ସମଗ୍ର ଭାରତରେ ଏଥର ଦୀର୍ଘ ସମୟ ଧରି ରହିବ ‘ଲୁ’ର ପ୍ରଭାବ, ଓଡ଼ିଶା ସମେତ ଏହି ରାଜ୍ୟଗୁଡ଼ିକ ହେବ ଅଧିକ ପ୍ରଭାବିତ: ପାଣିପାଗ ବିଭାଗର ଚେତାବନୀ
ନୂଆଦିଲ୍ଲୀ: ଲୋକସଭା ନିର୍ବାଚନ ଯୋଗୁଁ ବଢ଼ୁଥିବା ରାଜନୈତିକ ପାରା ମଧ୍ୟରେ ପାଣିପାଗ ବିଭାଗ ଏବେ ଦେଶବାସୀଙ୍କ ପାଇଁ ସତର୍କ ସୂଚନା ଜାରି କରିଛି । ଏଥର ସମଗ୍ର ଭାରତରେ ପ୍ରବଳ ଗରମର ସତର୍କ ସୂଚନା ଜାରି କରାଯାଇଛି ।
ଦୀର୍ଘ ଦିନ ଧରି ଦେଶର ବିଭିନ୍ନ ଅଞ୍ଚଳରେ ‘ଲୁ’ ଜାରି ରହିବାର ସମ୍ଭାବନା ରହିଛି । ପାଣିପାଗ ବିଭାଗ ଅନୁଯାୟୀ ଏଥର ତାପମାତ୍ରା ପୂର୍ବ ଅପେକ୍ଷା ଅଧିକ ରହିବ । ବିବ୍ରତ ବିଷୟ ହେଉଛି ଉତ୍ତାପ ଦୀର୍ଘ ସମୟ ପର୍ଯ୍ୟନ୍ତ ଜାରି ରହିବ, ଅର୍ଥାତ୍ ଶୀଘ୍ର ଏଥିରୁ ମୁକ୍ତି ପାଇବାର ଆଶା ନାହିଁ ।
ପାଣିପାଗ ବିଭାଗ କହିଛି ଯେ, ଦେଶର କେନ୍ଦ୍ରୀୟ ଏବଂ ଉତ୍ତର ସମତଳ ବ୍ୟତୀତ ଦକ୍ଷିଣ ଭାରତର ଅନେକ ଅଞ୍ଚଳରେ ଏଥର ଅଧିକ ଦିନ ଗରମ ହେବ । ଏଠାରେ ଅଧିକ ତୀବ୍ର ଉତ୍ତାପ ତରଙ୍ଗର ସମ୍ଭାବନା ମଧ୍ୟ ଅଛି । ଭାରତ ପାଣିପାଗ ବିଭାଗ (ଆଇଏମଡି) ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର ଏକ ଭର୍ଚୁଆଲ ସାମ୍ବାଦିକ ସମ୍ମିଳନୀରେ ଗଣମାଧ୍ୟମକୁ କହିଛନ୍ତି ଯେ ଏପ୍ରିଲରୁ ଜୁନ୍ ମଧ୍ୟରେ ସର୍ବାଧିକ ତାପମାତ୍ରା ସ୍ୱାଭାବିକଠାରୁ ଅଧିକ ରହିବାର ସମ୍ଭାବନା ରହିଛି ।
ଆଇଏମଡି କହିଛି ଯେ କେନ୍ଦ୍ରୀୟ ଭାରତ, ଉତ୍ତର ସମତଳ ଏବଂ ଦକ୍ଷିଣ ଭାରତର ଅନେକ ଅଞ୍ଚଳରେ ‘ଲୁ’ ଦୁଇରୁ ଆଠ ଦିନ ପର୍ଯ୍ୟନ୍ତ ରହିବ । ‘ଲୁ’ ଦ୍ୱାରା ପ୍ରଭାବିତ ଅଞ୍ଚଳ ହେଉଛି ଗୁଜୁରାଟ, ମହାରାଷ୍ଟ୍ର, ଉତ୍ତର କର୍ଣ୍ଣାଟକ, ଓଡିଶା, ଆନ୍ଧ୍ରପ୍ରଦେଶ ଏବଂ ପଶ୍ଚିମ ମଧ୍ୟପ୍ରଦେଶ ଇତ୍ୟାଦି ।
