ନିଆରା ନିଯୁକ୍ତି ଅଫର! ନିଃସନ୍ତାନ ମହିଳାଙ୍କୁ ଗର୍ଭବତୀ କରାଇଲେ ମିଳିବ ୫ ଲକ୍ଷ, ୩ ଅଭିଯୁକ୍ତ ଗିରଫ

ପାଟନା: ଆଜିକାଲି ସୋସିଆଲ ମିଡିଆରେ ବିଭିନ୍ନ ପ୍ରକାର ବିଜ୍ଞାପନ ପ୍ରକାଶିତ ହେଉଛି ଯାହା ମୋଟା ଅଙ୍କର ଟଙ୍କା ରୋଜଗାର କରିବା ନାଁରେ ଲୋକଙ୍କୁ ଭୂଆଁ ବୁଲାଉଛି ।

ନିଃସନ୍ତାନ ମହିଳାଙ୍କୁ ଗର୍ଭବତୀ କରାଇବା ନାଁରେ ନିରୀହ ଲୋକଙ୍କୁ ନିଜ ଜାଲରେ ଫସାଉଥିଲେ କିଛି ଦୁର୍ବୃତ୍ତ । ଏଭଳି ଏକ ମାମଲା ଦେଖିବାକୁ ମିଳିଛି ବିହାରରେ ।

ପ୍ରକୃତ ଘଟଣା: ବିହାର ସ୍ଥିତ ନୱାଦା ଜିଲ୍ଲା ନାରଦିଗଞ୍ଜ ଥାନା ଅଞ୍ଚଳର କହୁଆରା ଗାଁରେ କିଛି ସାଇବର ଠକ ସକ୍ରିୟ ଥିଲେ ।

ଏହି ଠକମାନେ ଦେଶର ବିଭିନ୍ନ ରାଜ୍ୟର ଲୋକଙ୍କୁ କଲ୍ କରି ନିଯୁକ୍ତି ଅଫର ବିଷୟରେ ଜଣାଉଥିଲେ ।

ଏହି ଚାକିରି ଆଳରେ ସେମାନଙ୍କୁ ଲକ୍ଷାଧିକ ଟଙ୍କାର ଲୋଭ ଦେଖାଇ ନିଜ ଜାଲରେ ଫସାଉଥିଲେ ।

ଠକଙ୍କ କାରନାମା: ସେମାନେ ଆଲ୍ ଇଣ୍ଡିଆ ପ୍ରେଗନେଣ୍ଟ୍ ଜବ୍(ବେବି ବର୍ଥ ସର୍ଭିସ), ପ୍ଲେ ବୟ ସର୍ଭିସ ଇତ୍ୟାଦି ନାଁରେରେ ଲୋକଙ୍କୁ ଚାକିରି ଲୋଭ ଦେଖାଉଥିଲେ ।

ଏମିତିକି ନିଃସନ୍ତାନ ମହିଳାଙ୍କୁ ଗର୍ଭବତୀ କରାଇଲେ ସେମାନଙ୍କୁ ୫ ଲକ୍ଷ ଟଙ୍କା ମିଳିବ ବୋଲି ମଧ୍ୟ ଅଫର ଦେଉଥିଲେ ।

ଅନ୍ୟପଟେ ସନ୍ତାନ ନହେଲେ ୫୦ ହଜାର ଟଙ୍କା ମିଳିବ ବୋଲି ପ୍ରତିଶ୍ରୁତି ଦେଉଥିଲେ ।

ପଞ୍ଜିକରଣ ନାଁରେ ଲୁଟ୍: କୌଣସି ବ୍ୟକ୍ତିଙ୍କ ଠକଙ୍କ ଜାଲରେ ଛନ୍ଦି ହେଲେ ସେମାନଙ୍କ ଠାରୁ ପଞ୍ଜିକରଣ ନାଁରେ ମୋଟା ଅଙ୍କର ଫି ଚାର୍ଜ କରୁଥିଲେ ।

ଅନଲାଇନ୍ ପେମେଣ୍ଟ ମାଧ୍ୟରେ ପଞ୍ଜିକରଣ ଶୁଳ୍କ ୫୦୦ରୁ ଆରମ୍ଭ କରି ୨୦ ହଜାର ଟଙ୍କା ପର୍ଯ୍ୟନ୍ତ ଧାର୍ଯ୍ୟ କରାଯାଇଥିଲା ।

ପୋଲିସ ହାତରେ ଫୁଟେଜ୍: ନୱାଦାରେ ସାଇବର ଠକଙ୍କ ଏଭଳି କାରନାମା ବିଷୟରେ ଖବର ପାଇ ପୋଲିସ ଠିକଣା ସ୍ଥାନରେ ଚଢ଼ାଉ କରିଥିଲା ।

ଘଟଣାସ୍ଥଳରୁ ୩ ଜଣଙ୍କୁ ଗିରଫ କରିଥିଲା ପୋଲିସ । ସେମାନଙ୍କ ପାଖରୁ ୬ଟି ଆଣ୍ଡ୍ରଏଡ୍ ମୋବାଇଲ ଜବତ କରାଯାଇଥିଲା ।

ମୋବାଇଲ ଯାଞ୍ଚ୍ ସମୟରେ ହ୍ୱାଟ୍ସଆପ୍ ଫଟୋ, ଭିଡିଓ ଏବଂ ଲେଣଦେଣ ଟ୍ରାନଜାକ୍ସନର ପ୍ରମାଣ ମିଳିଥିଲା ।

ଗିରଫ ସାଇବର ଠକ:

ଗିରଫ ହୋଇଥିବା ସାଇବର ଠକ ହେଉଛନ୍ତି ନୱାଦା ନାରଦିଗଞ୍ଜ ଥାନା କହୁଆରା ଗାଁର ରାହୁଲ କୁମାର(୧୯), ଭୋଲା କୁମାର(୨୦) ଏବଂ ପ୍ରିନ୍ସ ରାଜ୍ ଓରଫ ପଂକଜ କୁମାର(୨୦) ।

ଧରାପଡ଼ିଥିବା ୩ ଜଣ ସାଇବର ଠକ ପୂର୍ବରୁ ଏଭଳି ମାମଲାରେ ଲିପ୍ତ ଥିବା ନେଇ କହିଛନ୍ତି ଡିଏସପି ମୁଖ୍ୟାଳୟ ଇମରାନ ପରଭେଜ୍ ।