ଗସ୍ତ ପୂର୍ବରୁ ବୈଠକ ; ୪ ମାସ ପରେ ଭାରତ-ଚୀନ୍ ସାମରିକ ଅଧିକାରୀ ଏକାଠି ବସିଲେ
ନୂଆଦିଲ୍ଲୀ : ଚୀନ୍ ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁଙ୍କ ଭାରତ ଗସ୍ତ ପୂର୍ବରୁ ଉଭୟ ଦେଶ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଛି । ପୂର୍ବ ଲଦାଖର ବିବାଦୀୟ ସମସ୍ୟାର ସମାଧାନ ପାଇଁ ରବିବାର ଦିନ ଭାରତ ଓ ଚୀନ ଦୁଇ ଦେଶ ମଧ୍ୟରେ ନୂତନ ଉଚ୍ଚ ସ୍ତରୀୟ ସାମରିକ ଆଲୋଚନା ହୋଇଥିଲା। ଦୀର୍ଘ ୪ ମାସ ପରେ ଭାରତ ଓ ଚୀନର ସେନାମାନେ ଏକାଠି ବସି ଆଲୋଚନା କରିଥିଲେ ।
ଭାରତ ଦ୍ୱାରା ଆୟୋଜିତ ହେବାକୁ ଥିବା ସାଂଘାଇ ସହଯୋଗ ସଂଗଠନ (ଏସସିଓ) ର ଏକ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ମନ୍ତ୍ରୀ ସ୍ତରୀୟ ବୈଠକରେ ଯୋଗଦେବାକୁ ଶାଙ୍ଗଫୁ ଦିଲ୍ଲୀରେ ଆସିବେ । ଏହି ବୈଠକ ୨୭ ଏପ୍ରିଲରେ ଅନୁଷ୍ଠିତ ହେବ ।
ମିଳିଥିବା ସୂଚନା ଅନୁଯାୟୀ , ଏହି ବୈଠକ ପୂର୍ବ ଲଦାଖର ଲଦାଖର ଲାଇନ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (ଏଲଏସି)ର ଚୀନ୍ ପାର୍ଶ୍ୱରେ ଥିବା ଚୁସୁଲ୍-ମୋଲଡୋ ସୀମା ରେଣ୍ଡେଜଭୋସ୍ ପଏଣ୍ଟରେ ଅନୁଷ୍ଠିତ ହୋଇଥିଲା। ପୂର୍ବ ଲଦାଖର ଡେମୋକୋକ ଏବଂ ଡେପସଙ୍ଗର ଅବଶିଷ୍ଟ ବିବାଦୀୟ ସ୍ଥାନଗୁଡିକ ସମ୍ବନ୍ଧୀୟ ସମସ୍ୟାର ସମାଧାନ ପାଇଁ ଭାରତୀୟ ପକ୍ଷ ଜିଦ୍ ଧରିଥିଲେ।
