ସ୍ୱାମୀ ଅନ୍ୟ ମହିଳା ସହ ରହିବା ଭୁଲ୍ ନୁହେଁ: ଜାଣନ୍ତୁ କାହିଁକି ଏପରି କହିଲେ ହାଇକୋର୍ଟ
ନୂଆଦିଲ୍ଲର: ସାଧାରଣତଃ କୌଣସି ବିବାହରେ ଟେନସନ ରହିଲେ ମଧ୍ୟ ପତ୍ନୀ କିମ୍ବା ସ୍ୱାମୀ ଆଇନ ଅନୁଯାୟୀ ଅନ୍ୟ ସାଥୀଙ୍କ ସହ ରହିବା ଠିକ୍ ବିବେଚନା କରାଯାଏ ନାହିଁ । କିନ୍ତୁ ସମାନ ମାମଲାରେ ଦିଲ୍ଲୀ ହାଇକୋର୍ଟ ସ୍ୱାମୀଙ୍କୁ ନ୍ୟାୟ ପ୍ରଦାନ କରିଥିଲେ ଏବଂ ଏହାକୁ ପତ୍ନୀଙ୍କ ପ୍ରତି କ୍ରୁରତା ବୋଲି ବିବେଚନା କରିନଥିଲେ ।
ମାନବିକ ଦିଗକୁ ଦୃଷ୍ଟିରେ ରଖି କୋର୍ଟ ଏହାର ନିଷ୍ପତ୍ତି ଦେଇଛନ୍ତି । ଆଇପିସିର ଧାରା ୪୯୪ରେ ହିନ୍ଦୁ ବିବାହ ଅଧିନିୟମ ଅନୁଯାୟୀ, କୌଣସି ପୁରୁଷ ବା ମହିଳା ନିଜ ଜୀବନସାଥୀଙ୍କ ଜୀବତି ରହିବା ଅବସ୍ଥାରେ ଦ୍ୱିତୀୟ ବିବାହ କରିବା ଅପରାଧ । ଏଥିପାଇଁ ସ୍ୱାମୀ କିମ୍ବା ପତ୍ନୀଙ୍କ ଅନୁମତି ଦେଲେ ବି ଆଇନ ଅନୁସାରେ ଏହା ଅପରାଧ ।
ଘଟଣା କଣ?
ଜଣେ ମହିଳା ତାଙ୍କ ସ୍ୱାମୀଙ୍କ ବିରୋଧରେ ଦିଲ୍ଲୀ ହାଇକୋର୍ଟରେ ମାମଲା ଦାୟର କରିଥିଲେ, ଯେଉଁଥିରେ ତାଙ୍କ ସ୍ୱାମୀ ଅନ୍ୟ ଜଣେ ମହିଳାଙ୍କ ସହ ରହୁଥିବା ଅଭିଯୋଗ କରିଥିଲେ । ଏହି ମହିଳା ୨୦୦୩ ରେ ବିବାହ କରିଥିଲେ, କିନ୍ତୁ ୨୦୦୫ ରେ ଉଭୟ ଅଲଗା ରହିବା ଆରମ୍ଭ କରିଥିଲେ । ଏଥିସହ ସ୍ୱାମୀ ଅଭିଯୋଗ କରିଛନ୍ତି ଯେ, ପତ୍ନୀ ତାଙ୍କ ପ୍ରତି ନିଷ୍ଠୁର ଥିଲେ ଏବଂ ତାଙ୍କୁ ତାଙ୍କ ଭାଇ ଏବଂ ସମ୍ପର୍କୀୟମାନେ ମଧ୍ୟ ମାଡ ମାରିଥିଲେ ।
