ସଂସଦର ସୁରକ୍ଷାରେ ବଡ଼ ଭୁଲ୍; ନକଲି ଆଧାର କାର୍ଡ ମାଧ୍ୟମରେ ପ୍ରବେଶ କରିବାକୁ ଉଦ୍ୟମ, ତିନି ଗିରଫ

ନୂଆଦିଲ୍ଲୀ : ସଂସଦ ଭବନରେ ବେଆଇନ ଭାବେ ପ୍ରବେଶ କରିବାକୁ ଉଦ୍ୟମ କରୁଥିବା ଅଭିଯୁକ୍ତଙ୍କୁ ଗିରଫ କରାଯାଇଛି । ଅଧିକାରୀଙ୍କ ଅନୁଯାୟୀ, ତିନିଜଣ ଅଭିଯୁକ୍ତ ନକଲି ଆଧାର କାର୍ଡ ବ୍ୟବହାର କରି ସଂସଦ ଗୃହରେ ପ୍ରବେଶ କରିବାକୁ ଚେଷ୍ଟା କରିଥିଲେ ଏବଂ ସୁରକ୍ଷା କର୍ମୀମାନେ ସେମାନଙ୍କୁ ଧରିଥିଲେ ।

ଦିଲ୍ଲୀ ପୋଲିସ ତିନି ଜଣଙ୍କୁ ଗିରଫ କରିଛି, ଯେଉଁମାନେ କାସିମ, ମୋନିସ ଏବଂ ସୋଏବ ବୋଲି ଚିହ୍ନଟ ହୋଇଛନ୍ତି । ସେମାନଙ୍କ ଉପରେ ଜାଲିଆତି ଏବଂ ଠକେଇ ସହ ଜଡିତ ଭାରତୀୟ ଦଣ୍ଡବିଧି ସଂହିତା (ଆଇପିସି) ର ବିଭିନ୍ନ ଧାରା ଅନୁସାରେ ଅଭିଯୋଗ ଲଗାଯାଇଛି । ସୂଚନାଯୋଗ୍ୟ ଯେ ଗତ ଗୁରୁବାର ଦିନ ସେ ଏକ ନକଲି ଆଧାର କାର୍ଡ ବ୍ୟବହାର କରି ସଂସଦରେ ପ୍ରବେଶ କରିଥିଲେ କିନ୍ତୁ ସିଏସ୍ଏଫ୍ କର୍ମଚାରୀମାନେ ତାଙ୍କୁ ଧରିପକାଇଥିଲେ ।

ସୁରକ୍ଷାରେ କେମିତି ହେଲା ଭୁଲ୍ ?

ସୂଚନାନୁସାରେ, ମଙ୍ଗଳବାର ନିୟମିତ ସୁରକ୍ଷା ଏବଂ ପରିଚୟ ଯାଞ୍ଚ ସମୟରେ ସିଏସଏଫ୍ କର୍ମଚାରୀମାନେ ସଂସଦ ଗୃହର ଫ୍ଲାପ୍ ଗେଟ୍ ପ୍ରବେଶ ଦ୍ୱାରରେ ୩ ଜଣଙ୍କୁ ଅଟକାଇଥିଲେ ଓ ଗିରଫ କରିଥିଲେ । ଅଧିକ ଅନୁସନ୍ଧାନରେ, ସିଏସଏଫ୍ ଜାଣିବାକୁ ପାଇଲା ଯେ ସେମାନଙ୍କର ଆଧାର କାର୍ଡ ନକଲି । ସିଆରପିଏଫ୍ ଏବଂ ଦିଲ୍ଲୀ ପୋଲିସ୍ କଣ୍ଟିଜେଣ୍ଟସ୍ ସ୍ଥାନରେ ସିଆଇଏସଏଫ ଦ୍ୱାରା ସଂସଦ କମ୍ପେ୍ଲକ୍ସର ସମ୍ପୂର୍ଣ୍ଣ ସୁରକ୍ଷା ଦାୟିତ୍ୱ ଗ୍ରହଣ କରିବା ପରେ ଏହି ଘଟଣା ଘଟିଥିଲା ।

ଗିରଫ ତିନିଜଣ ବ୍ୟକ୍ତି ଡିଭି ପ୍ରୋଜେକ୍ଟ ଲିମିଟେଡ୍ ଦ୍ୱାରା ନିୟୋଜିତ ହୋଇଥିଲେ, ଯାହାକୁ ସଂସଦ କମ୍ପେ୍ଲକ୍ସ ଭିତରେ ସାଂସଦଙ୍କ କୋଠରୀ ନିର୍ମାଣ ପାଇଁ ଚୁକ୍ତିନାମା ଦିଆଯାଇଥିଲା ।