ପାକିସ୍ତାନ ଗୁଳିଚାଳନାରେ ରାଜୌରୀରେ ଜଣେ ଅଧିକାରୀଙ୍କ ମୃତ୍ୟୁ, ଶ୍ରୀନଗରରେ ଲଗାତାର ବିସ୍ଫୋରଣର ଶବ୍ଦ
ନୂଆଦିଲ୍ଲୀ : ଜମ୍ମୁ ଓ କଶ୍ମୀରର ରାଜୌରୀ ଜିଲ୍ଲାରେ ପାକିସ୍ତାନର ଗୁଳିଚାଳନା ଓ ଗୋଳାବର୍ଷଣ ଯୋଗୁଁ ଜଣେ ବରିଷ୍ଠ ପ୍ରଶାସନିକ ଅଧିକାରୀଙ୍କ ମୃତ୍ୟୁ ଘଟିଛି। ମୃତ ଅଧିକାରୀ ହେଉଛନ୍ତି ରାଜୌରୀର ଅତିରିକ୍ତ ଜିଲ୍ଲା ଉନ୍ନୟନ କମିଶନର ରାଜ କୁମାର ଥାପା। ଶୁକ୍ରବାର ରାତିରେ ପାକିସ୍ତାନ ପକ୍ଷରୁ ଭାରତୀୟ ସୀମାନ୍ତ ଅଞ୍ଚଳରେ ଭାରୀ ଗୋଳାବର୍ଷଣ ହୋଇଥିଲା, ଯେଉଁଥିରେ ଥାପାଙ୍କ ବାସଭବନ ଉପରେ ଗୋଳା ପଡ଼ିଥିଲା। ଏହି ଆକ୍ରମଣରେ ସେ ଗୁରୁତର ଆହତ ହୋଇଥିଲେ ଏବଂ ପରେ ତାଙ୍କର ମୃତ୍ୟୁ ହୋଇଥିଲା। ଏହା ସହିତ ଅନ୍ୟ ଦୁଇ ନାଗରିକଙ୍କ ମୃତ୍ୟୁ ମଧ୍ୟ ରିପୋର୍ଟ ହୋଇଛି।
ଜମ୍ମୁ ଓ କଶ୍ମୀରର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏହି ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି ଯେ, ଗତକାଲି ଥାପା ଉପ-ମୁଖ୍ୟମନ୍ତ୍ରୀଙ୍କ ସହ ଜିଲ୍ଲା ଗସ୍ତରେ ଯାଇଥିଲେ ଏବଂ ଏକ ଅନଲାଇନ ବୈଠକରେ ମଧ୍ୟ ଅଂଶଗ୍ରହଣ କରିଥିଲେ। ଏହି ଆକ୍ରମଣକୁ ନେଇ ସେ କହିଛନ୍ତି “ଏହା ଏକ ଦୁଃଖଦ ଖବର। ଆମେ ଜମ୍ମୁ ଓ କଶ୍ମୀର ପ୍ରଶାସନର ଜଣେ ନିଷ୍ଠାବାନ ଅଧିକାରୀଙ୍କୁ ହରାଇଛୁ।”
ଏହା ସହିତ, ଶ୍ରୀନଗରରେ ମଧ୍ୟ ଶୁକ୍ରବାର ରାତିରେ ଏବଂ ଶନିବାର ସକାଳେ ଲଗାତାର ବିସ୍ଫୋରଣର ଶବ୍ଦ ଶୁଣାଯାଇଥିଲା। ଶ୍ରୀନଗର ବିମାନବନ୍ଦର ନିକଟରେ ଏବଂ ବାରମୁଲା, ଜମ୍ମୁ ଓ ସାମ୍ବା ଅଞ୍ଚଳରେ ବିସ୍ଫୋରଣ ଘଟିଥିଲା। ସୂଚନା ଅନୁଯାୟୀ, ପାକିସ୍ତାନ ପକ୍ଷରୁ ଡ୍ରୋନ ଆକ୍ରମଣ ହୋଇଥିଲା, ଯାହାକୁ ଭାରତୀୟ ସେନାର ବାୟୁ ପ୍ରତିରକ୍ଷା ବ୍ୟବସ୍ଥା ଦ୍ୱାରା ପ୍ରତିହତ କରାଯାଇଥିଲା। ଏହି ଘଟଣା ଯୋଗୁଁ ଶ୍ରୀନଗର ସମେତ ଅନେକ ଅଞ୍ଚଳରେ ବ୍ଲାକଆଉଟ କରାଯାଇଥିଲା ଏବଂ ଲୋକଙ୍କୁ ଘରେ ରହିବାକୁ ନିର୍ଦ୍ଦେଶ ଦିଆଯାଇଥିଲା।
ପାକିସ୍ତାନର ଏହି ଆକ୍ରମଣକୁ ନେଇ ଭାରତୀୟ ସେନା ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଭାରତୀୟ ସେନା ପାକିସ୍ତାନର ଡ୍ରୋନ ଏବଂ ମିସାଇଲ ଆକ୍ରମଣକୁ ବିଫଳ କରିବା ସହ ପାକିସ୍ତାନର ତିନୋଟି ବାୟୁସେନା ଘାଟି ଉପରେ ମିସାଇଲ ଓ ଡ୍ରୋନ ଆକ୍ରମଣ କରିଥିବା ରିପୋର୍ଟ ମିଳିଛି।