ରାଷ୍ଟ୍ରପତି ନିର୍ବାଚନରେ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବ ଶିବସେନା!
ମୁମ୍ବାଇ: ରାଷ୍ଟ୍ରପତି ପ୍ରାର୍ଥୀଙ୍କୁ ସମର୍ଥନ କରିବା ନେଇ ଏବେ ଆରମ୍ଭ ହୋଇଛି ରାଜନୀତି କନ୍ଦଳ । ଏହାରି ମଧ୍ୟରେ ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବାକୁ ଶିବସେନା ଘୋଷଣା କରିଛି । ଦଳର ବରିଷ୍ଟ ନେତା ସଞ୍ଜୟ ରାୱତ ଏହି ସୂଚନା ଦେଇଛନ୍ତି ।
ତେବେ ସମର୍ଥନ ଘୋଷଣା ପରେ ସଞ୍ଜୟ ରାୱତ ନିଜର ପ୍ରତିକ୍ରିୟା ଦେଇ କହିଛନ୍ତି ଯେ, ‘ଦ୍ରୌପଦୀ ମୁର୍ମୁଙ୍କୁ ସମର୍ଥନର ଅର୍ଥା ନୁହେଁ ଯେ ଆମେ ବିଜେପିକୁ ସମର୍ଥନ କରୁଛୁ । ଆମେ ଆଦିବାସୀ ନେତା ନାମ ଉପରେ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରୁଛୁ । ଏହା ବ୍ୟତୀତ ଲୋକଙ୍କ ଭାବନାକୁ ଧ୍ୟାନରେ ରଖି ଆମେ ଏହି ନିଷ୍ପତ୍ତି ନେଉଛୁ ।’
ମିଡିଆ ସହ ଆଲୋଚନାରେ ସଞ୍ଜୟ କହିଛନ୍ତି ଯେ, ଦ୍ରୌପଦୀଙ୍କ ସହ ଜନଭାବନା ଥିବାରୁ ଶିବାସେନା ମଧ୍ୟ ତାଙ୍କୁ ସମର୍ଥନ କରିଛି । ଅନ୍ୟପଟେ ବିରୋଧୀ ଦଳର ପ୍ରାର୍ଥୀ ଯଶୋୱନ୍ତ ସିହ୍ନାଙ୍କୁ ନେଇ କହିଛନ୍ତି ଯେ, ଆମର ସଦଭାବନା ତାଙ୍କ ସହ ରହିଛି । ସୂଚନା ଅନୁସାରେ, ଯେବେଠୁ ବିରୋଧୀ ଦଳର ବୈଠକ ହୋଇଛି, ସେବେଠୁ ଶିବସେନା ସେଥିରେ ଅଂଶଗ୍ରହଣ କରିଆସୁଥିଲା । କିନ୍ତୁ ଏବେ ଶିବସେନାର ନିଷ୍ପତ୍ତି ଫଳରେ ବିରୋଧୀଙ୍କୁ ଏକ ବଡ଼ ଝଟକା ଲାଗିଛି ।
