ପରୀକ୍ଷାରେ ଅଧିକ ମାର୍କ ଆଣିବାର ଚାପ ପାରିଲେନି ସହି ….ଝୁଲିପଡିଲେ ୧୮ ବର୍ଷର ବାଳିକା, ଆପଣଙ୍କ ପିଲା ଚାପରେ ନାହିଁ ତ ?

କୋଟା: କୋଟା ରାଜସ୍ଥାନର ଏକ ସହର ଯାହା କେବଳ ଏହାର ପ୍ରାଚୀନ ସ୍ଥାପତ୍ୟ ସ୍ଥାନ ଏବଂ ଚମତ୍କାର ଉଦ୍ୟାନ ପାଇଁ ପ୍ରସିଦ୍ଧ ନୁହେଁ ବରଂ ଆଇଆଇଟି ଏବଂ ମେଡିକାଲ୍ କଲେଜରେ ଦାଖିଲା ଭରିବା ପାଇଁ ଉଚ୍ଚତ୍ତମ କୋଚିଂ କ୍ଲାସ୍ ପ୍ରଦାନ କରୁଥିବା କେନ୍ଦ୍ର ଭାବରେ ଖୁବ ପ୍ରସିଦ୍ଧ। ପ୍ରତିବର୍ଷ ଭାରତର ବିଭିନ୍ନ ସ୍ଥାନରୁ ଲକ୍ଷ ଲକ୍ଷ ଛାତ୍ରଛାତ୍ରୀ ପ୍ରବେଶିକା ପରୀକ୍ଷା ପାଇଁ କୋଟା ଆସିଥାନ୍ତି। ଛାତ୍ରଛାତ୍ରୀମାନଙ୍କ ପାଇଁ କୋଟା ଏକ ସ୍ୱପ୍ନର ସହର, ଯେଉଁମାନେ ଏକ ପ୍ରତିଷ୍ଠିତ ଆଇଆଇଟି, ଏନଆଇଟି ଏବଂ ଅନ୍ୟାନ୍ୟ ପ୍ରତିଷ୍ଠିତ କଲେଜରେ ପ୍ରବେଶ କରିବାକୁ ଚେଷ୍ଟା କରନ୍ତି ତାଙ୍କ ପାଇଁ ଏହା ସ୍ୱର୍ଗ । କିନ୍ତୁ କିଛି ପିଲା ମାନଙ୍କ ପାଇଁ ଏହା ନର୍କ ଠାରୁ ମଧ୍ୟ ହୀନ। ପାଠ ଚିନ୍ତାରେ ଆସି ପ୍ରତିବର୍ଷ ବହୁ ପିଲା ଜୀବନ ହାରୁଛନ୍ତି ।

ତେବେ ଏହି ଭଳି ଏକ ଘଟଣା ସାମ୍ନାକୁ ଆସିଛି। ବିହାରର ଚମ୍ପାରଣ ର ଜଣେ ୧୮ ବର୍ଷର ବାଳିକା ତାଙ୍କ ହଷ୍ଟେଲ ରୁମରେ ଆତ୍ମହତ୍ୟା କରିଛି। ଝିଅଟିର ପିତାମାତା ତାଙ୍କୁ ଭେଟିବାକୁ ଆସିଥିଲେ ଏବଂ ତାଙ୍କ ପାଇଁ ଅନ୍ୟ ଏକ ହଷ୍ଟେଲ ଖୋଜୁଥିଲେ। ବାପାମାଙ୍କ କହିବା ଅନୁସାରେ ଝିଅଟି ରହୁଥିବା ହଷ୍ଟେଲର ଖାଦ୍ୟକୁ ସେ ପସନ୍ଦ କରୁନଥିଲେ। ସୂଚନାମୁତାବକ ଛାତ୍ରୀ ଜଣକ ନାମ ଶେମ୍ବୁଲ ପ୍ରବୀଣ ଥିଲା । ସେ ଏକ ବର୍ଷ ପୂର୍ବେ ରାଜସ୍ଥାନର କୋଟାଠାରେ ଅବସ୍ଥିତ ହଷ୍ଟେଲରେ ଆଡମିଶନ ନେଇଥିଲେ। ପରୀକ୍ଷାରେ ଭଲ ମାର୍କ ପାଇବା କାରଣରୁ ସେ ଚାପରେ ଥିଲେ ବୋଲି କୁହାଯାଉଛି।

