ପାର୍ଟିରେ ପଶି ଆଖିବୁଜା ଗୁଳିଚଳାଇଲେ ବନ୍ଧୁକଧାରୀ: ୬ ମୃତ, ୨୬ ଆହତ
ନୂଆଦିଲ୍ଲୀ: ନୂଆ ବର୍ଷ ଆରମ୍ଭର ୩ ଦିନ ପୂର୍ବରୁ ମେକ୍ସିକୋରେ ଗୁଳିକାଣ୍ଡ ଘଟିଛି । ବନ୍ଧୁକଧାରୀମାନେ ହଠାତ୍ ପାର୍ଟିରେ ମଜା କରୁଥିବା ଲୋକଙ୍କ ମଧ୍ୟରେ ପ୍ରବେଶ କରି ଗୁଳି ଚଳାଇବା ଆରମ୍ଭ କରି ଆତଙ୍କ ସୃଷ୍ଟି କରିଛନ୍ତି। ଲୋକମାନେ ନିଜ ଜୀବନ ବଞ୍ଚାଇବା ପାଇଁ ତୁରନ୍ତ ଦୌଡିବା ଆରମ୍ଭ କରିଛନ୍ତି। ଏହି ସମୟରେ ଅନେକ ଲୋକ ମୃତ୍ୟୁବରଣ କରିଛନ୍ତି ଏବଂ ଅନେକ ଆହତ ହୋଇଛନ୍ତି। ଶୁକ୍ରବାର ସକାଳେ ଉତ୍ତର ମେକ୍ସିକୋରେ ଏହି ଘଟଣାରେ ତିନିଜଣ ବନ୍ଧୁକଧାରୀ ଏକ ପାର୍ଟୀରେ ପ୍ରବେଶ କରି ଗୁଳି ଚଳାଇଥିବାର ସୂଚନା ମିଳିଛି। ଏହି ଘଟଣାରେ ଏପର୍ଯ୍ୟନ୍ତ ୬ ଜଣଙ୍କର ମୃତ୍ୟୁ ଘଟିଥିବା ବେଳେ ୨୬ ଜଣ ଆହତ ହୋଇଛନ୍ତି।
ମୃତକଙ୍କ ମଧ୍ୟରୁ ଦୁଇଜଣଙ୍କର ବୟସ ୧୮ ବର୍ଷରୁ କମ୍ ଏବଂ ଆହତମାନଙ୍କ ମଧ୍ୟରେ ପାଞ୍ଚ ଜଣ ଶିଶୁ ମଧ୍ୟ ଅଛନ୍ତି। ଅପରାଧୀମାନେ ଗୁଳି ଚଳାଇବା ବେଳେ ପିଲାମାନଙ୍କୁ ମଧ୍ୟ ଛାଡି ନଥିଲେ। ସମସ୍ତ ଆହତଙ୍କୁ ନିକଟସ୍ଥ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ଗୁରୁତର ଥିବା କୁହାଯାଉଛି। ଚିକିତ୍ସା ପରେ ଅନ୍ୟ ୧୩ ଜଣଙ୍କୁ ଡିସଚାର୍ଜ କରାଯାଇଛି। ସୀମାନ୍ତ ରାଜ୍ୟ ସୋନୋରାର ଓକିଲମାନେ କହିଛନ୍ତି ଯେ, ଏହି ଆକ୍ରମଣ ସିୟୁଡାଡ ଓବ୍ରେଗନ୍ ସହରରେ ଏକ ପାର୍ଟି ସମୟରେ ଘଟିଥିଲା ଯେଉଁଠାରେ ଜଣେ ଗ୍ୟାଙ୍ଗର ସଦସ୍ୟଙ୍କୁ ସନ୍ଦେହ କରାଯାଉଥିଲା।
