ଗୋଟିଏ ଫୋନ୍ କଲରେ ପଦ ହରାଇଲେ ପ୍ରଧାନମନ୍ତ୍ରୀ, ଜାଣନ୍ତୁ କାହିଁକି ଏତେ ବଡ଼ ନିଷ୍ପତ୍ତି ଶୁଣାଇଲେ କୋର୍ଟ…

ବ୍ୟାଙ୍କକ୍,୧ା୭: ଗୋଟିଏ ଫୋନ୍ କଲରେ ପଦ ହରାଇଛନ୍ତି ପ୍ରଧାନମନ୍ତ୍ରୀ । ଏପରି ଘଟଣା ଘଟିଛି  ଥାଇଲାଣ୍ଡରେ । ଏଠାକାର ରାଜନୀତିରେ ଏକ ବିରାଟ ହଇଚଇ ସୃଷ୍ଟି ହୋଇଛି। ଦେଶର ସାମ୍ବିଧାନିକ ଅଦାଲତ ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ ସିନାୱାତ୍ରାଙ୍କୁ ତାଙ୍କ ପଦବୀରୁ ନିଲମ୍ବିତ କରିଛନ୍ତି। କାମ୍ବୋଡିଆ ସହିତ କୂଟନୈତିକ ବିବାଦ ଏବଂ ଏକ ଲିକ୍ ହୋଇଥିବା ଫୋନ୍ କଲ୍ ପରେ ଏହି ନିଷ୍ପତ୍ତି ଆସିଛି, ଯାହା ଥାଇଲାଣ୍ଡର ସଂସଦ ଏବଂ ସାମରିକ ପ୍ରତିଷ୍ଠାନରେ ବିରାଟ ରାଜନୈତିକ ଉତ୍ତେଜନା ସୃଷ୍ଟି କରିଛି। କୋର୍ଟ ୭-୨ ଭୋଟର ବହୁମତରେ ଏହି ନିଷ୍ପତ୍ତି ଦେଇଛନ୍ତି, କହିଛନ୍ତି ଯେ, ପ୍ରଧାନମନ୍ତ୍ରୀଙ୍କୁ ଜୁଲାଇ ୧ରୁ ଏହି ମାମଲାରେ ଚୂଡ଼ାନ୍ତ ନିଷ୍ପତ୍ତି ନ ନିଆଯିବା ପର୍ଯ୍ୟନ୍ତ ତାଙ୍କ କାର୍ଯ୍ୟରୁ ନିଲମ୍ବିତ କରାଯାଇଛି।

ଏହି ସମ୍ପୂର୍ଣ୍ଣ ବିବାଦ ୨୦୨୫ ମେ’ରେ ଥାଇଲାଣ୍ଡ ଏବଂ କାମ୍ବୋଡିଆ ସୀମାରେ ଏକ ସଂଘର୍ଷ ପରେ ଆରମ୍ଭ ହୋଇଥିଲା, ଯେଉଁଥିରେ ଜଣେ କାମ୍ବୋଡିଆନ୍ ସୈନିକଙ୍କ ମୃତ୍ୟୁ ହୋଇଥିଲା। ଏହି ସମୟ ମଧ୍ୟରେ ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ କାମ୍ବୋଡିଆନ୍ ନେତା ଏବଂ ପୂର୍ବତନ ପ୍ରଧାନମନ୍ତ୍ରୀ ହୁନ୍ ସେନଙ୍କୁ ଏକ ଟେଲିଫୋନ୍ କଲ୍ କରିଥିଲେ। ଏହି କଲ୍ ସମ୍ପ୍ରତି ଲିକ୍ ହୋଇଥିଲା, ଯେଉଁଥିରେ ସେ ହୁନ୍ ସେନଙ୍କୁ ‘ଅଙ୍କଲ’ ବୋଲି ସମ୍ବୋଧିତ କରିଥିଲେ ଏବଂ ଥାଇ ସେନାର ଜଣେ ବରିଷ୍ଠ କମାଣ୍ଡରଙ୍କୁ ‘ପ୍ରତିଦ୍ୱନ୍ଦ୍ୱୀ’ ବୋଲି କହିଥିଲେ। ଏହି ବିବୃତ୍ତି ଦେଶ ଭିତରେ, ବିଶେଷକରି ସେନା ଏବଂ ରକ୍ଷଣଶୀଳ ଶକ୍ତିମାନଙ୍କ ମଧ୍ୟରେ ଏକ ତୀବ୍ର ପ୍ରତିକ୍ରିୟା ସୃଷ୍ଟି କରିଥିଲା।