ଏହି ମାମଲାରେ ପତ୍ନୀ ତାଙ୍କ ସ୍ୱାମୀଙ୍କ ବିରୋଧରେ ଅଭିଯୋଗ କରିଛନ୍ତି ଯେ, ତାଙ୍କ ପରିବାର ଭବ୍ୟ ଭାବରେ ସେମାନଙ୍କ ବିବାହର ଆୟୋଜନ କରିଥିଲେ । ଏହା ସତ୍ୱେ ସ୍ୱାମୀ ତାଙ୍କ ପରିବାରରୁ ଅନେକ ପ୍ରକାରର ଡିମାଣ୍ଡ କରିଥିଲେ । ସେ ଆହୁରି ମଧ୍ୟ କହିଛନ୍ତି ଯେ, ତାଙ୍କ ଶାଶୁ ତାଙ୍କୁ କିଛି ମେଡିସିନ୍ ଦେଇଥିଲେ, ଯାହାକୁ ଖାଇବା ଦ୍ୱାରା ପୁଅ ଜନ୍ମ ହେବ ବୋଲି କହିଥିଲେ । କିନ୍ତୁ ସେମାନଙ୍କର ଉଦ୍ଦେଶ୍ୟ ଥିଲା ଗର୍ଭପାତ କରିବା । ଅବଶ୍ୟ ଏହି ଦମ୍ପତିଙ୍କର ଦୁଇଟି ପୁଅ ଅଛନ୍ତି ।
କୋର୍ଟ ଏପରି ନିଷ୍ପତ୍ତି କାହିଁକି ଶୁଣାଇଛନ୍ତି?
ମାମଲାର ଶୁଣାଣି ସମୟରେ ଏହି ଘଟଣା ସାମ୍ନାକୁ ଆସିଥିଲା ଯେ ଉଭୟେ ଦୀର୍ଘ ବର୍ଷ ଧରି ଅଲଗା ରହୁଥିଲେ । ଏହି ସମୟ ମଧ୍ୟରେ ସ୍ୱାମୀ ଅନ୍ୟ ଜଣେ ମହିଳାଙ୍କ ସହ ରହିବା ଆରମ୍ଭ କରି ଦେଇଥିଲେ । ଏଭଳି ପରିସ୍ଥିତିରେ ଦିଲ୍ଲୀ ହାଇକୋର୍ଟ କହିଛନ୍ତି ଯେ, ଯଦି ଏକ ଦମ୍ପତି ଦୀର୍ଘ ଦିନ ଧରି ପରସ୍ପର ସହ ନରୁହନ୍ତି, ତେବେ ପୁନର୍ବାର ମିଶିବାର କୌଣସି ସମ୍ଭାବନା ନାହିଁ । ଏହି ପରିସ୍ଥିତିରେ ଯଦି ସ୍ୱାମୀ ଅନ୍ୟ ମହିଳାଙ୍କ ସହ ଶାନ୍ତିପୂର୍ଣ୍ଣ ଭାବରେ ଜୀବନଯାପନ ଆରମ୍ଭ କରନ୍ତି, ତେବେ ଏହାକୁ କ୍ରୁରତା କୁହାଯାଇପାରିବ ନାହିଁ ।
କୋର୍ଟ ମହିଳାଙ୍କୁ ନିଷ୍ଠୁର ବୋଲି ବିବେଚନା କରିଥିଲେ :-
କୋର୍ଟ ଏହା ମଧ୍ୟ କହିଛନ୍ତି ଯେ, ଯଦିଓ ପତ୍ନୀ ଦାବି କରିଥିଲେ ଯେ ଯୌତୁକ ପାଇଁ ତାଙ୍କୁ ନିର୍ଯ୍ୟାତନା ଦିଆଯାଉଥିଲା ଏବଂ ତାଙ୍କୁ କ୍ରୁରତାର ଶିକାର ହେବାକୁ ପଡ଼ିଥିଲା, କିନ୍ତୁ ସେ ତାଙ୍କ ଦାବିକୁ ପ୍ରମାଣ କରିପାରିନଥିଲେ ଏବଂ ଏହା ଏକ କ୍ରୁରତା କାର୍ଯ୍ୟ ।