ଏଣିକି ନକଲି ନୋଟ୍ କାରବାର ହେବ ଆତଙ୍କବାଦୀ ଗତିବିଧି; କେନ୍ଦ୍ର ସରକାର
ନୂଆଦିଲ୍ଲୀ: କେନ୍ଦ୍ର ସରକାର ମଙ୍ଗଳବାର ‘ଆତଙ୍କବାଦୀ କାର୍ଯ୍ୟ’ର ଆଇନଗତ ସଂଜ୍ଞାକୁ ସଂଶୋଧନ କରିଛନ୍ତି। ନୂଆ କ୍ରିମିନାଲ୍ କୋଡ୍ ରେ ନକଲି ନୋଟ୍ ଚଳାଇବା ଓ ସରକାରଙ୍କୁ ଧମକ ଦେବା ପାଇଁ ଅପହରଣ କରିବା, କାହାକୁ ଆହତ କରିବା ଏବଂ ତାଙ୍କ ମୃତ୍ୟୁ ଘଟାଇବା ମଧ୍ୟ ଆତଙ୍କବାଦ ଶ୍ରେଣୀରେ ରହିବ। ଏହା ସହିତ ନିଷ୍ଠୁରତାକୁ ପୁନଃବ୍ୟାଖ୍ୟା କରାଯାଇଛି, ଯେଉଁଥିରେ ମହିଳାଙ୍କ ମାନସିକ ସ୍ୱାସ୍ଥ୍ୟକୁ କ୍ଷତି ପହଞ୍ଚାଇବା ଅନ୍ତର୍ଭୁକ୍ତ ।
ଅର୍ଥନୈତିକ ନିରାପତ୍ତା ପ୍ରତି ବିପଦ ସୃଷ୍ଟି କରୁଥିବା ନକଲି ମୁଦ୍ରା କାରବାରକୁ ଏବେ ଆତଙ୍କବାଦୀ କାର୍ଯ୍ୟ ଭାବେ ବିବେଚନା କରାଯିବ। ଏଥିସହ ସରକାରଙ୍କୁ ଧମକ ଦେବା ପାଇଁ ଜଣେ ବ୍ୟକ୍ତିଙ୍କୁ ଅପହରଣ କରିବା ମଧ୍ୟ ଏକ ଆତଙ୍କବାଦୀ କାର୍ଯ୍ୟ ବୋଲି ବିବେଚନା କରାଯାଏ।
ଭାରତୀୟ ନ୍ୟାୟ କୋଡ୍ ବା ବିଏନ୍ଏସ୍ରେ ସରକାର ଦୁଇଟି ନୂଆ ଧାରା ଯୋଡ଼ିଛନ୍ତି, ଯାହା କି କ୍ରିମିନାଲ ପ୍ରୋସିଜର କୋଡ୍ ସମେତ ପ୍ରଚଳିତ ଅପରାଧିକ ଆଇନକୁ ବଦଳାଇବା ପାଇଁ ପ୍ରଣୟନ କରାଯାଇଥିବା ତିନୋଟି ବିଲ୍ ମଧ୍ୟରୁ ଗୋଟିଏ। ଏହି ଆଇନର ଧାରା ୮୬ ରେ ମହିଳାଙ୍କ ମାନସିକ ସ୍ୱାସ୍ଥ୍ୟକୁ ନଷ୍ଟ କରିବା ପାଇଁ “ନିଷ୍ଠୁରତା”କୁ ବର୍ଣ୍ଣନା କରାଯାଇଛି । ବିଲ୍ ର ପୂର୍ବ ସଂସ୍କରଣରେ ଧାରା ୮୫ ରେ ପତ୍ନୀଙ୍କ ପ୍ରତି ଅତ୍ୟାଚାର ପାଇଁ ଦୋଷୀ ସାବ୍ୟସ୍ତ ସ୍ୱାମୀ କିମ୍ବା ତାଙ୍କ ପରିବାର ସଦସ୍ୟଙ୍କୁ ୩ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡର ବ୍ୟବସ୍ଥା ରହିଛି।
ତେବେ ଏଥିରେ ନିଷ୍ଠୁର ଆଚରଣକୁ ବ୍ୟାଖ୍ୟା କରାଯାଇ ନାହିଁ। ଏହାକୁ ବର୍ତ୍ତମାନ ଅନ୍ତର୍ଭୁକ୍ତ କରାଯାଇଛି ଏବଂ ଏହି ସଂଜ୍ଞା ମହିଳାଙ୍କ ମାନସିକ ସ୍ୱାସ୍ଥ୍ୟ ସହିତ ତାଙ୍କ ଶାରୀରିକ ସ୍ୱାସ୍ଥ୍ୟ ପର୍ଯ୍ୟନ୍ତ ବିସ୍ତାରିତ ହୋଇଛି । ଏହି ବିଲ୍ ରେ ଯୌନ ନିର୍ଯାତନାର ଶିକାର ହୋଇଥିବା ବ୍ୟକ୍ତିଙ୍କୁ ତାଙ୍କ ବିନା ସମ୍ମତିରେ ଅଦାଲତ ପ୍ରକ୍ରିୟା ମାଧ୍ୟମରେ ନିଜର ପରିଚୟ ପ୍ରକାଶ କରିବା ପାଇଁ ୨ ବର୍ଷ ଜେଲ୍ ଦଣ୍ଡର ବ୍ୟବସ୍ଥା ରହିଛି।