ଯଦିଓ ପୋଲିସ କୌଣସି ଆତ୍ମହତ୍ୟା ନୋଟ୍ ପାଇନାହିଁ, ତଥାପି ପରୀକ୍ଷାରେ କମ୍ ମାର୍କ ରଖିଥିବାରୁ ସେ ବହୁତ ଚାପରେ ଥିଲେ ବୋଲି ଝିଅର ପିତାମାତା କହିଛନ୍ତି। ଏହା ସହିତ ହଷ୍ଟେଲରେ ତାଙ୍କୁ ଦିଆଯାଇଥିବା ଖାଦ୍ୟରେ ମଧ୍ୟ ସେ ବିରକ୍ତ ହୋଇଥିଲେ। ତାଙ୍କ ପିତା କହିଛନ୍ତି ଯେ ତାଙ୍କୁ ସ୍ଥାନାନ୍ତର କରିବା ଉଦ୍ଦେଶ୍ୟରେ ସେ କୋଟା ଯାଇଥିଲେ।

ଶେମ୍ବୁଲ ପ୍ରବୀଣ ତାଙ୍କ ଚାରି ଭାଇଭଉଣୀଙ୍କ ମଧ୍ୟରୁ ସାନ ଥିଲେ ଏବଂ ତାଙ୍କ ପିତାଙ୍କ ଅନୁଯାୟୀ ସେ ଜଣେ ପରିଶ୍ରମୀ ଏବଂ ଭଲ ପାଠ ପଢ଼ୁଥିବା ଛାତ୍ରୀ ଥିଲେ ।ଏହି ଘଟଣାରେ ପୋଲିସ ତଦନ୍ତ ଆରମ୍ଭ କରିଛି। କୌଣସି ଆତ୍ମହତ୍ୟା ନୋଟ ମିଳିନାହିଁ, ତେଣୁ ପୋଲିସ ଅନ୍ୟାନ୍ୟ ଦିଗରୁ ମଧ୍ୟ ତଦନ୍ତରେ ବ୍ୟସ୍ତ ଅଛି।

କୋଟାକୁ ନେଇ ଏଭଳି ବିବାଦ ବଢ଼ିବାରେ ଲାଗୁଛି। ପଡ଼ୋଶୀ କିମ୍ବା ବନ୍ଧୁମାନଙ୍କର ପିଲାମାନଙ୍କୁସଫଳ ଦେଖି କିଛି ପିତାମାତା ନିଜ ପିଲାଙ୍କ ପାଇଁ ସମାନ ସ୍ୱପ୍ନ ଦେଖିବା ପାଇଁ ତାଙ୍କ ଉପରେ ଚାପ ପକାନ୍ତି। ଆଇଆଇଟି କିମ୍ବା ଟପ୍ ମେଡିକାଲ୍ କଲେଜରେ ପ୍ରବେଶ କରିବା ସେହି ସ୍ୱପ୍ନକୁ ସାକାର କରିବା ଦିଗରେ ସେମାନେ ପିଲାମାନଙ୍କୁ କୋଟା ପଠାନ୍ତି । ଆଉ ପିଲା ବାଧ୍ୟ ହୋଇ ଏହି କାର୍ଯ୍ୟ କରିଥାଏ ।ପିତାମାତାଙ୍କ ଚାପ, ବନ୍ଧୁ / ସାଥୀ ଚାପ, ପରୀକ୍ଷା ଚାପ, ଫଳାଫଳ ଚାପ, ଛୁଟିଦିନରେ ମଧ୍ୟ ଅତିରିକ୍ତ କ୍ଲାସ ,କୋଟା କେବଳ କୋଚିଂ କାରଖାନା ନୁହେଁ ବରଂ JEE ଏବଂ NEET ଆଶାକର୍ମୀମାନଙ୍କ ପାଇଁ ଏହା ଏକ ପ୍ରେସର କୁକର ପରିସ୍ଥିତି ସୃଷ୍ଟି କରିଥାଏ । କିଛି ଛାତ୍ରଛାତ୍ରୀ ଏହି ଚାପକୁ ସମ୍ଭାଳିବାରେ ସକ୍ଷମ ନୁହଁନ୍ତି, ଅବସାଦରେ ପଡ଼ନ୍ତି, ଯାହା ଫଳରେ ଆତ୍ମହତ୍ୟା ଭଳି ଘଟଣା ସାମ୍ନା କୁ ଆସିଥାଏ ।