ଆପଣଙ୍କୁ ଦୈନିକ କେତେ ଲୁଣ ଖାଇବା ଜରୁରୀ ? ଜାଣନ୍ତୁ ବିଶେଷଜ୍ଞ ରାୟ
ପ୍ରତ୍ୟେକ ଭାରତୀୟ ରୋଷେଇରେ ଲୁଣ ସବୁଠାରୁ ଅଧିକ ବ୍ୟବହୃତ ଜିନିଷ ମଧ୍ୟରୁ ଗୋଟିଏ। ଲୁଣ ବିନା ସବୁ ଖାଦ୍ୟ ସ୍ୱାଦହୀନ ମନେହୁଏ। ଲୁଣ କେବଳ ଖାଦ୍ୟର ସ୍ୱାଦକୁ ବଢାଏ ନାହିଁ, ଏହା ଶରୀର ପାଇଁ ମଧ୍ୟ ଜରୁରୀ। ଯଦି ଲୁଣ ଠିକ ପରିମାଣରେ ଖାଆନ୍ତି, ତେବେ ଏହା ସ୍ୱାସ୍ଥ୍ୟ ପାଇଁ ଅନେକ ଲାଭ ଦେଇଥାଏ। କିନ୍ତୁ, ଏହାକୁ ଅଧିକ ପରିମାଣରେ ଖାଇବା ମଧ୍ୟ କ୍ଷତିକାରକ ହୋଇପାରେ।
ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଅନୁଯାୟୀ, ଦୁନିଆର ଅଧିକାଂଶ ଲୋକ ଦୈନିକ ଆବଶ୍ୟକତାଠାରୁ ଅଧିକ ବା ୯ରୁ ୧୨ ଗ୍ରାମ ଲୁଣ ଖାଇଥା’ନ୍ତି, ଯାହା ସ୍ୱାସ୍ଥ୍ୟ ପାଇଁ ବିପଦଜନକ। ଏହା ଏପରି ଅନେକ ରୋଗର ଆଶଙ୍କା ବଢାଇଥାଏ, ଯାହା ମୃତ୍ୟୁକୁ ମଧ୍ୟ ନିମନ୍ତ୍ରଣ କରିଥାଏ। ଏଭଳି ପରିସ୍ଥିତିରେ ପ୍ରଶ୍ନ ହେଉଛି ଗୋଟିଏ ଦିନରେ ଆମେ କେତେ ଲୁଣ ଖାଇବା ଉଚିତ? କେଉଁ ବୟସରେ କେତେ ଲୁଣ ଖାଇବା ଉଚିତ?
ସମସ୍ତ ବୟସ୍କମାନେ ପ୍ରତିଦିନ ୫ ଗ୍ରାମରୁ କମ୍ ବା ୧ ଚାମଚ ଲୁଣ ଖାଇବା ଉଚିତ। ବାସ୍ତବରେ, ଅଧିକ ଲୁଣ ଖାଇବା ଦ୍ୱାରା ଉଚ୍ଚ ରକ୍ତଚାପ ଏବଂ ହୃଦ୍ରୋଗ ହେବାର ଆଶଙ୍କା ବଢିଯାଏ। ଏଭଳି ପରିସ୍ଥିତିରେ ଲୋକମାନେ ସେମାନଙ୍କର ଲୁଣ ଗ୍ରହଣକୁ ନିୟନ୍ତ୍ରଣ କରିବା ଉଚିତ। ଏହା ବ୍ୟତୀତ ଜଙ୍କ୍ ଫୁଡ୍ ଏବଂ ସ୍ନାକ୍ସରେ ଅଧିକ ପରିମାଣର ଲୁଣ ରହିଥାଏ, ଯାହାକୁ ଯଥାସମ୍ଭବ ଏଡାଇବା ଉଚିତ।
ତେବେ ଆସନ୍ତୁ କେଉଁ ବୟସରେ କେତେ ଲୁଣ ଖାଇବା ଜରୁରୀ ତାହା ଜାଣିନେବା।
୦ ରୁ ୬ ମାସର ଶିଶୁ:
