20 ବର୍ଷୀୟ ଯୁବକ ଗଢ଼ିଲେ ନିଜର ଦେଶ, ହେଲେ ରାଷ୍ଟ୍ରପତି!

ବ୍ରିଟେନ: କେବେ ଆପଣ ଭାବିଛନ୍ତି କି ନିଜର ଗୋଟିଏ ଦେଶ ଗଢିବେ ବୋଲି? ଏହା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ, ଜଣେ 20 ବର୍ଷୀୟ ଯୁବକ ଏହାକୁ ସତ କରି ଦେଖାଇଛନ୍ତି।

ବ୍ରିଟେନର ଡାନିୟଲ ଜ୍ୟାକସନ ନାମକ ଏହି ଯୁବକ କ୍ରୋଏସିଆ ଓ ସର୍ବିଆ ମଧ୍ୟରେ ଥିବା ଏକ ବିବାଦୀୟ ଜମିଖଣ୍ଡରେ ନିଜକୁ ଏକ ସ୍ୱ-ଘୋଷିତ ଦେଶର ରାଷ୍ଟ୍ରପତି ଘୋଷଣା କରିଛନ୍ତି। ଏହା ସହିତ ତାଙ୍କ ଦେଶରେ ରହିଛି ନିଜସ୍ୱ ପତାକା, ମନ୍ତ୍ରୀମଣ୍ଡଳ, ମୁଦ୍ରା ଏବଂ ପ୍ରାୟ 400 ଜଣ ନାଗରିକ। ଏହି ଦେଶର ନାମ ହେଉଛି ଫ୍ରି ରିପବ୍ଲିକ ଅଫ ଭେର୍ଡିସ।

ଡେନ୍ୟୁବ ନଦୀ କୂଳରେ 125 ଏକରରୁ ମଧ୍ୟ କମ୍‌ ଜଙ୍ଗଲ ଅଞ୍ଚଳରେ ଅବସ୍ଥିତ ଏହି ମାଇକ୍ରୋନେସନ ହେଉଛି ଭେର୍ଡିସ। ଡାନିୟଲ ଜଣାଇଛନ୍ତି ଯେ, କ୍ରୋଏସିଆ ଓ ସର୍ବିଆ ମଧ୍ୟରେ ସୀମା ବିବାଦ ହେତୁ ଏହି ଜମିଖଣ୍ଡ ଉପରେ କାହାର ଦାବି ନାହିଁ। ଏହି ଅଞ୍ଚଳ ‘ପକେଟ ଥ୍ରୀ’ ନାମରେ ଜଣାଶୁଣା।

ପ୍ରଥମତଃ ଅଷ୍ଟ୍ରେଲିଆର ବାସିନ୍ଦା ଡାନିୟଲ ଜ୍ୟାକସନ 30 ମଇ 2019ରେ ଏହି ଗଣତନ୍ତ୍ରର ସ୍ୱାଧୀନତା ଘୋଷଣା କରିଥିଲେ। ତାଙ୍କ ଦାବି ଅନୁସାରେ, ଭେର୍ଡିସ ଏବେ ବିଶ୍ୱର ଦ୍ୱିତୀୟ କ୍ଷୁଦ୍ରତମ ଦେଶ, ଯାହା ଭାଟିକାନ ସିଟି ପରେ ଆସୁଛି।

ପେଷାରେ ଜଣେ ଡିଜିଟାଲ ଡିଜାଇନର ଥିବା ଜ୍ୟାକସନ ରୋବୋକ୍ସରେ ଭର୍ଚୁଆଲ ଦୁନିଆ ତିଆରି କରି ଆୟ କରନ୍ତି। ସେ କହିଛନ୍ତି, “14 ବର୍ଷ ବୟସରୁ ମୋର ମାଇକ୍ରୋନେସନର ସ୍ୱପ୍ନ ଥିଲା। 18 ବର୍ଷ ବୟସରେ ଆମେ କିଛି ନିୟମ ଓ ପତାକା ତିଆରି କରି ଭେର୍ଡିସକୁ ବାସ୍ତବ ରୂପ ଦେବା ଆରମ୍ଭ କଲୁ। ଏବେ ଆମେ ଏକ ସରକାର ଓ ମନ୍ତ୍ରୀମଣ୍ଡଳ ଗଠନ କରିଛୁ।”

ଭେର୍ଡିସର ଆଧିକାରିକ ଭାଷା ହେଉଛି ଇଂରାଜୀ, କ୍ରୋଏସିଆନ ଓ ସର୍ବିଆନ, ଏବଂ ଏହା ମୁଦ୍ରା ଭାବେ ୟୁରୋ ବ୍ୟବହାର କରୁଛି। ଏହି ଦେଶକୁ କେବଳ କ୍ରୋଏସିଆର ଓସିଏକ ସହରରୁ ନୌକା ଯୋଗେ ପହଞ୍ଚିହେବ।