ଟ୍ରମ୍ପଙ୍କୁ ଶୁଭେଚ୍ଛା ଜଣାଇଲେ ମୋଦୀ, କହିଲେ ଆମେ ପୁଣି ଏକାଠି ହୋଇ…

ନୂଆଦିଲ୍ଲୀ/ୱାଶିଂଟନ,୨୦ା୧: ସୋମବାର ଆମେରିକାର ୪୭ତମ ରାଷ୍ଟ୍ରପତି ଭାବେ ଡୋନାଲ୍ଡ ଟ୍ରମ୍ପ ଶପଥ ନେଇଛନ୍ତି । ଏହି ଅବସରରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁଭେଚ୍ଛା ଜଣାଇଛନ୍ତି ।  ‘ଏକ୍ସ’ରେ ମୋଦୀ ଲେଖିଛନ୍ତି, ‘ମୋର ପ୍ରିୟ ମିତ୍ର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଯୁକ୍ତରାଷ୍ଟ୍ର ଆମେରିକାର ୪୭ତମ ରାଷ୍ଟ୍ରପତି ରୂପେ ଆପଣଙ୍କ ଐତିହାସିକ ଉନ୍ମୋଚନ ଅବସରରେ ବଧେଇ! ମୁଁ ପୁଣିଥରେ ଏକାଠି ମିଶି କାମ କରିବାକୁ ଉଭୟ ଦେଶଙ୍କୁ ଲାଭାନ୍ୱିତ କରିବାକୁ  ଓ ବିଶ୍ୱ ନିମନ୍ତେ ଆହୁରି ଭଲ ଭବିଷ୍ୟକୁ ଆକାର ଦେବା ପାଇଁ ତତ୍ପର। ଆଗାମୀ ସଫଳ କାର୍ଯ୍ୟକାଳ ନିମନ୍ତେ ଶୁଭକାମନା’।

ଅନ୍ୟପକ୍ଷରେ ଭାରତ ପକ୍ଷରୁ ବୈଦେଶିକ ମନ୍ତ୍ରୀ ମନ୍ତ୍ରୀ ଏସ୍ ଜୟଶଙ୍କର ଏହି କାର୍ଯ୍ୟରେ ଭାଗ ନେବାକୁ ଆମେରିକାରେ ପହଞ୍ଚିଛନ୍ତି। ଜୟଶଙ୍କର ପ୍ରଧାନମନ୍ତ୍ରୀ  ମୋଦୀଙ୍କଠାରୁ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିକଟକୁ ଏକ ଚିଠି ନେଇଛନ୍ତି। ଜୟଶଙ୍କର ପ୍ରଧାନମନ୍ତ୍ରୀଙ୍କ ସ୍ୱତନ୍ତ୍ର ଦୂତ ରୂପେ ଆମେରିକାରେ ତାଙ୍କର ପ୍ରତିନିଧିତ୍ୱ କରୁଛନ୍ତି।

ସେହିପରି ଭାରତୀୟ ଶିଳ୍ପପତି ମୁକେଶ ଅମ୍ବାନୀ ଏବଂ ତାଙ୍କ ପତ୍ନୀ ନୀତା ଅମ୍ବାନୀ ମଧ୍ୟ ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ସମାରୋହରେ ପହଞ୍ଚିଛନ୍ତି, ତାଙ୍କୁ ଏକ ପ୍ରମୁଖ ସ୍ଥାନ ଦିଆଯିବ। ପୁଣେ ଭିତ୍ତିକ ରିଏଲ୍ ଇଷ୍ଟେଟ୍ ସଂସ୍ଥା କୁନ୍ଦନ ସ୍ପେସ୍ ର ପରିଚାଳନା ନିର୍ଦ୍ଦେଶକ ଆଶିଷ ଜେନା ମଧ୍ୟ ଭାରତୀୟ ବ୍ୟବସାୟ ଜଗତରୁ ଅଂଶଗ୍ରହଣ କରିଥିଲେ। ଏହା ସହିତ ଗୁଗୁଲର ସିଇଓ ସୁନ୍ଦର ପିଚାଇ ମଧ୍ୟ ଏଥିରେ ଭାଗ ନେଇଛନ୍ତି।