ଛାତ୍ରଙ୍କ ପାଇଁ ବଦଳିଲା ଆମେରିକା ଭିସା ନିୟମ, ସୋସିଆଲ୍ ମିଡିଆ ଆକାଉଣ୍ଟ ହେବ ‘ସାର୍ବଜନୀନ’

ନୂଆଦିଲ୍ଲୀ: ଛାତ୍ର ଓ ଏକ୍ସଚେଞ୍ଜ ଭିଜିଟରମାନଙ୍କ ପାଇଁ ନୂଆ ଗାଇଡଲାଇନ୍ ଘୋଷଣା କଲା ଭାରତରେ ଥିବା ଆମେରିକୀୟ ଦୂତାବାସ । ଏଣିକି ଆଉ ରହିବନି ପ୍ରାଇଭେସୀ । ଯେଉଁମାନେ ନନ୍-ଇମିଗ୍ରାଣ୍ଟ ଭିସା ପାଇଁ F, M  କିମ୍ବା J କ୍ୟାଟେଗୋରୀରେ ଆବେଦନ କରିବେ, ସେମାନଙ୍କୁ ସେମାନଙ୍କ ସୋସିଆଲ୍ ମିଡିଆ ଆକାଉଣ୍ଟ ‘ସାର୍ବଜନୀନ’ କରିବାକୁ ପଡିବ ।

ଏହି ପଦକ୍ଷେପ ଫଳରେ ଆମେରିକାର ଅଫିସରମାନେ ଆବେଦନକାରୀଙ୍କ ପରିଚୟ ଓ ଯୋଗ୍ୟତା ଯାଞ୍ଚ କରିବାରେ ସୁବିଧା ହେବ ବୋଲି ଦୂତାବାସ ପକ୍ଷରୁ କୁହାଯାଇଛି ।

ଆଗରୁ ଭିସା ଆବେଦନ ପ୍ରକ୍ରିୟାରେ ଆମେରିକା ସରକାର ଆବେଦନକାରୀଙ୍କ ସୋସିଆଲ୍ ମିଡିଆର ହ୍ୟାଣ୍ଡଲ ତାଲିକା ଦରକାର କରୁଥିଲେ । କିନ୍ତୁ ଏହି ନୂଆ ବ୍ୟବସ୍ଥାରେ ସୋସିଆଲ ମିଡିଆରେ ପ୍ରାଇଭେସୀ ରେଷ୍ଟ୍ରିକସନ୍ ହଟାଇଦେବାକୁ ପଡିବ । ତେଣୁ ଆବେଦନକାରୀଙ୍କ ସଂପର୍କରେ ଅନଲାଇନରେ ଅଫିସରମାନେ ସହଜରେ ଜାଣିପାରିବେ ।

କିନ୍ତୁ ଏହା କେତେ ଦିନ ପାଇଁ ପବ୍ଲିକ ରହିବ, ତାହା କୁହାଯାଇନାହିଁ । ଆମେରିକାର ଆଇନ ଅନୁସାରେ ଆବେଦନକାରୀଙ୍କ ପରିଚୟ ଓ ପ୍ରବେଶ ଯାଞ୍ଚ ବେଳେ ସୁଗମ କରିବାକୁ ଏହି ପରିବର୍ତ୍ତନ କରାଯାଇଛି ବୋଲି X ରେ ସୂଚନା ଦିଆଯାଇଛି ।

2019ରୁ ସଂଯୁକ୍ତ ରାଷ୍ଟ୍ର ଆମେରିକା ଭିସା ଆବେଦନକାରୀଙ୍କୁ ପ୍ରବାସୀ ଏବଂ ଅଣ-ପ୍ରବାସୀ ଭିସା ଆବେଦନ ଫର୍ମରେ ସୋଲିଆଲ ମିଡିଆ ପ୍ରୋଫାଇଲ ପ୍ରଦାନ କରିବାକୁ ବାଧ୍ୟ କରିଛି ଆମେରିକୀୟ ଦୂତାବାସ ।

ଏହି ସମୟରେ, ଆମେରିକା ସରକାର 2025 ଶେଷ ପର୍ଯ୍ୟନ୍ତ ଏକ ନୂତନ ଯାତ୍ରା ପ୍ରତିବନ୍ଧକ ମଧ୍ୟ ପ୍ରକାଶ କରିଛନ୍ତି ।  ଯେଉଁଥିରେ 12 ଟି ଦେଶର ନାଗରିକଙ୍କୁ ସମ୍ପୂର୍ଣ୍ଣ ଭାବରେ ପ୍ରତିବନ୍ଧକ ଲଗାଯାଇଛି ଏବଂ ଅନ୍ୟ ସାତଟି ଦେଶକୁ ଭିସା ପ୍ରବେଶକୁ ଆଂଶିକ ଭାବରେ ପ୍ରତିବନ୍ଧିତ ଲଗାଯାଇଛି।

ଏହି ପଦକ୍ଷେପ ଜାତୀୟ ସୁରକ୍ଷାକୁ ପ୍ରାଥମିକତା ଦିଏ ଏବଂ ସୁରକ୍ଷା ତ୍ରୁଟି ଏବଂ ଆତଙ୍କବାଦକୁ ନେଇ ବିପଦରେ ଥିବା ଦେଶଗୁଡ଼ିକ ଉପରେ ଧ୍ୟାନ କେନ୍ଦ୍ରିତ କରେ। ସର୍ବାଧିକ ପ୍ରଭାବିତ ଦେଶଗୁଡ଼ିକ ମଧ୍ୟପ୍ରାଚ୍ୟ ଏବଂ ଆଫ୍ରିକାରେ ଅଛନ୍ତି ବୋଲି ଜଣାପଡିଛି।