ଆଜି ‘ମନ କି ବାତ’ର ସେନଚୁରୀ ଏପିସୋଡ, UN ରେ ହେବ ଟେଲିକାଷ୍ଟ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମାସିକ ରେଡିଓ କାର୍ଯ୍ୟକ୍ରମ ‘ମନ କି ବାତ’ର ୧୦୦ ତମ ପର୍ଯ୍ୟାୟ ଆଜି ପ୍ରସାରଣ ହେବ। ଆମେରିକା ନ୍ୟୁୟର୍କର ମିଳିତ ଜାତିସଂଘ ମୁଖ୍ୟାଳୟରେ ଲାଇଭ୍ ପ୍ରସାରଣ ଠାରୁ ଆରମ୍ଭ କରି ସାରା ଦେଶରେ ସ୍ୱତନ୍ତ୍ର ସ୍କ୍ରିନିଂ ପର୍ଯ୍ୟନ୍ତ ‘ମନ୍ କି ବାତ’ ର ଏହି ୧୦୦ ତମ ପର୍ଯ୍ୟାୟଟି ଐତିହାସିକ ହେବ ବୋଲି ଆଶା କରାଯାଉଛି। ଏଥି ସହିତ ଅର୍ଥ ମନ୍ତ୍ରଣାଳୟ ଘୋଷଣା କରିଛି ଯେ, “ମନ କି ବାତ” ର ୧୦୦ ତମ ଏପିସୋଡରେ ୧୦୦ ଟଙ୍କାର ଏକ ସ୍ମରଣୀୟ ମୁଦ୍ରା ଜାରି କରିବ।
ଏହି ବିଶେଷ ଉତ୍ସବକୁ ‘ଅଦୃଶ୍ୟ’ ଜନସମ୍ପର୍କ କାର୍ଯ୍ୟକ୍ରମ କରିବାକୁ ବିଜେପି ଜୋରଦାର ପ୍ରସ୍ତୁତି ଚଳାଇଛି। ବିଜେପି ମନ କି ବାତକୁ ଦେଶର ପ୍ରାୟ ୪ ଲକ୍ଷ ବୁଥ ସ୍ତରୀୟ କେନ୍ଦ୍ରରେ ଟେଲିକଷ୍ଟ କରିବାକୁ ଯୋଜନା କରିଛି ଯାହା ଦ୍ୱାରା ସମସ୍ତେ ଏହା ଶୁଣିବେ।
ଏହି ୩୦ମିନିଟର କାର୍ଯ୍ୟକ୍ରମ, ପ୍ରତ୍ୟେକ ମାସର ଶେଷ ରବିବାର ଦିନ ୧୧ ଟା ସମୟରେ ପ୍ରସାରିତ ହେଉଛି ଏବଂ ଏହାର ଆରମ୍ଭ ୩ ଅକ୍ଟୋବର ୨୦୧୪ ରେ ହୋଇଥିଲା। ଆକାଶବାଣୀ ଯଥା, ରେଡିଓ ବ୍ୟତୀତ ଏହା ଦୂରଦର୍ଶନ (DD) ନେଟୱାର୍କରେ ମଧ୍ୟ ପ୍ରସାରିତ ହୁଏ। ଏହା ବ୍ୟତୀତ ଏହି କାର୍ଯ୍ୟକ୍ରମ ବିଭିନ୍ନ ଅନଲାଇନ୍ ପ୍ଲାଟଫର୍ମ ଏବଂ ନ୍ୟୁଜ୍ ଚ୍ୟାନେଲରେ ମଧ୍ୟ ପ୍ରସାରିତ ହୋଇଛି।
ଏହି କାର୍ଯ୍ୟକ୍ରମରେ ସାଧାରଣ ଲୋକଙ୍କ ପ୍ରେରଣାଦାୟକ କାହାଣୀ ରହିଛି, ଯେଉଁମାନେ ‘ରାଷ୍ଟ୍ର ନିର୍ମାଣ ପାଇଁ ଗୁରୁତ୍ୱପୂର୍ଣ୍ଣ’ ଏବଂ ପ୍ରଧାନମନ୍ତ୍ରୀ ରାଷ୍ଟ୍ର ନିର୍ମାଣ ଉପରେ ତାଙ୍କର ବିଭିନ୍ନ ମତ ବାଣ୍ଟିଛନ୍ତି ଯାହା ‘ସମ୍ପୂର୍ଣ୍ଣ ନୀତିନିୟମ ଏବଂ ଲୋକକେନ୍ଦ୍ରିକ’ ଅଟେ।
