ଏଣିକି ତୁରନ୍ତ ସମାଧାନ ହେବ ଗ୍ରାହକଙ୍କ ସହ ଜଡିତ ମାମଲା! ସରକାର ନେବେ AIର ସାହାଯ୍ୟ, ଜାଣନ୍ତୁ କ’ଣ ରହିଛି ପ୍ଲାନ୍
ନୂଆଦିଲ୍ଲୀ: ଦେଶର ବିଭିନ୍ନ ଗ୍ରାହକ କୋର୍ଟରେ ପଡ଼ିଥିବା ମାମଲାଗୁଡ଼ିକୁ ହ୍ରାସ କରିବା ପାଇଁ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ର ବ୍ୟବହାର ଉପରେ କାମ ଚାଲିଛି ବୋଲି ଗ୍ରାହକ ବ୍ୟାପାରର ମନ୍ତ୍ରଣାଳୟ କହିଛି । ମନ୍ତ୍ରଣାଳୟ ଏହା ମଧ୍ୟ କହିଛି ଯେ, ଜାତୀୟ ଉପଭୋକ୍ତା ବିବାଦ ନିବାରଣ ଆୟୋଗ (ଏନସିଡିଆରସି) ଅଗଷ୍ଟରେ ୮୫୪ ଟି ମାମଲା ସଫଳତାର ସହ ସମାଧାନ କରିଛି, ଯାହା ଚଳିତ ବର୍ଷରେ ସବୁଠାରୁ ଅଧିକ ।
ସରକାରଙ୍କ ଦ୍ୱାରା ପ୍ରକାଶିତ ଏକ ବିବୃତ୍ତି ଅନୁଯାୟୀ, ଏନସିଡିଆରସି ଦ୍ୱାରା ନିଆଯାଇଥିବା ସକ୍ରିୟ ପଦକ୍ଷେପ, ସୁବ୍ୟବସ୍ଥିତ ପ୍ରକ୍ରିୟା ଏବଂ ଇ-ରିଟର୍ନ ଭଳି ଅପଗ୍ରେଡ୍ ଟେକ୍ନୋଲୋଜି ଯୋଗୁଁ ସମ୍ଭବ ହୋଇଥିଲା, ଯାହାକି ପୂର୍ବ ଅପେକ୍ଷା ଶୀଘ୍ର ମାମଲାଗୁଡ଼ିକର ସମାଧାନ କରିବାରେ ସାହାଯ୍ୟ ମିଳିଥିଲା ।
ପ୍ଲାନ୍ କ’ଣ?
ସରକାରଙ୍କ ପକ୍ଷରୁ ଜାରି ହୋଇଥିବା ବୟାନ ଅନୁସାରେ, ମାମଲାର ସମାଧାନ କରୁଥିବା ଏହି ଗତିକୁ ବଜାୟ ରଖିବା ପାଇଁ ଉପଭୋକ୍ତା ଆୟୋଗରେ ଇ-ରିଟର୍ଣ୍ଣ ମାଧ୍ୟମରେ ମାମଲା ଦାୟର କରିବାକୁ ବିଭାଗ ବାଧ୍ୟତାମୂଳକ କରିଛି ଓ ଶୀଘ୍ର ଇ-ଫାଇଲିଂରେ ଭିସି(ଭିଡିଓ କନଫରେନ୍ସି) ର ସୁବିଧା ଉପଲବ୍ଧ ହେବ । ଜାତୀୟ, ରାଜ୍ୟ ଏବଂ ଜିଲ୍ଲା ଉପଭୋକ୍ତା ଆୟୋଗରେ ମାମଲାଗୁଡ଼ିକର ପେଣ୍ଡେନ୍ସି ହ୍ରାସ କରିବା ପାଇଁ କୃତ୍ରିମ ଇଣ୍ଟେଲିଜେନ୍ସ ସୁବିଧା ବ୍ୟବହାର କରିବାକୁ ମନ୍ତ୍ରଣାଳୟ କାମ କରୁଛି ।
କାର୍ଯ୍ୟ କିପରି କରାଯିବ:-
ବିବୃତ୍ତିରେ କୁହାଯାଇଛି ଯେ ଉପଭୋକ୍ତା ଆୟୋଗରେ ଦାଖଲ ହୋଇଥିବା ମାମଲାଗୁଡ଼ିକ ଆର୍ଟିଫିସିଆଲ ଇଣ୍ଟେଲିଜେନ୍ସ ମାଧ୍ୟମରେ ବିଶ୍ଳେଷଣ କରାଯିବ ଏବଂ ଏହାର ସାରାଂଶ ପ୍ରସ୍ତୁତ ହେବ । ମାମଲାର ସମାଧାନ ପାଇଁ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ମାଧ୍ୟମରେ ଆହୁରି ଅନେକ ପଦକ୍ଷେପ ନିଆଯିବ । ୨୦୨୩ ମସିହାରେ ଆୟୋଗରେ ଉପଭୋକ୍ତା ମାମଲାଗୁଡ଼ିକର ସମାଧାନରେ ଏନସିଡିଆରସି ଯଥେଷ୍ଟ ଉନ୍ନତି କରିଛି ।
ଏନସିଡିଆରସି ଏବଂ ଉପଭୋକ୍ତା ବ୍ୟାପାର ବିଭାଗ ଅଗଷ୍ଟରେ ୮୫୪ ଉପଭୋକ୍ତା ମାମଲାକୁ ସଫଳତାର ସହ ସମାଧାନ କରିଛି, କିନ୍ତୁ ସମାନ ସମୟ ମଧ୍ୟରେ ଦାଖଲ ହୋଇଥିବା ମାମଲା ସଂଖ୍ୟା ୪୫୫ ଥିଲା । ସରକାର କହିଛନ୍ତି ଯେ, ଏହି ସଫଳତା ଉପଭୋକ୍ତା ଅଧିକାରର ସୁରକ୍ଷା ତଥା ଅଭିଯୋଗର ତୁରନ୍ତ ସମାଧାନ ପାଇଁ ଏନସିଡିଆରସିର ଅତୁଟ ପ୍ରତିବଦ୍ଧତାକୁ ଦର୍ଶାଉଛି ।
