ପାକିସ୍ତାନ ସରକାର ନେଲେ ବଡ଼ ନିଷ୍ପତ୍ତି, ହିନ୍ଦୁ-ଶିଖ୍ ମନ୍ଦିର ପାଇଁ କଲେ ବଡ଼ କାମ, ସାରା ବିଶ୍ୱ ଚକିତ
ଇସଲାମାବାଦ,୧୩ା୩: ପ୍ରତିଦିନ ପାକିସ୍ତାନରୁ ହିନ୍ଦୁ ମନ୍ଦିର ଏବଂ ଗୁରୁଦ୍ୱାର ଉପରେ ଆକ୍ରମଣ ହେବାର ଖବର ଆସୁଛି। ଏହି ସମୟରେ ପାକିସ୍ତାନ ସରକାର ଏଭଳି ଏକ ନିଷ୍ପତ୍ତି ନେଇଛନ୍ତି, ଯାହା ଜାଣି ସମସ୍ତେ ଚକିତ ହୋଇଯାଇଛନ୍ତି। ହୋଲି ପୂର୍ବରୁ ପାକିସ୍ତାନର ଶେହବାଜ ସରକାର ସାରା ଦେଶରେ ମନ୍ଦିର ଏବଂ ଗୁରୁଦ୍ୱାରର ବିକାଶ ପାଇଁ ୩୦ କୋଟି ଟଙ୍କା ଆବଣ୍ଟନ କରି ସାରା ବିଶ୍ୱ ଚକିତ କରି ଦେଇଛନ୍ତି। ମନ୍ଦିର ଏବଂ ଗୁରୁଦ୍ୱାରର ସୌନ୍ଦର୍ଯ୍ୟକରଣ ପାଇଁ ପାକିସ୍ତାନ ସରକାର ଏହି ନିଷ୍ପତ୍ତି ନେଇଛନ୍ତି। ସୋସିଆଲ ମିଡିଆରେ ପାକିସ୍ତାନର ଏହି ପଦକ୍ଷେପକୁ ପ୍ରଶଂସା କରାଯାଉଛି।
ମନ୍ଦିର-ଗୁରୁଦ୍ୱାର ପାଇଁ ୩୦ କୋଟି ଟଙ୍କା ବଜେଟ୍ ଆବଣ୍ଟନ
ରିପୋର୍ଟ ଅନୁଯାୟୀ, ପାକିସ୍ତାନ ସରକାରଙ୍କ ଇଭାକ୍ୟୁ ଟ୍ରଷ୍ଟ ପ୍ରପର୍ଟି ବୋର୍ଡ (ଇଟିପିବି) ବିଭାଗର ଅତିରିକ୍ତ ସଚିବ ସଇଫୁଲ୍ଲା ଖୋଖର କହିଛନ୍ତି ଯେ, ଲାହୋରର ଇଟିପିବି ମୁଖ୍ୟାଳୟରେ ବୁଧବାର ଅନୁଷ୍ଠିତ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏହି ସଭାରେ ପାକିସ୍ତାନ ଶିଖ ଗୁରୁଦ୍ୱାର ପରିଚାଳନା କମିଟି (ପିଏସଜିପିସି) ସଭାପତି ରମେଶ ସିଂ ଆରୋରା ମଧ୍ୟ ଅଂଶଗ୍ରହଣ କରିଥିଲେ। ସେ ମଧ୍ୟ ପଞ୍ଜାବ ପ୍ରଦେଶର ପ୍ରଥମ ଶିଖ ସଂଖ୍ୟାଲଘୁ ବ୍ୟାପାର ମନ୍ତ୍ରୀ। ସେ କହିଛନ୍ତି ଯେ, ଗୁରୁଦ୍ୱାର ଏବଂ ମନ୍ଦିର ନିର୍ମାଣ ତଥା ବିକାଶ ପାଇଁ ପାକିସ୍ତାନୀ ୩୦ କୋଟି ଟଙ୍କା ବଜେଟ୍ ଆବଣ୍ଟନ କରାଯାଇଛି।
ପାକିସ୍ତାନ ସରକାର କ’ଣ କହିଲେ?
ପାକିସ୍ତାନୀ ସରକାରୀ ଅଧିକାରୀ କହିଛନ୍ତି ଯେ, ହୋଲି ସହ ୩୨୬ ତମ ଖାଲସା ଜୟନ୍ତୀ ଏବଂ ବୈଶାଖୀ ମେଳା ୨୦୨୫ର ବ୍ୟବସ୍ଥା ଉପରେ ଧ୍ୟାନ ଦିଆଯାଇଥିଲା, ଯାହା ETPB ଦ୍ୱାରା ଆୟୋଜିତ ହେବ। ହୋଲି ଏବଂ ବୈଶାଖୀ ଉତ୍ସବ ପାଇଁ ପ୍ରସ୍ତୁତିର ସମୀକ୍ଷା କରାଯାଇଛି ବୋଲି ରମେଶ ସିଂ ଆରୋରା କହିଛନ୍ତି। ସେ କହିଛନ୍ତି, ବୈଶାଖୀ ମେଳା ପାଇଁ ପାକିସ୍ତାନକୁ ଆସୁଥିବା ତୀର୍ଥଯାତ୍ରୀଙ୍କୁ ଖାଦ୍ୟ, ରହିବା, ସମ୍ପୂର୍ଣ୍ଣ ସୁରକ୍ଷା ତଥା ଅନ୍ୟାନ୍ୟ ସୁବିଧା ଯୋଗାଇ ଦିଆଯିବ।
ସୁରକ୍ଷା ସମ୍ବନ୍ଧରେ କଠୋର ନିର୍ଦ୍ଦେଶନାମା ଜାରି
ଏହି ଘଟଣାଗୁଡ଼ିକର ସଫଳତା ନିଶ୍ଚିତ କରିବାକୁ ETPB, ସମସ୍ତ ପ୍ରାଦେଶିକ ଏବଂ ଜିଲ୍ଲା ସରକାର ମିଳିତ ଭାବେ କାର୍ଯ୍ୟ କରିବେ ବୋଲି ରମେଶ ଆରୋରା କହିଛନ୍ତି। ସୁରକ୍ଷା ଏବଂ ଅନ୍ୟାନ୍ୟ ପ୍ରଶାସନିକ ପ୍ରସଙ୍ଗରେ ଅବହେଳା ନହେବାକୁ ସଂପୃକ୍ତ ବିଭାଗକୁ କଡା ନିର୍ଦ୍ଦେଶ ଦିଆଯାଇଛି ବୋଲି ସଇଫୁଲ୍ଲା ଖୋଖର କହିଛନ୍ତି। ସେ ଆହୁରି ମଧ୍ୟ ସୂଚନା ଦେଇଛନ୍ତି ଯେ, ଶିଖ୍ ତୀର୍ଥଯାତ୍ରୀମାନେ ଏପ୍ରିଲ ୧୦ରେ ୱାଘା-ଅଟାରୀ ଅନ୍ତର୍ଜାତୀୟ ସୀମାଠାରୁ ପାକିସ୍ତାନରେ ପହଞ୍ଚିବେ।