ଥାନାପାଖ ବ୍ୟାଙ୍କରୁ ଲୁଟ: ଜାଣିପାରିଲାନି ପୋଲିସ, ଅଧଘଣ୍ଟାରେ SBI ବ୍ୟାଙ୍କରେ ବୁଲେଇଦେଲେ କଳାକନା

ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ବହଳଦା ଥାନା ଅନ୍ତର୍ଗତ ବହଳଦା ଏସଵିଆଇ ଶାଖାରୁ ବନ୍ଧୁକ ଦେଖାଇ ଲକ୍ଷାଧିକ ଟଙ୍କା ଲୁଟିନେଇଛନ୍ତି ଦୁର୍ବୃତ୍ତ। ଏହି ଘଟଣାରେ ଦୁଇ ବ୍ୟାଙ୍କ କର୍ମଚାରୀ ଗୁରୁତର ହୋଇଥିବା ଜଣାଯାଇଛି। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି ।

ବାହାରେ ତାଲା ପକେଇଦେଲେ: ୫ ଜଣ ବନ୍ଧୁକଧାରୀ ଦୁର୍ବୃତ୍ତ ଦୁଇ ବ୍ୟାଙ୍କ କର୍ମଚାରୀଙ୍କୁ ମାଡ଼ ମାରି ଆହତ କରିଛନ୍ତି। ସେମାନଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବା ଜଣାପଡିଛି । ପାଞ୍ଚ ଜଣଙ୍କ ଭିତରୁ ଦୁଇ ଜଣ ଲୁଟେରା ବାହାରେ ଜଗିଥିବାବେଳେ ବାକି ୩ ଜଣ ବ୍ୟାଙ୍କରେ ପଶିଥିଲେ । ବ୍ୟାଙ୍କରୁ ଲକ୍ଷାଧିକ ଟଙ୍କା ଲୁଟିବା ପରେ କର୍ମଚାରୀ ଓ ବ୍ୟାଙ୍କ ଭିତରେ ଥିବା ୧୮ ଜଣ ଗ୍ରାହକଙ୍କୁ ବାହାର ପଟୁ ତାଲା ମାରି ଫେରାର ହୋଇଯାଇଥିଲେ। ଅଧାଘଣ୍ଟାରେ ବ୍ୟାଙ୍କରୁ ୩୦ ଲକ୍ଷ ଟଙ୍କା ନେଇ ଫେରାର ମାରିଛନ୍ତି ।

ସୂଚନା ମୁତାବକ ବ୍ୟାଙ୍କ ପାଖରେ ଥାନା ଥାଇ ମଧ୍ୟ ସ୍ଥାନୀୟ ପୋଲିସ ଲୁଟେରାଙ୍କୁ ଧରିବାରେ ସଫଳ ହୋଇନଥିଲେ ।

ରାଜ୍ୟ ଛାଡିଦେଲେ: ଲୁଟ ପରେ ବ୍ୟାଙ୍କରେ ଲାଗିଥିବା ସିସିଟିଭି କ୍ୟାମେରାର ହାର୍ଡ ଡିସ୍କ ମଧ୍ୟ ନେଇଯାଇଛନ୍ତି ଦୁର୍ବୃତ୍ତ । ସେମାନେ ପଡ଼ୋଶୀ ଝାଡ଼ଖଣ୍ଡ ରାଜ୍ୟକୁ ଫେରାର ହୋଇଯାଇଥିବା ଜଣାପଡିଛି। ଉକ୍ତ ଘଟଣା ପ୍ରାୟ ସକାଳ ୧୦.୧୫ ମିନିଟ୍ ସମୟରେ ଘଟିଛି। ତେବେ ସେହି ସମୟରେ ବ୍ୟାଙ୍କରେ କୌଣସି ସିକ୍ୟୁରିଟି ଗାର୍ଡ ନ ଥିବା ଜଣାପଡିଛି ।