ଖୁବଶୀଘ୍ର ରାଜ୍ୟରେ ଖୋଲିବ ୩ଟି ଡ୍ରାଇଭିଂ ଟ୍ରେନିଂ ଆଣ୍ଡ ରିସର୍ଚ୍ଚ ସେଣ୍ଟର: ପରିବହନ ବିଭାଗର ନୂଆ ପଦକ୍ଷେପ

ଭୁବନେଶ୍ୱର(ଓଡ଼ିଶା ଭାସ୍କର): ରାଜ୍ୟବାସୀଙ୍କ ପାଇଁ ଏକ ଖୁସି ଖବର । ରାଜ୍ୟର ୩ଟି ଜିଲ୍ଲାରେ ଖୋଲିବାକୁ ଯାଉଛି ଡ୍ରାଇଭିଂ ଟ୍ରେନିଂ ଆଣ୍ଡ ରିସର୍ଚ୍ଚ ସେଣ୍ଟର (ଆଇଡିଟିଆର) । ଏନେଇ ରାଜ୍ୟ ପରିବହନ ବିଭାଗ ପକ୍ଷରୁ ଅଶୋକ ଲେଲ୍ୟାଣ୍ଡ ସହିତ ବୁଝାମଣା ସ୍ୱାକ୍ଷର କରାଯାଇଛି । ଏହି ୩ଟି ଆଇଡିଟିଆର ସ୍ଥାପନ ହେବା ଦ୍ୱାରା ପ୍ରତି ମାସରେ ରାଜ୍ୟର ୪୨୪ ଜଣ ଚାଳକ ଟ୍ରେନିଂ ନେବେ । ସୁରକ୍ଷିତ ସଡ଼କ ପାଇଁ ଦକ୍ଷ ଗାଡ଼ି ଚାଳକଙ୍କର ଆବଶ୍ୟକତା ରହିଛି । ତେଣୁ ଏହି ଆବଶ୍ୟକତାକୁ ପୂରଣ ନେଇ ରାଜ୍ୟ ସରକାର ଏହି ପଦକ୍ଷେପ ନେଇଛନ୍ତି ।

ରାଜ୍ୟର ବ୍ରହ୍ମପୁର, ସୁନ୍ଦରଗଡ଼ର ବଣାଇ ଓ କେନ୍ଦୁଝରରେ ଗୋଟିଏ ଲେଖାଏଁ ଆଇଡିଟିଆର ସ୍ଥାପନ କରାଯିବ । ଏହି ଅନୁଷ୍ଠାନଗୁଡ଼ିକର ବିକାଶ, ପରିଚାଳନା ଓ ପ୍ରଶିକ୍ଷଣ ପାଇଁ କମ୍ପାନୀ କାର୍ଯ୍ୟ କରିବ । ଗତ ୨୦୧୩ରେ ଯାଜପୁର ଜିଲ୍ଲା ଛତିଆଠାରେ ଏକ ଭାରି ଯାନ (ଏଚଏମଭି) ଡ୍ରାଇଭିଂ ଟ୍ରେନିଂ ସେଣ୍ଟର କାର୍ଯ୍ୟକାରୀ ହୋଇଥିଲା । ଉକ୍ତ ଅନୁଷ୍ଠାନର ଦାୟିତ୍ୱ ଅଶୋକ ଲେଲ୍ୟାଣ୍ଡ ଉପରେ ନ୍ୟସ୍ତ କରାଯାଇଛି । ରାଜ୍ୟର ଖଣି ଓ ବାଣିଜ୍ୟିକ ଅଞ୍ଚଳରେ ଦକ୍ଷ ଗାଡ଼ି ଚାଳକଙ୍କ ଅଭାବ ପୂରଣ ନେଇ ଆଉ ୩ଟି ନୂଆ ଆଇଡିଟିଆର ସ୍ଥାପନ କରାଯିବ ।

ଦେଶର ଅନ୍ୟ ରାଜ୍ୟମାନଙ୍କ ଅପେକ୍ଷା ଓଡ଼ିଶାରେ ସର୍ବାଧିକ ଗାଡ଼ି ଚାଳନା ପ୍ରଶିକ୍ଷଣ କେନ୍ଦ୍ର ରହିଛି । ଏହି ପ୍ରଶିକ୍ଷଣ କେନ୍ଦ୍ର ରାଜ୍ୟର ଯୁବକ, ଯୁବତୀଙ୍କୁ ରାଜ୍ୟ ଭିତରେ ଓ ବାହାରେ କର୍ମ ନିଯୁକ୍ତି ଯୋଗାଇବାରେ ସହାୟକ ହେବ । ଏଥିସହିତ ସଡ଼କ ଦୁର୍ଘଟଣା ଓ ମୃତ୍ୟୁ ହାର ହ୍ରାସ ପାଇବ ବୋଲି ପରିବହନ କମିସନର କହିଛନ୍ତି । ବ୍ରହ୍ମପୁରରେ ୧୪୦ ଜଣ, କେନ୍ଦୁଝରରେ ୧୩୪ ଜଣ ଓ ସୁନ୍ଦରଗଡ଼ରେ ପ୍ରତି ମାସରେ ୧୫୦ ଜଣ ଯୁବକ, ଯୁବତୀ ଟ୍ରେନିଂ ନେବେ । ମାସିକିଆ ପାଠ୍ୟକ୍ରମରେ ସେମାନଙ୍କୁ ଉତ୍ତମ ସଡ଼କ ଆଚରଣ ଓ କୌଶଳ ଉପରେ ଟ୍ରେନିଂ ଦିଆଯିବ । ପ୍ରଶିକ୍ଷଣ କେନ୍ଦ୍ରରେ ପ୍ରଶିକ୍ଷାର୍ଥୀଙ୍କୁ ମାଗଣାରେ ଟ୍ରେନିଂ, ହଷ୍ଟେଲରେ ରହିବା, ଖାଦ୍ୟ ବ୍ୟବସ୍ଥା, ଡ୍ରାଇଭିଂ ଲାଇସେନ୍ସ ପ୍ରଦାନର ବ୍ୟବସ୍ଥା କରାଯିବ ।