(Video) ସ୍କୁଲରେ ରାମାୟଣ ଶିକ୍ଷା ଦେବା ପାଇଁ ପରାମର୍ଶ ଦେଲେ ଟିଭିର ‘ରାମ’, କହିଲେ ‘ଏହା କେବଳ ସନାତନ ଧର୍ମ ପାଇଁ..’
ନୂଆଦିଲ୍ଲୀ: ରାମାନନ୍ଦ ସାଗରଙ୍କ ରାମୟଣରେ ଭଗବାନ ରାମଙ୍କ ଚରିତ୍ରରେ ଅଭିନୟ କରିଥିବା ଅରୁଣ ଗୋବିଲ ଆଜି ମଧ୍ୟ ଲୋକମାନଙ୍କ ହୃଦୟରେ ବିରାଜମାନ କରୁଛନ୍ତି । ଆଜି ବି ଲୋକେ ତାଙ୍କୁ ରାମ ବୋଲି ଭାବନ୍ତି । ଅଯୋଧ୍ୟାରେ ହୋଇଥିବା ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମରେ ସାମିଲ ହେବା ପରେ ଅଭିନେତା ଧାର୍ମିକ ଗ୍ରନ୍ଥ ରାମାୟଣକୁ ସ୍କୁଲର ପାଠ୍ୟକ୍ରମ ଅର୍ଥାତ ସିଲାବସରେ ସାମିଲ କରିବା ବିଷୟରେ ଅଲୋଚନା କରିଛନ୍ତି ।
ଅରୁଣ ଗୋବିଲ ରାମାୟଣ ବିଷୟରେ କହିଛନ୍ତି । ସ୍କୁଲରେ ରାମାୟଣ ପଢାଯିବା ଉଚିତ ନା ନାହିଁ, ନିକଟରେ ଆରମ୍ଭ ହୋଇଥିବା ଏହି ନୂତନ ବିତର୍କରେ ସେ ନିଜର ମତ ପ୍ରକାଶ କରିଛନ୍ତି । ସେ ରାମାୟଣକୁ ଶିକ୍ଷା ସହ ଯୋଡିବା କଥାକୁ ସମର୍ଥନ କରିଛନ୍ତି । ଏହା ବ୍ୟତୀତ ସେ ଏହାର ଫାଇଦା ବିଷୟରେ ମଧ୍ୟ କହିଛନ୍ତି । ଅଭିନେତା ଏନେଇ କଣ କହିଛନ୍ତି ଆସନ୍ତୁ ଜାଣିବା..
ଏଏନଆଇ ଦ୍ୱାରା ଏକ ଭିଡିଓ ଏକ୍ସରେ ସେୟାର କରାଯାଇଛି । ଯେଉଁଠାରେ ସେ ନିଜର ରାୟ ରଖି କହିଛନ୍ତି ଯେ, ରାମାୟଣକୁ ଆମ ପାଠ୍ୟକ୍ରମରେ ସାମିଲ କରାଯିବା ଉଚିତ କାରଣ ରାମାୟଣକୁ ଧାର୍ମିକ ବୋଲି କହିବାର କୌଣସି ଯଥାର୍ଥତା ନାହିଁ । ରାମାୟଣ ହେଉଛି ଆମ ଜୀବନର ଦର୍ଶନ ।
ଅଭିନେତା ଆଗକୁ କହିଛନ୍ତି ଯେ, ଆମେ ଜୀବନରେ କିପରି ବଞ୍ଚିବା ତାହା ରାମାୟଣ ଆମକୁ ଶିକ୍ଷା ଦେଇଥାଏ । ସଂପର୍କ କିପରି ହେବା ଆବଶ୍ୟକ ତାହା ଜଣାଇଥାଏ । କେତେ ଧର୍ଯ୍ୟ ରହିବା ଆବଶ୍ୟକ ଏବଂ ବ୍ୟକ୍ତିକୁ ଶାନ୍ତି କିପରି ମିଳିପାରିବ, ଏସବୁ ଜାଣିବା କେବଳ ସନାତନ ଧର୍ମର ଲୋକମାନଙ୍କ ପାଇଁ ନୁହେଁ, ଏହା ସମସ୍ତଙ୍କ ପାଇଁ ଆବଶ୍ୟକ । ରାମାୟଣ ସମସ୍ତଙ୍କ ପାଇଁ ଏବଂ ଏଥିପାଇଁ ଏହା ଆମ ପାଠ୍ୟକ୍ରମରେ ରହିବା ନିହାତି ଆବଶ୍ୟକ ।
#WATCH | Varanasi, UP: Actor Arun Govil who played the role of Lord Ram in the Ramanand Sagar's Ramayan, says, "Ramayana must be included in our curriculum because there is no justification in calling Ramayana religious. Ramayana is our philosophy of life. Ramayana tells us how… pic.twitter.com/drugPoklPf
— ANI (@ANI) February 6, 2024
