ଗୋଟିଏ ପିଲା ହେଲେ ଠିକ୍ ଅଛି, ଅଧିକ ହେଲେ ଏହି ସବୁ ସୁବିଧାରୁ ବଞ୍ଚିତ ହେବେ; ସରକାରଙ୍କ ନୂଆ ଫର୍ମୁଲା
ନୂଆଦିଲ୍ଲୀ: ଯୋଗୀ ସରକାର ଉତ୍ତରପ୍ରଦେଶର ଜନସଂଖ୍ୟା ନିୟନ୍ତ୍ରଣ ଆଇନ ସମ୍ବନ୍ଧରେ ଏକ ସୂତ୍ର ପ୍ରସ୍ତୁତ କରିଛନ୍ତି । ଏହା ଅନୁଯାୟୀ ଯେଉଁମାନଙ୍କର ଦୁଇରୁ ଅଧିକ ସନ୍ତାନ ଅଛନ୍ତି, ସେମାନେ ସରକାରୀ ଚାକିରୀ ପାଇଁ ଯୋଗ୍ୟ ହେବେ ନାହିଁ ଓ ସେମାନେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ। ବାସ୍ତବରେ, ଉତ୍ତରପ୍ରଦେଶର ରାଜ୍ୟ ଆଇନ ଆୟୋଗ ପରାମର୍ଶ ଦେଇଛନ୍ତି ଯେ ଗୋଟିଏ ଶିଶୁର ନୀତି ଆପଣେଇଥିବା ପିତାମାତାଙ୍କୁ ଅନେକ ସୁବିଧା ଦିଆଯାଉ । ସେହିପରି ଦୁଇରୁ ଅଧିକ ପିଲାଙ୍କ ପିତାମାତା ସରକାରୀ ଚାକିରୀରୁ ବଞ୍ଚିତ ହେବା ଉଚିତ୍। ଖାଲି ସେତିକି ନୁହେଁ ଅନ୍ୟାନ୍ୟ ସୁବିଧାରୁ ମଧ୍ୟ ବଞ୍ଚିତ ରଖିବା ପାଇଁ ସୁପାରିଶ କରାଯାଇଛି ।
ସୂଚନାଯୋଗ୍ୟ, ଉତ୍ତରପ୍ରଦେଶ ରାଜ୍ୟ ଆଇନ ଆୟୋଗ ଜନସଂଖ୍ୟା ନିୟନ୍ତ୍ରଣ ଆଇନର ଡ୍ରାଫ୍ଟରେ ଏଭଳି ଅନେକ ପ୍ରସ୍ତାବ ଦେଇଛନ୍ତି। ଏହି ଡ୍ରାଫ୍ଟ ଉପରେ ଆୟୋଗ ଲୋକଙ୍କ ଠାରୁ ଆପତ୍ତି ଏବଂ ପରାମର୍ଶ ଲୋଡିଛନ୍ତି, ଯାହା ଜୁଲାଇ ୧୯ ସୁଦ୍ଧା ଇ-ମେଲ ([email protected]) କିମ୍ବା ଡାକ ମାଧ୍ୟମରେ ଆୟୋଗକୁ ପଠାଯାଇପାରିବ। ଯଦି ଯୋଗୀ ସରକାର ଏହି ସୂତ୍ରକୁ ସବୁଜ ସଙ୍କେତ ଦିଅନ୍ତି, ତେବେ ୟୁପିରେ ଜନସଂଖ୍ୟା ନିୟନ୍ତ୍ରଣ ଦିଗରେ ଏହା ଏକ ବଡ ପଦକ୍ଷେପ ବୋଲି ବିବେଚନା କରାଯିବ ।
ରାଜ୍ୟ ଆଇନ ଆୟୋଗର ଅଧ୍ୟକ୍ଷ ଜଷ୍ଟିସ ଏଏନ୍ ମିତ୍ତଲଙ୍କ ନିର୍ଦ୍ଦେଶରେ ଏହି ଡ୍ରାଫ୍ଟ ପ୍ରସ୍ତୁତ କରାଯାଇଛି। ଆପତ୍ତି ଏବଂ ପରାମର୍ଶ ଅଧ୍ୟୟନ କରିବା ପରେ ଏକ ସଂଶୋଧିତ ଡ୍ରାଫ୍ଟ ପ୍ରସ୍ତୁତ ହୋଇ ରାଜ୍ୟ ସରକାରଙ୍କ ନିକଟରେ ଦାଖଲ କରାଯିବ। ଦେଶର ଅନ୍ୟ ରାଜ୍ୟରେ ପ୍ରଯୁଜ୍ୟ ନିୟମ ଅଧ୍ୟୟନ କରିବା ପରେ ଏହି ଡ୍ରାଫ୍ଟ ପ୍ରସ୍ତୁତ କରାଯାଇଛି । ଏହା ଉତ୍ତରପ୍ରଦେଶ ଜନସଂଖ୍ୟା (ନିୟନ୍ତ୍ରଣ, ସ୍ଥିରତା ଏବଂ କଲ୍ୟାଣ) ଅଧିନିୟମ ୨୦୨୧ ଭାବରେ ଜଣାଶୁଣା ଏବଂ ଏହା ୨୧ ବର୍ଷରୁ ଅଧିକ ଯୁବକ ଏବଂ ୧୮ ବର୍ଷରୁ ଅଧିକ ବାଳିକାମାନଙ୍କ ପାଇଁ ଲାଗୁ ହେବ ଜ୍ଝ ଏହି ଡ୍ରାଫ୍ଟ ଆୟୋଗର ୱେବସାଇଟରେ ଅପଲୋଡ୍ ହୋଇଛି (upslc.upsdc.gov.in) ।
