ଦ୍ୱିତୀୟ ଝିଅ ଜନ୍ମ ହେବାରୁ ତଣ୍ଟି ଚିପି ନବଜାତକ କନ୍ୟା ସନ୍ତାନର ହତ୍ୟା କଲା ମା’
ନୂଆଦିଲ୍ଲୀ: ମା’ ନିଜ ସନ୍ତାନ ପାଇଁ କିଛି ବି କରିପାରେ । କିନ୍ତୁ ଦୁନିଆରେ ଏମିତି ବି ମା’ ଅଛନ୍ତି ଯିଏ ନିଜ ସନ୍ତାନକୁ ପାଇ ଖୁସି ନଥାନ୍ତି । ଏପରିକି କନ୍ୟା ସନ୍ତାନ ହେଲେ ସେହି ନୀରିହ ନିଷ୍ପାପ ଶିଶୁଙ୍କର ଜୀବନ ନେବାକୁ ପଛାନ୍ତି ନାହିଁ ଏଭଳି କିଛି ମା’ । ତେବେ ଜଣେ ମା’ ନିଜ ନବଜନ୍ମିତ ଶିଶୁର ଜୀବନ ନେଇଥିବା ଭଳି ଘଟଣା ସାମ୍ନାକୁ ଆସିଛି । ଏଭଳି ଘଟଣା ମହାରାଷ୍ଟର ଲାଟୁରରେ ଘଟିଯାଇଛି । ଏହି ଅଞ୍ଚଳର ଜଣେ ମହିଳା ତାଙ୍କ ତିନି ଦିନର ଶିଶୁ କନ୍ୟାକୁ ହତ୍ୟା କରିଥିବା ଅଭିଯୋଗରେ ତାଙ୍କୁ ଗିରଫ କରାଯାଇଛି । ଜଣେ ପୋଲିସ ଅଧିକାରୀ ଏସମ୍ପର୍କରେ ସୂଚନା ଦେଇଛନ୍ତି । ସେ କହିଛନ୍ତି ଯେ ଅନୁସନ୍ଧାନ ବେଳେ ଏହା ଜଣାପଡିଥିଲା ଯେ ଦ୍ୱିତୀୟ କନ୍ୟା ସନ୍ତାନ ଜନ୍ମ କରିବା ପରେ ଅଭିଯୁକ୍ତ ଦୁଃଖରେ ଥିଲେ । ସବ୍-ଇନ୍ସପେକ୍ଟର କିଶୋର କାମ୍ବଲେ କହିଛନ୍ତି ଯେ ସନ୍ତାନଟିର ମୃତ୍ୟୁ ଯାଞ୍ଚ ପରେ ମହିଳାଙ୍କୁ ଶୁକ୍ରବାର ସନ୍ଧ୍ୟାରେ ଗିରଫ କରାଯାଇଛି ।
ଆମ ସମାଜରେ ଝିଅମାନେ ଏକ ବୋଝ ଭାବରେ ବିବେଚନା କରାଯାଏ । ଲାଟୁର ଏଭଳି ଘଟଣା ଏହି କଥାକୁ ପ୍ରମାଣ କରେ । ଝିଅମାନେ ସମାଜ ପାଇଁ ଏକ ବୋଝ ହୋଇସାରିଛନ୍ତି, ସେଥିପାଇଁ ସେମାନଙ୍କୁ ଗର୍ଭରେ ହିଁ ହତ୍ୟା କରାଯିବା ଭଳି ଘଟଣା ବାରମ୍ଭାର ସାମ୍ନାକୁ ଆସୁଛି । ଏବଂ ଯଦି ସେମାନେ ଦୁନିଆକୁ ଆସନ୍ତି, ତେବେ ପରିବାର ସଦସ୍ୟଙ୍କ ହାତରେ ସେମାନଙ୍କୁ ହତ୍ୟା କରାଯାଇଥାଏ । ମହାରାଷ୍ଟ୍ର ବ୍ୟତୀତ ଦେଶର ଅନେକ ସ୍ଥାନରେ ଏଭଳି ଅମାନବୀୟ କାର୍ଯ୍ୟ ଦେଖିବାକୁ ମିଳିଛି ।
ଅକ୍ଟୋବର ୨୦୨୦ ରେ, ଜଣେ ୩୦ ବର୍ଷ ବୟସ୍କା ମହିଳା ଦ୍ୱିତୀୟ କନ୍ୟା ସନ୍ତାନ ଜନ୍ମ କରିବା ପରେ ବିରକ୍ତ ହୋଇ ପଞ୍ଜାବର ଲୁଧିଆନାରେ ନିଜର ଚାରି ବର୍ଷର ବଡ ଝିଅକୁ ଫିଙ୍ଗି ଦେଇଥିଲେ । ପୋଲିସ କହିଛି ଯେ ମହିଳା ଜଣକ ବିହାରର ଜଣେ ପ୍ରବାସୀ ଶ୍ରମିକଙ୍କ ପତ୍ନୀ । ମହିଳା ଜଣକ ତାଙ୍କ ଚାରି ବର୍ଷର ଝିଅକୁ ଲୁଧିଆନାର ସାଲେମ ତାବ୍ରି ଅଞ୍ଚଳର ନବନୀତ ନଗରରେ ଥିବା ଘରର ବାଥରୁମ କାନ୍ଥ ଓ ଚଟାଣରେ ପିଟିପିଟି ହତ୍ୟା କରିଥିବା ଅଭିଯୋଗ ହୋଇଥିଲା । ଏଭଳି ମାମଲା ଦେଶର କୋଣ ଅନୁକୋଣରୁ ଆସୁଛି ।
