ପାକିସ୍ତାନର ଘନିଷ୍ଠ ବନ୍ଧୁ ଦେଲା ସାହାଯ୍ୟର ପଛଘୁଞ୍ଚା, ଟଙ୍କା ଦେବା ପାଇଁ ମନା କରିଲେ ଚୀନ ନିବେଶକ
ଇସଲାମାବାଦ: ପାକିସ୍ତାନରେ ଚାଲିଥିବା ଆର୍ଥିକ ସଙ୍କଟ ମଧ୍ୟରେ ଚୀନ୍-ପାକିସ୍ତାନ ଅର୍ଥନୈତିକ କରିଡର (ସିପିଇସି) ଗୁରୁତର ଅସୁବିଧାର ସମ୍ମୁଖୀନ ହେଉଛି। ANI ର ଏକ ରିପୋର୍ଟ ଅନୁଯାୟୀ, ସିପିଇସିର ଅନେକ ପ୍ରକଳ୍ପ ବିଳମ୍ବିତ ହୋଇଛି କିମ୍ବା ସଂପୂର୍ଣ୍ଣ ଅଟକି ରହିଛି। ଚୀନର ନିବେଶକମାନେ ପାକିସ୍ତାନରେ ନୂତନ ପ୍ରକଳ୍ପ ପାଇଁ ଅର୍ଥ ଦେବାକୁ ଦ୍ୱିଧା କରୁଛନ୍ତି।
ନିବେଶକଙ୍କ ପ୍ରମୁଖ ଚିନ୍ତାର କାରଣ ହେଉଛି ଇସଲାମାବାଦ ଉପରେ ଋଣ ଭାର ଏବଂ ଏହାର ଡିଫଲ୍ଟ ଭୟ। ଏଥିସହ ବେଜିଂ ଆନ୍ତର୍ଜାତୀୟ ମୁଦ୍ରା ପାଣ୍ଠିର (ଆଇଏମ୍ଏଫ୍) ୬ ବିଲିୟନ ଆମେରିକୀୟ ଡଲାରର ବେଲଆଉଟ୍ ପ୍ୟାକେଜ୍ କାର୍ଯ୍ୟକ୍ରମର ପୁନଃ ସ୍ଥାପନ ପାଇଁ କଠିନ ପରିସ୍ଥିତିରେ ଖୁସି ନୁହେଁ, ଯାହା ପାକିସ୍ତାନର ଆର୍ଥିକ ଦୁଃଖକୁ ବଢାଇପାରେ ଏବଂ ଚୀନ୍ ଉପରେ ଋଣ ଭାର ବଢିପାରେ। ଆଇଏମ୍ଏଫ୍ ତଥ୍ୟ ଅନୁଯାୟୀ, ପାକିସ୍ତାନର ୧୨୬ ବିଲିୟନ ଡ଼ଲାରର ବାହ୍ୟ ଋଣରେ ପ୍ରାୟ ୩୦ ବିଲିୟନ ଡଲାର ଚୀନର ଅଟେ।
CPEC ୨୦୧୩ ରେ ୬୨ ବିଲିୟନ ଆମେରିକୀୟ ଡଲାରର ପ୍ରାରମ୍ଭିକ ବଜେଟ୍ ସହିତ ଆରମ୍ଭ ହୋଇଥିଲା। ଗତ ଏକ ଦଶନ୍ଧି ମଧ୍ୟରେ ଇସଲାମାବାଦରେ ଅମଲାତାନ୍ତ୍ରିକ ଦୁର୍ନୀତି, ଆଭ୍ୟନ୍ତରୀଣ ରାଜନୀତି ଏବଂ ବାଲୁଚିସ୍ତାନ ଏବଂ ସିନ୍ଧ ପ୍ରଦେଶରେ ସୁରକ୍ଷାରେ ବିପଦ ବଢିବା ହେତୁ ଚୀନ୍ ପାକିସ୍ତାନକୁ ଉପଯୁକ୍ତ ପାଣ୍ଠି ଯୋଗାଇବା ବନ୍ଦ କରିଦେଇଛି।
ଫଳସ୍ୱରୂପ, ପାକିସ୍ତାନ ଏବଂ ଚୀନ୍ ମଧ୍ୟରେ ଦୀର୍ଘ ଦିନ ଧରି ଚାଲିଥିବା ବନ୍ଧୁତା ଏବେ ଘୋର ଚାପରେ ରହିଛି। Geopolitica.info ର ରିପୋର୍ଟ ଅନୁଯାୟୀ, ସିପିଇସି ପ୍ରକଳ୍ପରେ ନିୟମିତ ବିଳମ୍ବ ଏବଂ ଚାଇନାର ନିବେଶକଙ୍କ ଆର୍ଥିକ କ୍ଷତି ଚୀନ୍ ପାଇଁ ଏକ ସମସ୍ୟା ପାଲଟିଛି। ସିପିଇସିର “କ୍ରାଉନ୍ ଜୁଏଲ୍” ଭାବରେ ବିବେଚନା କରାଯାଉଥିବା ଗ୍ୱାଡର୍ ବନ୍ଦର ଏକ ଦଶନ୍ଧି ପରେ ମଧ୍ୟ ସମ୍ପୂର୍ଣ୍ଣ କାର୍ଯ୍ୟକ୍ଷମ ନୁହେଁ। ଏଥିସହ, ଗ୍ୱାଡରରେ ଚାଇନାର ଶ୍ରମ ଏବଂ ସିପିଇସି ସହ ଜଡିତ କାର୍ଯ୍ୟକଳାପ ସ୍ଥାନୀୟ ଜନସଂଖ୍ୟା ମଧ୍ୟରେ ଅତ୍ୟନ୍ତ ଲୋକପ୍ରିୟ ହୋଇପାରି ନାହିଁ।