ୱାନ୍ ଚାଇଲ୍ଡ ପଲିସି ଗ୍ରହଣ କରୁଥିବା ବିପିଏଲ ବର୍ଗର ପିତାମାତାଙ୍କୁ ବିଶେଷ ଉତ୍ସାହିତ କରିବା ପାଇଁ ପ୍ରସ୍ତାବ ଦିଆଯାଇଛି । ଏହା ଅଧୀନରେ, ଯେଉଁ ପିତାମାତାମାନେ ପ୍ରଥମ ସନ୍ତାନର ଜନ୍ମ ପରେ ଅପରେସନ୍ କରିବେ, ସେମାନଙ୍କୁ ଅନେକ ସୁବିଧା ଦିଆଯିବ । ପ୍ରଥମ ସନ୍ତାନ ଯଦି ପୁଅ ହୁଏ ତେବେ ୮୦ ହଜାର ଟଙ୍କା ଦିଆଯିବାକୁ ଥିବା ବେଳେ ଝିଅ ହେଲେ ୧ଲକ୍ଷ ଟଙ୍କା ପ୍ରଦାନ କରାଯିବ । ଏହିପରି ଭାବରେ ପିତାମାତା ଝିଅର ଉଚ୍ଚଶିକ୍ଷା ପର୍ୟ୍ୟନ୍ତ ମାଗଣାରେ ଅଧ୍ୟୟନ କରିବାକୁ ସକ୍ଷମ ହୋଇପାରିବେ ଏବଂ ପୁଅକୁ ୨୦ ବର୍ଷ ପାଇଁ ମାଗଣା ଶିକ୍ଷା ଦେଇପାରିବେ । ଏହା ବ୍ୟତୀତ ସରକାରୀ ଚାକିରି କ୍ଷେତ୍ରରେ ଥିବା ସମୟରେ ସେମାନଙ୍କୁ ଦୁଇଟି ଇନକ୍ରିମେଣ୍ଟ ଦିଆଯିବ ଏବଂ ମାଗଣା ଚିକିତ୍ସା ସୁବିଧା ମଧ୍ୟ ମିଳିବ ।
ଦୁଇରୁ ଅଧିକ ପିଲାଙ୍କ ପିତାମାତାଙ୍କୁ ବିଭିନ୍ନ ସୁବିଧାରୁ ବଞ୍ଚିତ ରଖିବାକୁ ଆୟୋଗ ପ୍ରସ୍ତାବ ଦେଇଛନ୍ତି। ଏଥିରେ ସେମାନଙ୍କୁ ସ୍ଥାନୀୟ ସଂସ୍ଥାରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ନଦେବା, ସରକାରଙ୍କ ଠାରୁ ସବସିଡି ବନ୍ଦ କରିବା, ସରକାରୀ ଚାକିରୀ ପାଇଁ ଆବେଦନ ବନ୍ଦ କରିବା ଏବଂ ସରକାରୀ ଚାକିରି କରୁଥିବା ଲୋକଙ୍କୁ ପଦୋନ୍ନତିରୁ ବଞ୍ଚିତ ରଖିବା ଭଳି ପ୍ରସ୍ତାବ ଦିଆଯାଇଛି। ଜନସଂଖ୍ୟା ବୃଦ୍ଧିକୁ ନିୟନ୍ତ୍ରଣ କରି ନାଗରିକମାନଙ୍କୁ ଉନ୍ନତ ସୁବିଧା ଯୋଗାଇଦେବା ଲକ୍ଷ୍ୟରେ ଏହି ସମସ୍ତ ପ୍ରସ୍ତାବ ପ୍ରସ୍ତୁତ କରାଯାଇଛି। ବିଦ୍ୟାଳୟରେ ଜନସଂଖ୍ୟା ନିୟନ୍ତ୍ରଣ ସହ ଜଡିତ ପାଠ୍ୟକ୍ରମ ଶିକ୍ଷା ଦିଆଯିବା ଉଚିତ ବୋଲି ଆୟୋଗ ପରାମର୍ଶ ଦେଇଛନ୍ତି।
