିକ ସେବା (IAS), ଭାରତୀୟ ପୋଲିସ ସେବା (IPS) ଏବଂ ଭାରତୀୟ ବନ ସେବା (IFoS) ର ଅଧିକାରୀମାନଙ୍କୁ ଛାଡି ଏହି ନିୟମ ପ୍ରଯୁଜ୍ୟ।