ଭାରତରେ ଆମେରିକୀୟ ଦୂତାବାସ ଭିସା ଆବେଦନ ପାଇଁ ଜାରି କଲା ନୂଆ ଚେତାବନୀ, ଜାଣନ୍ତୁ ଆଗକୁ କ’ଣ ହେବ ?

ନୂଆଦିଲ୍ଲୀ: ଭାରତରେ ଥିବା ଆମେରିକୀୟ ଦୂତାବାସ ଆମେରିକା ଯାତ୍ରା କରୁଥିବା ଭାରତୀୟ ନାଗରିକଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଚେତାବନୀ ଜାରି କରିଛି। ଏହି ଚେତାବନୀ ଅନୁଯାୟୀ, ଭିସା ନିୟମର ଉଲ୍ଲଂଘନ କରି ଆମେରିକାରେ ନିର୍ଦ୍ଧାରିତ ସମୟରୁ ଅଧିକ ରହୁଥିବା ବ୍ୟକ୍ତିଙ୍କୁ ନିର୍ବାସନ (ଡିପୋର୍ଟେସନ) ଏବଂ ଆମେରିକା ପ୍ରବେଶ ଉପରେ ସ୍ଥାୟୀ ନିଷେଧାଜ୍ଞାର ସମ୍ମୁଖୀନ ହେବାକୁ ପଡ଼ିପାରେ।

ଦୂତାବାସ ଅନୁଯାୟୀ, ଏଫ (F), ଏମ (M), ଏବଂ ଜେ (J) ଶ୍ରେଣୀର ଷ୍ଟୁଡେଣ୍ଟ ଭିସା ଆବେଦନକାରୀଙ୍କୁ ସେମାନଙ୍କ ସୋସିଆଲ ମିଡିଆ ଆକାଉଣ୍ଟଗୁଡ଼ିକୁ ପବ୍ଲିକ କରିବାକୁ ପଡ଼ିବ, ଯାହା ଦ୍ୱାରା ସେମାନଙ୍କ ପୃଷ୍ଠଭୂମି ଯାଞ୍ଚ କରାଯାଇପାରିବ। ଏହି ନିୟମ ଆମେରିକୀୟ ଆଇନ ଅନୁଯାୟୀ ଆବେଦନକାରୀଙ୍କ ପରିଚୟ ଓ ଯୋଗ୍ୟତା ନିରୂପଣ ପାଇଁ ଲାଗୁ ହେଉଛି।

ଆମେରିକୀୟ ଦୂତାବାସ ଏକ ବିବୃତିରେ କହିଛି, “ଯଦି ଆପଣ ନିର୍ଦ୍ଧାରିତ ସମୟଠାରୁ ଅଧିକ ଆମେରିକାରେ ରହୁଛନ୍ତି, ତେବେ ଆପଣଙ୍କୁ ନିର୍ବାସିତ କରାଯାଇପାରେ ଏବଂ ଭବିଷ୍ୟତରେ ଆମେରିକା ପ୍ରବେଶ ଉପରେ ସ୍ଥାୟୀ ନିଷେଧାଜ୍ଞା ଲାଗୁ ହୋଇପାରେ।” ଏହା ସହିତ, ଅବୈଧ ଇମିଗ୍ରେସନ ଓ ଭିସା ଜାଲିଆତି ରୋକିବା ପାଇଁ ଆମେରିକୀୟ ସରକାର କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। ଏହି ଚେତାବନୀ ଟୁରିଷ୍ଟ, ଷ୍ଟୁଡେଣ୍ଟ ଏବଂ ଓ୍ଵାର୍କ ପରମିଟ ଭିସା ଧାରୀଙ୍କ ପାଇଁ ମଧ୍ୟ ଲାଗୁ ହେଉଛି।

ଏହା ବ୍ୟତୀତ, ଆମେରିକୀୟ ବିଦେଶ ମନ୍ତ୍ରଣାଳୟ ଭାରତରେ କିଛି ଟ୍ରାଭେଲ ଏଜେନ୍ସି ଓ ଅଧିକାରୀଙ୍କ ଉପରେ ଭିସା ଜାଲିଆତି ଅଭିଯୋଗରେ ପ୍ରତିବନ୍ଧକ ଲଗାଇଛି। ଏହି ନିୟମ ଅନୁଯାୟୀ, ଜାଲିଆତିରେ ଦୋଷୀ ସାବ୍ୟସ୍ତ ବ୍ୟକ୍ତିଙ୍କୁ ଆମେରିକା ପ୍ରବେଶରେ ସ୍ଥାୟୀ ନିଷେଧାଜ୍ଞାର ସମ୍ମୁଖୀନ ହେବାକୁ ପଡ଼ିପାରେ।

ଏହି ଚେତାବନୀ ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳରେ ଇମିଗ୍ରେସନ ନୀତିକୁ ଆହୁରି କଡ଼ାକଡ଼ି କରିବାର ପ୍ରୟାସକୁ ସୂଚାଉଛି। ତେଣୁ ଆମେରିକା ଯାତ୍ରା କରୁଥିବା ଭାରତୀୟ ନାଗରିକଙ୍କୁ ପରାମର୍ଶ ଦିଆଯାଇଛି ଯେ ସେମାନେ ନିଜ ଭିସା ନିୟମ ଓ ସମୟସୀମାକୁ କଡ଼ାକଡ଼ି ପାଳନ କରନ୍ତୁ, ଅନ୍ୟଥା ଗୁରୁତର ପରିଣାମ ଭୋଗିବାକୁ ପଡ଼ିପାରେ।