ବରିଷ୍ଠ ନାଗରିକଙ୍କ ପାଇଁ ଚାରୋଟି ସର୍ବୋତ୍ତମ ଯୋଜନା, ୮.୨ ପ୍ରତିଶତ ପର୍ଯ୍ୟନ୍ତ ମିଳିବ ସୁଧ
ବରିଷ୍ଠ ନାଗରିକମାନଙ୍କୁ ଆର୍ଥିକ ସୁବିଧା ଯୋଗାଇବା ପାଇଁ ସରକାରଙ୍କ ଦ୍ୱାରା ଅନେକ ଯୋଜନା ପରିଚାଳିତ ହେଉଛି । କିଛି ଯୋଜନା ଛୋଟ ସଞ୍ଚୟ ଯୋଜନା ଅଧୀନରେ ଆସେ । ଏହି ଯୋଜନାଗୁଡିକ ଲୋକଙ୍କୁ ଅବସର ପ୍ରାପ୍ତ ପରେ ନିୟମିତ ଆୟ ଯୋଗାଇଥାଏ । ସରକାର ଏବେ ବରିଷ୍ଠ ନାଗରିକଙ୍କ ପାଇଁ ଚାରୋଟି ସଞ୍ଚୟ ଯୋଜନା ବିଷୟରେ ସୂଚନା ଦେଇଛନ୍ତି । କେଉଁ ଯୋଜନା ଅଧୀନରେ କେତେ ଏବଂ କେଉଁ ଲାଭ ମିଳିପାରିବ ଆସନ୍ତୁ ଜାଣିବା ।
ଏହି ୪ଟି ଯୋଜନା ମଧ୍ୟରୁ ସର୍ବପ୍ରଥମ ନାମ ହେଉଛି ସିନିୟର ସିଟିଜେନ୍ ସେଭିଂ ସ୍କିମ୍, ଯାହା ଛୋଟ ସଞ୍ଚୟ ଯୋଜନା ଅଧୀନରେ ଆସେ । ଏହି ଯୋଜନା ଅଧୀନରେ ଆପଣ ସର୍ବାଧିକ ୩୦ ଲକ୍ଷ ଟଙ୍କା ପର୍ୟ୍ୟନ୍ତ ବିନିଯୋଗ କରିପାରିବେ । ଏହି ଯୋଜନାରେ ୧.୫ ଲକ୍ଷ ଟଙ୍କା ପର୍ୟ୍ୟନ୍ତ ଟିକସ ଛାଡ ମଧ୍ୟ ଦିଆଯାଇଛି । ଏହି ଯୋଜନାରେ ସୁଧ ହାର ୮.୨ ପ୍ରତିଶତ ଏବଂ ପରିପକ୍ୱତା ଅବଧି ପାଞ୍ଚ ବର୍ଷ ଅଟେ । ପ୍ରଧାନମନ୍ତ୍ରୀ ବ୍ୟୟ ବନ୍ଦନା ଯୋଜନା (PMVVY) ବରିଷ୍ଠ ନାଗରିକମାନଙ୍କୁ ବାର୍ଷିକ ୭.୪ ପ୍ରତିଶତ ସୁଧ ଦେଇଥାଏ । ଏହି ଯୋଜନା ଅଧୀନରେ ସର୍ବନିମ୍ନ ୧.୫ ଲକ୍ଷ ଟଙ୍କା ଏବଂ ସର୍ବାଧିକ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ବିନିଯୋଗ କରାଯାଇପାରିବ । ଏହି ଯୋଜନାରେ କୌଣସି ଟିକସ ଛାଡ ନାହିଁ, କିନ୍ତୁ ଆପଣ ଏହା ଅଧୀନରେ ଋଣ ନେଇପାରିବେ । ଏହି ଯୋଜନା ମାସିକ, ତ୍ରୟମାସିକ, ଅର୍ଦ୍ଧ ବାର୍ଷିକ ଏବଂ ବାର୍ଷିକ ଭିତ୍ତିରେ ପେନ୍ସନ ପ୍ରଦାନ କରେ ।
ପୋଷ୍ଟ ଅଫିସର ମାସିକ ଆୟ ଯୋଜନା ଅଧୀନରେ ଆପଣ ୯ ଲକ୍ଷ ଟଙ୍କା ବିନିଯୋଗ କରିପାରିବେ । ସୁଧ ୭.୪ ପ୍ରତିଶତ ରହିଥିବା ବେଳେ ଏହାର ପରିପକ୍ୱତା ୫ ବର୍ଷ ପର୍ଯ୍ୟନ୍ତ ରହିଛି । ପାଞ୍ଚ ବର୍ଷ ବିନିଯୋଗ ପରେ ଏହା ନିୟମିତ ଆୟର ଲାଭ ଦେଇଥାଏ । ତେବେ ୬୦ ବର୍ଷରୁ ଅଧିକ କୌଣସି ନାଗରିକ ସିନିୟର ସିଟିଜେନ ଏଡଫି ଯୋଜନାରେ ବିନିଯୋଗ କରିପାରିବେ । ସମସ୍ତ ବ୍ୟାଙ୍କ ବିଭିନ୍ନ କାର୍ଯ୍ୟକାଳରେ ବରିଷ୍ଠ ନାଗରିକମାନଙ୍କୁ ଭିନ୍ନ ସୁଧ ହାର ପ୍ରଦାନ କରନ୍ତି । ଆବଶ୍ୟକତା ଅନୁଯାୟୀ ଏହି ଯୋଜନାରେ ସମସ୍ତେ ବିନିଯୋଗ କରିପାରିବ । ଏହି ଯୋଜନାଗୁଡିକ ସରକାରଙ୍କ ଦ୍ୱାରା ପରିଚାଳିତ ହେଉଛି, ଯେଉଁଥିପାଇଁ ଆୟର ସମ୍ପୂର୍ଣ୍ଣ ଗ୍ୟାରେଣ୍ଟି ରହିଛି ।
