ମାଠିଆରେ ପାଣି ରଖି ପିଇଲେ ମିଳିଥାଏ ଅନେକ ଫାଇଦା, ଦୂର ହୁଏ ଥଣ୍ଡା ଏବଂ ଗଳା ସଂକ୍ରମଣଜନିତ ସମସ୍ୟା
ଆଗକାଳରେ ମାଟି ଜିନିଷର ଚାହିଦା ଅଧିକ ଥିଲା । ଲୋକ ମାଟିରେ ତିଆରି ମାଠିଆ ଓ ସୁରେଇ ଆଦିକୁ ବ୍ୟବହାର କରୁଥିଲେ । ଏଥିରେ ପାଣି ରଖି ପିଇବା ଦ୍ୱାରା ଶାରୀରିକ ଓ ମାନସିକ ସ୍ତରରେ ବେଶ୍ ଆରାମ ମିଳୁଥିଲା । କୌଣସି ପ୍ରକାର ରୋଗ କିମ୍ବା ସଂକ୍ରମଣ ହେବାର ଭୟ ନଥିଲା । କିନ୍ତୁ ଯୁଗ ବଦଳିବା ସହ ଲୋକଙ୍କ ମାନସିକତା ଓ ରୁଚି ମଧ୍ୟ ବଦଳିଛି । ବର୍ତ୍ତମାନ ସମୟରେ ଫ୍ରିଜ ପାଣିକୁ ଲୋକେ ବହୁଳ ମାତ୍ରାରେ ବ୍ୟବହାର କରୁଛନ୍ତି । ଯାହାକି ବିଭିନ୍ନ ସ୍ୱାସ୍ଥ୍ୟ ସମସ୍ୟାକୁ ଡାକିଆଣୁଛି । ଘରେ ଘରେ ଫ୍ରିଜ୍ରେ ପାଣିକୁ ଥଣ୍ଡା କରି ପିଇବା ଅନେକଙ୍କର ଅଭ୍ୟାସ ହୋଇଗଲାଣି ।
ତେବେ ଆସନ୍ତୁ ଜାଣିବା ମାଠିଆ ପାଣିରୁ ଆମକୁ କଣ ସ୍ବାସ୍ଥ୍ୟଗତ ଫାଇଦା ମିଳେ । ମାଠିଆ ପାଣିରେ ଅନେକ ଔଷଧୀୟ ଗୁଣ ରହିଛି । ଖାସ୍ କଥା ହେଲା, ଏହି ପାଣିକୁ ନିୟମିତ ପିଇଲେ ଶରୀରର ରୋଗପ୍ରତିରୋଧକ ଶକ୍ତି ବୃଦ୍ଧି ହୋଇଥାଏ । ଏହାବ୍ୟତୀତ ମାଠିଆ ପାଣି ପିଇଲେ ଗଳା ସଂକ୍ରମଣର ଆଶଙ୍କା ନଥାଏ । ଫ୍ରିଜ୍ ପାଣି ଯୋଗୁ ଅନେକ ସମୟରେ ଥଣ୍ଡା ଏବଂ ଗଳା ସଂକ୍ରମଣଜନିତ ସମସ୍ୟା ଉପୁଜିଥାଏ । କିନ୍ତୁ ମାଠିଆ ପାଣି ସମ୍ପୂର୍ଣ୍ଣ ଶୁଦ୍ଧ । ଏହାକୁ ଯେତେ ବାସି କରି ପିଇବେ ପେଟଜନିତ ବିଭିନ୍ନ ସମସ୍ୟାରୁ ସୁରକ୍ଷା ପାଇପାରିବେ ।
-ମାଠିଆରେ ପାଣି ରଖି ପିଇବା ଦ୍ୱାରା ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ ।
-ମାଟି ପାତ୍ରରେ ପାଣି ରଖି ପିଇଲେ ହୃଦ ରୋଗରୁ ମୁକ୍ତି ମିଳିବା ସହ ହୃଦୟ ସୁସ୍ଥ ରହେ ।
-ମାଠିଆରେ କୌଣସି ଟେକ୍ନୋଲୋଜି ବ୍ୟବହାର ନକରାଯାଇ ମଧ୍ୟ ପାଣି ଥଣ୍ଡା ରହେ । ଯାହା ଆମକୁ ଏସଡ଼ିଟି ଭଳି ସମସ୍ୟାଠାରୁ ମୁକ୍ତି ଦେଇଥାଏ ।
-ଯେଉଁମାନେ ଶ୍ୱାସରୋଗୀ ହୋଇଥିବେ ସେମାନେ ମାଠିଆ ପାଣି ପିଇବା ଆବଶ୍ୟକ ।
-ସକାଳୁ ଉଠି ମାଠିଆ ପାଣି ପିଇବା ଦ୍ୱାରା ଦୃଷ୍ଟିଶକ୍ତି ବୃଦ୍ଧି ପାଇଥାଏ ଓ ଥକ୍କାପଣ ଦୂର ହୋଇଥାଏ ।
