‘ଏଥର ରାଖୀ ବାନ୍ଧି ପାରିବି ନାହିଁ…’: ଆତ୍ମହତ୍ୟା ପୂର୍ବରୁ ଭାଇ ପାଇଁ ହୃଦୟବିଦାରକ ଚିଠି

ଆନ୍ଧ୍ରପ୍ରଦେଶ: ଆତ୍ମହତ୍ୟା ପୂର୍ବରୁ ଭାଇ ପାଇଁ ଭଉଣୀ ଲେଖିଲା ହୃଦୟବିଦାରକ ଚିଠି। ଆନ୍ଧ୍ରପ୍ରଦେଶର କୃଷ୍ଣା ଜିଲ୍ଲା ଉୟୁରୁ ମଣ୍ଡଳର କଲାଭାପାମୁଲା ଗାଁରେ ୨୪ ବର୍ଷୀୟା ଯୁବତୀ ଶ୍ରୀବିଦ୍ୟା, ଯିଏ ଏକ ଘରୋଇ ମହାବିଦ୍ୟାଳୟରେ ଅଧ୍ୟାପିକା ଭାବେ କାର୍ଯ୍ୟ କରୁଥିଲେ, ବିବାହର ମାତ୍ର ୬ ମାସ ପରେ ଆତ୍ମହତ୍ୟା କରିଛନ୍ତି।

ସେ ତାଙ୍କ ଭାଇଙ୍କ ନାମରେ ଏକ ଚିଠି ଲେଖିଛନ୍ତି, ଯେଉଁଥିରେ ଲେଖାଯାଇଛି, “ସାବଧାନ ରୁହ ମୋ ଭାଇ, ଏଥର ମୁଁ ତୁମ ହାତରେ ରାଖୀ ବାନ୍ଧିପାରିବି ନାହିଁ।”

ଶ୍ରୀବିଦ୍ୟା ୬ ମାସ ପୂର୍ବରୁ ଗାଁ ସର୍ଭେୟାର ରାମବାବୁଙ୍କୁ ବିବାହ କରିଥିଲେ। ଚିଠିରେ ସେ ଅଭିଯୋଗ କରିଛନ୍ତି ଯେ, ବିବାହର ମାତ୍ର ଏକ ମାସ ପରେ ରାମବାବୁ ତାଙ୍କୁ ନିୟମିତ ଶାରୀରିକ ଓ ମାନସିକ ନିର୍ଯାତନ ଦେବା ଆରମ୍ଭ କରିଥିଲେ।

ରାମବାବୁ ପ୍ରାୟତଃ ମଦ୍ୟପାନ କରି ଘରକୁ ଫେରୁଥିଲେ, ତାଙ୍କୁ ମାଡ଼ ମାରୁଥିଲେ, ଅନ୍ୟ ମହିଳାଙ୍କ ସାମ୍ନାରେ ତାଙ୍କୁ ଗାଳି ଗୁଲଜ କରି ଅପମାନ ଦେଉଥିଲେ। କେବଳ ସେତିକି ନୁହେଁ, ସେ ତାଙ୍କ ମୁଣ୍ଡକୁ ଖଟରେ ପିଟିବା ସହିତ ବାଡ଼ିରେ ବାଡ଼ଉଥିଲେ।

ଏହି ନିର୍ମମ ନିର୍ଯାତନ ଶ୍ରୀବିଦ୍ୟାଙ୍କ ପାଇଁ ଅସହ୍ୟ ହୋଇପଡ଼ିଥିଲା, ଯାହା ତାଙ୍କୁ ଏହି ଚରମ ପଦକ୍ଷେପ ନେବାକୁ ବାଧ୍ୟ କରିଥିଲା।

ଚିଠିରେ ଶ୍ରୀବିଦ୍ୟା ତାଙ୍କ ସ୍ୱାମୀ ଓ ଶ୍ୱଶୁରଘର ଲୋକଙ୍କୁ ତାଙ୍କ ମୃତ୍ୟୁ ପାଇଁ ଦାୟୀ କରିଛନ୍ତି ଏବଂ ସେମାନଙ୍କୁ “କୌଣସି ଅବସ୍ଥାରେ ଛାଡ଼ି ଦିଆଯିବା ଉଚିତ ନୁହେ” ବୋଲି ଲେଖିଛନ୍ତି। ସ୍ଥାନୀୟ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଉୟୁରୁ ପୋଲିସ ରାମବାବୁ ଓ ତାଙ୍କ ପରିବାର ସଦସ୍ୟଙ୍କୁ ଜେରା କରୁଛି।