ଦେଶର ଦ୍ୱିତୀୟ ବୃହତ ସିମେଣ୍ଟ ଉତ୍ପାଦକ ପାଲଟିଲେ ଅଦାନୀ: ଏତିକି କୋଟି ଟଙ୍କାରେ କିଣିଲେ ଅମ୍ବୁଜା-ଏସିସି
ନୂଆଦିଲ୍ଲୀ: ଭାରତ ତଥା ଏସିଆର ଏକ ନମ୍ବର ଧନୀ ବ୍ୟକ୍ତି ଗୌତମ ଅଦାନୀ ଆଉ ଏକ ଜ୍ୟାକପଟ୍ ମାରିଛନ୍ତି । ବିଶ୍ୱର ୬ ନମ୍ବର ତଥା ଭାରତର ଏକ ନମ୍ବର ଧନୀ ବ୍ୟକ୍ତି ବର୍ତ୍ତମାନ ଭାରତର ଦ୍ୱିତୀୟ ବୃହତ ସିମେଣ୍ଟ ଉତ୍ପାଦନକାରୀ କମ୍ପାନୀ ପାଲଟିଛି । ୧୦.୫ ବିଲିୟନ୍ ଡଲାର ବା ଭାରତୀୟ ମୁଦ୍ରାରେ ୮୧୬୭ କୋଟି ଟଙ୍କା ବ୍ୟୟରେ ଅମ୍ବୁଜା-ଏସିସିକୁ କିଣିଛନ୍ତି ଅଦାନୀ । ସ୍ୱିଜରଲାଣ୍ଡର ହୋଲସିମ୍ ଅଧୀନରେ ରହିଥିବା ଏହି ଦୁଇ କମ୍ପାନୀର ୬୩.୧୯ ପ୍ରତିଶତ ଅଂଶଧନ କ୍ରୟ କରିଛି ଅଦାନୀ ।
ଏହି ଚୁକ୍ତି ସହିତ ଦେଶର ଦ୍ୱିତୀୟ ସିମେଣ୍ଟ ଉତ୍ପାଦନକାରୀ କମ୍ପାନୀ ପାଲଟିଛି ଅଦାନୀ । ଆଦିତ୍ୟ ବିର୍ଲା ଗ୍ରୁପର ଅଲଟ୍ରା ଟେକ୍ ଦେଶର ଏକ ନମ୍ବର ସିମେଣ୍ଟ ଉତ୍ପାଦନକାରୀ କମ୍ପାନୀ ରହିଛି । ଏହି ଅଧିଗ୍ରହଣ ଦୌଡରେ ଜେଏସପିଏଲ୍ ରହିଥିବା ବେଳେ ଅଧିକ ବିଡ୍ ସହିତ ଅଦାନୀ ଗ୍ରୁପ୍ ବାଜି ମାରି ନେଇଥିଲା ।
ଏହି ଚୁକ୍ତି ଫଳରେ ହୋଲସିମ୍ ୬.୪ ବିଲିୟନ୍ ସ୍ୱିସ୍ ଫ୍ରାଙ୍କ ଗ୍ରହଣ କରିବ । ଏହା ସହିତ ଓପନ ଅଫର ଜରିଆରେ ଅଧିକ ଅଂଶଧନ ଅଧିଗ୍ରହଣ ପାଇଁ ପ୍ରୟାସ କରାଯିବ ବୋଲି ଅଦାନୀ ଗ୍ରୁପ୍ ପକ୍ଷରୁ କୁହାଯାଇଛି । ଉଲ୍ଲେଖଯୋଗ୍ୟ ଯେ, ଅମ୍ବୁଜାର ୫୦ ପ୍ରତିଶତ ଅଂଶଧନ ଏସିସି ନିକଟରେ ରହିଥିବା ବେଳେ ଏହାର ୫୪.୫୩ ପ୍ରତିଶତ ଅଂଶଧନ କ୍ରୟ କରିଥିଲା ହୋଲ୍ସିମ୍ । ୨୦୨୨ ସୁଦ୍ଧା ଏହି ଚୁକ୍ତି ସମ୍ପୂର୍ଣ୍ଣ ହେବାକୁ ଥିବା ବେଳେ ଅଧିକ ଅଧିଗ୍ରହଣ ପାଇଁ ଅଦାନୀ ଗ୍ରୁପ୍ ପ୍ରୟାସ କରିବ ।
