(Video) ଦେଖନ୍ତୁ, ଭିଡ଼ ଟ୍ରାଫିକ୍ରେ କ’ଣ ଦେଖୁଛନ୍ତି ଜୋମାଟୋ ଡେଲିଭରି ବୟ: ସୋସିଆଲ ମିଡିଆରେ ଭାଇରାଲ ହେଉଛି ଭିଡିଓ
ଭିଡିଓ ଖବର: ଶିକ୍ଷା ବା ଜୀବନର ଲକ୍ଷ୍ୟ ପୂରଣ କରିବାରେ ଟଙ୍କା କେବେ ବି ପ୍ରତିବନ୍ଧକ ନୁହେଁ । କାରଣ ଦୃଢ଼ ଇଛାଶକ୍ତି ଓ କଠିନ ପରିଶ୍ରମ ଦ୍ୱାରା ସବୁ କିଛି ସମ୍ଭବ। ଯାହାର ବାସ୍ତବ ଦୃଶ୍ୟ ସୋସିଆଲ ମିଡିଆରେ ଦେଖିବାକୁ ମିଳିଛି। ଉକ୍ତ ଭିଡିଓରେ, ଜଣେ ଜୋମାଟୋ ଡେଲିଭରି ବୟ ଟ୍ରାଫିକ୍ରେ ଫସିଥିବା ସମୟରେ ମଧ୍ୟ UPSC ପାଇଁ ପ୍ରସ୍ତୁତ ହେଉଥିବା ଦେଖିବାକୁ ମିଳିଥିଲା । ଯାହାର ଭିଡିଓ ବର୍ତ୍ତମାନ ଅନେକ ଲୋକଙ୍କ ହୃଦୟ ଜିତୁଛି । ସମସ୍ତ ୟୁଜର ଭିଡିଓରେ ଥିବା ଉକ୍ତ ଜୋମାଟୋ ଡେଲିଭରି ବୟଙ୍କୁ ଭୂରି ଭୂରି ପ୍ରଶଂସା କରୁଛନ୍ତି।
ଭାଇରାଲ ହେଉଥିବା ଏହି ଭିଡିଓରେ ଦେଖିବାକୁ ମିଳୁଛି ଯେ ରାସ୍ତାରେ ପ୍ରବଳ ଟ୍ରାଫିକ୍ ଜାମ୍ ରହିଛି । ଏହି କାରଣରୁ ଅନେକ ଗାଡି ବହୁ ସମୟ ଧରି ଛିଡା ହୋଇ ରହିଛନ୍ତି। କିନ୍ତୁ ଏହା ସତ୍ତ୍ୱେ ଜୋମାଟୋ ଡେଲିଭରି ବୟ ସମୟକୁ ନଷ୍ଟ ନ କରି ପାଠ ପଢିବାରେ ବ୍ୟସ୍ତ ରହିଛନ୍ତି । ଭିଡ଼ିଓରେ ଯାହା ଦେଖିବାକୁ ମିଳୁଛି ସେ ଅନ୍ଲାଇନ୍ କ୍ଲାସ୍ କରୁଛନ୍ତି । ଯାହାର ଭିଡିଓ କେହି ଜଣେ କଏଦ କରି ସୋସିଆଲ ମିଡ଼ିଆ ପ୍ଲାଟଫର୍ମ ‘ଏକ୍ସ’ରେ ଅପଲୋଡ଼ କରିଛନ୍ତି ।
ଭିଡିଓ ସେୟାର କରିବାବେଳେ ବ୍ୟକ୍ତି ଜଣକ ଲେଖିଛନ୍ତି, ‘ଏହି ଭିଡିଓ ଦେଖିବା ପରେ, ମୁଁ ଭାବୁ ନାହିଁ ଆପଣଙ୍କୁ ପାଠ ପଢିବା ପାଇଁ ଆଉ ବିଶେଷ ପ୍ରେରଣା ଦରକାର ବୋଲି’ । ତେବେ ଭାଇରାଲ ହେଉଥିବା ଏହି ଭିଡିଓ ଉପରେ ଲୋକମାନେ ପ୍ରବଳ ପ୍ରଶଂସନୀୟ କମେଣ୍ଟ ଦେଉଛନ୍ତି।
