ଏଣିକି ଓକିଲମାନଙ୍କୁ Whatsapp ରେ ଦିଆଯିବ ମାମଲା ସମ୍ବନ୍ଧୀୟ ସୂଚନା, ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି

ନୂଆଦିଲ୍ଲୀ: ଭାରତର ମୁଖ୍ୟ ବିଚାରପତି ଡି. ୱାଇ ଚନ୍ଦ୍ରଚୂଡ଼ ଗୁରୁବାର ଦିନ ଘୋଷଣା କରିଛନ୍ତି ଯେ, ସୁପ୍ରିମକୋର୍ଟ ହ୍ୱାଟ୍ସଆପ ମେସେଜ ମାଧ୍ୟମରେ ଓକିଲମାନଙ୍କୁ ମାମଲା ଦାଖଲ କରିବା ଏବଂ ତାଲିକାଭୁକ୍ତ କରିବା ସମ୍ବନ୍ଧୀୟ ସୂଚନା ଜାରି କରିବା ଆରମ୍ଭ କରିବେ । ପ୍ରଧାନ ବିଚାରପତିଙ୍କ ଅଧ୍ୟକ୍ଷତାରେ ବସିଥିବା ୯ ଜଣିଆ ବିଚାରପତିଙ୍କ ବେଞ୍ଚ ଏକ ଗୁରୁତ୍ୱପୁର୍ଣ୍ଣ ପ୍ରଶ୍ନର ଶୁଣାଣି ଆରମ୍ଭ କରିବା ପୂର୍ବରୁ ବିଚାରପତି ଚନ୍ଦ୍ରଚୂଡ଼ ଏହି ଘୋଷଣା କରିଥିଲେ ।

ଦାଖଲ କରାଯାଇଥିବା ଏକ ପିଟିସନରୁ ଏକ ପ୍ରଶ୍ନ ଆସିଥିଲା ଯେ, ନିଜ ସଂପତ୍ତିକୁ ସମ୍ବିଧାନର ଅନୁଚ୍ଛେଦ ୩୯ (ବି) ଅନୁଯାୟୀ, ସମ୍ପ୍ରଦାୟର ଭୌତିକ ସମ୍ବଳ ଭାବରେ ବିବେଚନା କରାଯାଇ ପାରିବ, ଯାହା ରାଜ୍ୟ ନୀତି ନିର୍ଦ୍ଦେଶକ ସିଦ୍ଧାନ୍ତର ଏକ ଅଂଶ । ପ୍ରଧାନ ବିଚାରପତି କହିଛନ୍ତି ଯେ, ୭୫ ତମ ବର୍ଷରେ ଉଚ୍ଚତମ ନ୍ୟାୟାଳୟ ଏକ ପଦକ୍ଷେପ ନେଇଛନ୍ତି, ଯେଉଁଥିରେ ନ୍ୟାୟାଳୟର ଆଇଟି ସେବା ସହ ହ୍ୱାଟ୍ସଆପ ମେସେଜକୁ ଏକୀକରଣ କରି ନ୍ୟାୟ ପର୍ଯ୍ୟନ୍ତ ପହଁଚିବା ପାଇଁ ଲକ୍ଷ ରଖାଯାଇଛି ।

ସିଜେଆଇ କହିଛନ୍ତି, ଏବେ ଓକିଲମାନଙ୍କୁ ମୋକଦ୍ଦମା ଦାଖଲ କରିବା ବିଷୟରେ ଅଟୋମେଟେଡ ମେସେଜ ପ୍ରାପ୍ତ ହେବ । ବିଚାରପତି ଚନ୍ଦ୍ରଚୂଡ ଏହା ମଧ୍ୟ କହିଛନ୍ତି ଯେ, କାରଣ ସୂଚୀ ପ୍ରକାଶିତ ହେବା ପରେ ବାର୍ ସଦସ୍ୟମାନଙ୍କୁ ତାଙ୍କ ଫୋନରେ ସୂଚୀ ପ୍ରାପ୍ତ ହେବ । କାରଣ ସୂଚୀ ହେଉଛି ଏକ ନିର୍ଦ୍ଦିଷ୍ଟ ତାରିଖରେ କୋର୍ଟଙ୍କ ଦ୍ୱାରା ଏକ ମାମଲାର ଶୁଣାଣି ହେବା । ସଲିସିଟର ଜେନେରାଲ ତୁଷାର ମେହତା କହିଛନ୍ତି ଯେ, ଏହା ଏକ କ୍ରାନ୍ତିକାରୀ ପଦକ୍ଷେପ । ପ୍ରଧାନ ବିଚାରପତି ସର୍ବୋଚ୍ଚ ନ୍ୟାୟାଳୟର ଅଫିସିଆଲ ହ୍ୱାଟ୍ସଆପ ନମ୍ବର ମଧ୍ୟ ଜାରି କରିଛନ୍ତି ଏବଂ କହିଛନ୍ତି ଯେ, ଏଥିରେ ଅନ୍ୟ କୌଣସି ମେସେଜ ଏବଂ କଲ ପ୍ରାପ୍ତ ହେବ ନାହିଁ ।