ବିଶେଷଜ୍ଞଙ୍କ ଅନୁଯାୟୀ, ଅଧିକାଂଶ ଲୋକ ଲୁଣ ବିଷୟରେ ଅଜ୍ଞ ଥାଆନ୍ତି। ୬ ମାସ ଭିତରେ ପିଲାମାନଙ୍କୁ ଲୁଣିଆ ଖାଦ୍ୟ ଦେବାର କୌଣସି ଆବଶ୍ୟକତା ନାହିଁ। ଯଦି ପିଲା ଖାଦ୍ୟ ଗ୍ରହଣ ନକରେ ତେବେ କେବଳ ଅଳ୍ପ ପରିମାଣର ଲୁଣ ମିଶାଇବା ଉଚିତ।
୬ ରୁ ୧ ବର୍ଷର ଶିଶୁ:
ପିଲାମାନଙ୍କୁ ୬ ମାସ ହେବା ପରେ ଧୀରେ ଧୀରେ ସେମାନଙ୍କ ଖାଦ୍ୟରେ ଲୁଣ ମିଶାଇବା ଆରମ୍ଭ କରିବା ଉଚିତ। କିନ୍ତୁ, ମନେରଖନ୍ତୁ ଯେ ପିଲାଟି ଏକ ବର୍ଷ ନ ହେବା ପର୍ଯ୍ୟନ୍ତ ପ୍ରତିଦିନ କେବଳ ୧ ଗ୍ରାମ ଲୁଣ ଖାଇବାକୁ ଦିଆଯିବା ଉଚିତ। ଏହା ଅଧିକ ହେଲେ କ୍ଷତିକାରକ ହୋଇପାରେ।
୧ ରୁ ୩ ବର୍ଷର ପିଲା:
ଡାଏଟିସିଆନଙ୍କ ଅନୁଯାୟୀ, ୧ ରୁ ୩ ବର୍ଷର ପିଲାଙ୍କୁ ପ୍ରତିଦିନ ୨ ଗ୍ରାମ ପର୍ଯ୍ୟନ୍ତ ଲୁଣ ଦିଆଯାଇପାରେ। ଏହି ପରିମାଣ ସେମାନଙ୍କ ସ୍ୱାସ୍ଥ୍ୟ ପାଇଁ ଲାଭଦାୟକ ଅଟେ। ଏହାଠାରୁ ଅଧିକ ପରିମାଣ ଦେବା ଠାରୁ ଦୂରେଇ ରହିବା ଉଚିତ।
୪ ରୁ ୧୦ ବର୍ଷର ପିଲା:
ଯେତେବେଳେ ପିଲାଟି ୪ ବର୍ଷର ହୋଇଯାଏ, ତାଙ୍କ ଖାଦ୍ୟରେ ଲୁଣର ପରିମାଣ ବଢିବା ଉଚିତ। କିନ୍ତୁ ମନେରଖନ୍ତୁ ଯେ ୧୦ ବର୍ଷ ବୟସ ପର୍ଯ୍ୟନ୍ତ ଲୁଣର ପରିମାଣ ୩ ଗ୍ରାମରୁ ଅଧିକ ହେବା ଉଚିତ ନୁହେଁ।
୧୦ ବର୍ଷରୁ ଅଧିକ:
ଲୁଣ ସ୍ୱାସ୍ଥ୍ୟ ପାଇଁ ଯେତିକି ଉପକାରୀ ସେତିକି କ୍ଷତିକାରକ ହୋଇପାରେ। ତେଣୁ, ଏହାକୁ କେବଳ ଉପଯୁକ୍ତ ପରିମାଣରେ ନେବା ଜରୁରୀ। ୧୦ ବର୍ଷ ପରେ, ଯେକୌଣସି ବୟସର ଲୋକମାନେ ପ୍ରତିଦିନ ୫ ଗ୍ରାମ ବା ଗୋଟିଏ ଚା’ ଚାମଚ ଲୁଣ ଖାଇପାରିବେ। ଏହାଠାରୁ ଅଧିକ ଲୁଣ ଖାଇବା ସ୍ୱାସ୍ଥ୍ୟକୁ କ୍ଷତି ପହଞ୍ଚାଏ।