ଲିକ୍ ହୋଇଥିବା କଲ୍ ପ୍ରକାଶ ପାଇବା ପରେ, ଥାଇ ସଂସଦର ସେହି ସାଂସଦମାନେ ଯେଉଁମାନେ ସେନାର ନିକଟତର ବୋଲି ବିବେଚନା କରାଯାଏ, ସେମାନେ ସାମ୍ବିଧାନିକ ଅଦାଲତରେ ପ୍ରଧାନମନ୍ତ୍ରୀଙ୍କ ବିରୁଦ୍ଧରେ ଏକ ଆବେଦନ ଦାଖଲ କରିଥିଲେ। ସେମାନେ ଅଭିଯୋଗ କରିଥିଲେ ଯେ ପ୍ରଧାନମନ୍ତ୍ରୀ ଏହି ସମ୍ବେଦନଶୀଳ ପ୍ରସଙ୍ଗରେ କାମ୍ବୋଡିଆ ନିକଟରେ ମୁଣ୍ଡ ନୁଆଁଇବାକୁ ଇଙ୍ଗିତ କରିଥିଲେ ଏବଂ ସାର୍ବଜନୀନ ଭାବରେ ଥାଇ ସେନାକୁ ଅପମାନିତ କରିଥିଲେ। ଆବେଦନରେ କୁହାଯାଇଛି ଯେ, ଏହି ଆଚରଣ ମନ୍ତ୍ରୀ ପଦର ‘ନୈତିକ ମର୍ଯ୍ୟାଦା’ ଏବଂ ‘ସ୍ପଷ୍ଟ ସଚ୍ଚୋଟତା’ର ସାମ୍ବିଧାନିକ ପରୀକ୍ଷା ପୂରଣ କରେ ନାହିଁ, ଯାହା ଦେଶର ଜାତୀୟ ସୁରକ୍ଷା, ବୈଦେଶିକ ନୀତି ଏବଂ ସାମରିକ ପ୍ରତିଷ୍ଠାକୁ ଆଘାତ କରିଛି।

ଯଦିଓ ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ ସିନାୱାତ୍ରା ଏପର୍ଯ୍ୟନ୍ତ ଏହି ମାମଲାରେ କୌଣସି ସିଧାସଳଖ ସାର୍ବଜନୀନ ବିବୃତ୍ତି ଦେଇନାହାନ୍ତି, କିନ୍ତୁ ତାଙ୍କ ମୁଖପାତ୍ର ଏକ ପ୍ରେସ ବ୍ରିଫିଂରେ ସ୍ପଷ୍ଟ କରିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟ କେବଳ ଅଞ୍ଚଳରେ ଶାନ୍ତି ବଜାୟ ରଖିବା ଏବଂ ସଂଘର୍ଷକୁ ଏଡାଇବା। ମୁଖପାତ୍ର କହିଛନ୍ତି  ଭୁଲ ପରିପ୍ରେକ୍ଷୀରେ ଫୋନ୍ କଲ୍ ଲିକ୍ ହେବା ଏବଂ ଏହାର ପ୍ରଚାର ଦ୍ୱାରା ପ୍ରଧାନମନ୍ତ୍ରୀ ଗଭୀର ଆଘାତ ପାଇଛନ୍ତି। ସେ ଏହା ମଧ୍ୟ କହିଛନ୍ତି ପ୍ରଧାନମନ୍ତ୍ରୀ କୋର୍ଟ ପ୍ରକ୍ରିୟାକୁ ସମ୍ମାନ କରନ୍ତି ଏବଂ ତଦନ୍ତରେ ପୂର୍ଣ୍ଣ ସହଯୋଗ କରିବେ।

ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ ପୂର୍ବତନ ପ୍ରଧାନମନ୍ତ୍ରୀ ଥାଇସିନ୍ ସିନାୱାତ୍ରାଙ୍କ ଝିଅ, ଯାହାଙ୍କୁ ୨୦୦୬ରେ ଏକ ସାମରିକ ବିଦ୍ରୋହ ମାଧ୍ୟମରେ କ୍ଷମତାରୁ ହଟାଇ ଦିଆଯାଇଥିଲା। ସେବେଠାରୁ, ତାଙ୍କ ପରିବାର ଥାଇ ରାଜନୀତିରେ ନିରନ୍ତର ବିବାଦ ଏବଂ କ୍ଷମତା ସଂଘର୍ଷର କେନ୍ଦ୍ର ହୋଇଆସିଛି। ରାଜନୈତିକ ବିଶ୍ଳେଷକମାନେ ବିଶ୍ୱାସ କରନ୍ତି ଯେ, ପ୍ରଧାନମନ୍ତ୍ରୀଙ୍କ ଏହି ନିଲମ୍ବନ କେବଳ ଏକ ସାମ୍ବିଧାନିକ କିମ୍ବା ଆଇନଗତ ପ୍ରକ୍ରିୟା ନୁହେଁ, ବରଂ ଗଣତାନ୍ତ୍ରିକ ଭାବରେ ନିର୍ବାଚିତ ସରକାରଙ୍କୁ ପୁଣି ଥରେ ଦୁର୍ବଳ କରିବା ପାଇଁ ସେନା ଏବଂ ରକ୍ଷଣଶୀଳ ଶକ୍ତିଙ୍କ ଏକ ପ୍ରୟାସ। ପାଟୋଙ୍ଗଟାର୍ଣ୍ଣଙ୍କ ସରକାର ଆରମ୍ଭରୁ ସେନା ସମର୍ଥିତ ପ୍ରତିଷ୍ଠାନର ବିରୋଧର ସମ୍ମୁଖୀନ ହୋଇଆସୁଛି, ଏବଂ ବର୍ତ୍ତମାନ ଏହି ମାମଲା ଥାଇଲ୍ୟାଣ୍ଡର ଗଣତାନ୍ତ୍ରିକ ସ୍ଥିରତା ପାଇଁ ଆଉ ଏକ ଚ୍ୟାଲେଞ୍ଜ ପାଲଟିଛି।