ପ୍ରଥମେ ସ୍ୱାମୀର ପେଟକୁ ଚିରିଲା, ତା’ପରେ ଏସିଡ୍ ଢାଳି ପୋଡ଼ିଦେଲା

ଉତ୍ତରପ୍ରଦେଶ: ପିଶାଚୀନି ସ୍ତ୍ରୀ, ସ୍ୱାମୀର ପେଟକୁ ଚିରି ଏସିଡ୍ ଢାଳି ପୋଡ଼ିଦେଲା। ଉତ୍ତର ପ୍ରଦେଶର ଆଲିଗଡ଼ରେ ଏଭଳି ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଏଠାରେ ସ୍ତ୍ରୀ ତା ପ୍ରେମିକ ସହ ମିଶି ସ୍ୱାମୀଙ୍କୁ ନିର୍ମମ ଭାବରେ ହତ୍ୟା କରିଛି।

ଏସିଡ ପକେଇ ପୋଡ଼ିଦେଲା: ମୃତକଙ୍କ ନାମ ୟୁସୁଫ୍ ଖାନ(୨୯)। ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ପତ୍ନୀ ତବାସୁମ୍ ଏବଂ ତାଙ୍କ ପ୍ରେମିକ ଦାନିଶ୍ ମିଶି ୟୁସୁଫ୍‌ଙ୍କ ପେଟକୁ ଏକ ଧାରୁଆ ଅସ୍ତ୍ରରେ ଚିରି ଦେଇଥିଲେ ଏବଂ ତାଙ୍କ ପରିଚୟ ଲୁଚାଇବା ପାଇଁ ଏସିଡ୍ ପକାଇ ଶରୀରକୁ ପୋଡ଼ି ଦେଇଥିଲେ।

ଏହି ଘଟଣା ସେତେବେଳେ ଘଟିଥିଲା ଯେତେବେଳେ ୟୁସୁଫ ସବୁଦିନ ପରି ଘରୁ ଟିଫିନ୍ ନେଇ ଶ୍ରମିକ ଭାବରେ କାମ କରିବାକୁ ମଣ୍ଡିକୁ ଯାଇଥିଲେ। ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ସେ ନ ଫେରିବାରୁ ପରିବାର ଲୋକେ ଚିନ୍ତାରେ ପଡ଼ିଥିଲେ।

ପରିବାର ସଦସ୍ୟମାନେ ତାଙ୍କୁ ସବୁଆଡେ ଖୋଜାଖୋଜି କରିଥିଲେ, କିନ୍ତୁ ପାଇ ନଥିଲେ। ମୃତକଙ୍କ ବାପା ଭୁରେ ଖାନ ଥାନାରେ ନିଖୋଜ ରିପୋର୍ଟ ଦାଖଲ କରିଥିଲେ। ପୋଲିସ ମଧ୍ୟ ଖୋଜାଖୋଜି ଆରମ୍ଭ କରିଥିଲା।

ପାଞ୍ଚ ଦିନ ପରେ ମିଳିଲା ମୃତଦେହ: ପାଞ୍ଚ ଦିନ ପରେ କାସଗଞ୍ଜ ଜିଲ୍ଲାର ଥାନା ଧୋଲନା ଅଞ୍ଚଳର ନାଗଲା ଛାଟ୍ ଭଟ୍ଟା ନିକଟରେ ଏକ ପୋଡ଼ା ମୃତଦେହ ମିଳିଥିଲା। ସୂଚନା ପାଇ ଛାରା ପୋଲିସ ଏବଂ ପରିବାର ସଦସ୍ୟ ଘଟଣାସ୍ଥଳରେ ପହଞ୍ଚି ମୃତଦେହକୁ ୟୁସୁଫ୍ ବୋଲି ଚିହ୍ନଟ କରିଥିଲେ। ମୃତଦେହଟି ବିକୃତ ଅବସ୍ଥାରେ ଥିଲା ଏବଂ ମୁହଁ ଏସିଡ୍ ଦ୍ୱାରା ପୋଡ଼ି ଯାଇଥିଲା।

ମୃତକଙ୍କ ଭାଇ ଆମିର କହିଛନ୍ତି ଯେ, ତବାସୁମ ତାଙ୍କ ପ୍ରେମିକ ସହ ମିଶି ଏଭଳି କରିଛନ୍ତି। ପୋଲିସ ପତ୍ନୀ ତବାସୁମଙ୍କୁ ହେପାଜତକୁ ନେଇ ପଚରାଉଚରା କରିଥିଲା, ଯେଉଁଠାରେ ସେ ହତ୍ୟା କରିଥିବା ସ୍ୱୀକାର ମଧ୍ୟ କରିଥିଲେ।

ଅଭିଯୁକ୍ତ ପତ୍ନୀଙ୍କୁ ଜେଲ: ମୃତକଙ୍କ ବାପାଙ୍କ ଅଭିଯୋଗ କ୍ରମେ ଏକ ମାମଲା ରୁଜୁ କରାଯାଇଛି ଏବଂ ଅଭିଯୁକ୍ତ ପତ୍ନୀଙ୍କୁ ଜେଲ ପଠାଯାଇଛି। ସେହି ସମୟରେ, ଅନ୍ୟ ଅଭିଯୁକ୍ତମାନଙ୍କୁ ଖୋଜିବା ପାଇଁ ଏକ ପୋଲିସ ଦଳ ଗଠନ କରାଯାଇଛି ଏବଂ ତଦନ୍ତ ଚାଲିଛି।