ମାଟ୍ରିକ ରେଜଲ୍ଟରେ ଅସନ୍ତୁଷ୍ଟ ପିଲା କରିପାରିବେ ରି-ଚେକିଂ, ଜାଣନ୍ତୁ କେବେଠୁ ଆବେଦନ ?
ଭୁବନେଶ୍ୱର(ଓଡ଼ିଶା ଭାସ୍କର): ଆନୁଷ୍ଠାନିକ ଭାବେ ଆଜି ମାଟ୍ରିକ ରେଜଲ୍ଟ ଘୋଷଣା କରିଛନ୍ତି ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ । ତେବେ ମାଟ୍ରିକ ରେଜଲ୍ଟରେ ଅସନ୍ତୁଷ୍ଟ ପିଲା ରି-ଚେକିଂ କରାଇପାରିବେ । ରି-ଚେକିଂ ପାଇଁ ଜୁଲାଇ ୧୧ରୁ ଅନଲାଇନରେ ଆବେଦନ ଆରମ୍ଭ ହେବ । ଜୁଲାଇ ୧୧ରୁ ୨୫ ପର୍ଯ୍ୟନ୍ତ ଛାତ୍ରଛାତ୍ରୀମାନେ ରି-ଚେକିଂ ପାଇଁ ଆବେଦନ କରିପାରିବେ ।
ସୂଚନା ଅନୁସାରେ, ଚଳିତବର୍ଷ ମାଟ୍ରିକ ପରୀକ୍ଷା ପାସ୍ ହାର ୯୦.୫୫% ରହିଛି । ଚଳିତବର୍ଷ ୫ ଲକ୍ଷ ୨୬ ହଜାର ୮୧୮ ପିଲା ପରୀକ୍ଷା ଦେଇଥିବା ବେଳେ ୫, ୧୭,୮୪୭ ଜଣ ପାସ୍ କରିଛନ୍ତି ଓ ୮,୬୯୯ ଜଣ ଫେଲ୍ ହୋଇଛନ୍ତି । ପାସ୍ ପିଲାଙ୍କ ମଧ୍ୟରୁ ୨,୫୬,୮୭୭ ଜଣ ଛାତ୍ର ରହିଥିବା ୨,୬୦,୯୭୦ ଜଣ ଛାତ୍ରୀ ପାସ୍ ହୋଇଛନ୍ତି । ଚଳିତବର୍ଷ ଏ-୧ ଗ୍ରେଡରେ ୮ ହଜାର ୧୧୯ ଜଣ ଛାତ୍ରଛାତ୍ରୀ ରହିଥିବା ବେଳେ ଏ-୨ ଗ୍ରେଡରେ ୫୪ ହଜାର ୮୮୯ ଜଣ ଛାତ୍ରଛାତ୍ରୀ ରହିଛନ୍ତି । ସେହିପରି ବି-୧ ଗ୍ରେଡରେ ୧ ଲକ୍ଷ ୨୦ ହଜାର ୩୧୨ ଜଣ ଏବଂ ବି-୨ରେ ୧ ଲକ୍ଷ ୪୨ ହଜାର ୫୯୯ ଜଣ ଛାତ୍ରଛାତ୍ରୀ ସ୍ଥାନ ପାଇଛନ୍ତି । ତେବେ ପରୀକ୍ଷାରେ ୫୬.୯୯ ପ୍ରତିଶତ ପିଲା ୬୦%ରୁ ଅଧିକ ନମ୍ବର ରଖି ପାସ କରିଛନ୍ତି ।
ଚଳିତବର୍ଷ ପରୀକ୍ଷାରେ ରାଜ୍ୟର ୧୧୭୦ ସ୍କୁଲରେ ପାସ ହାର ଶତ ପ୍ରତିଶତ ରେକର୍ଡ ହୋଇଛି । ଅନ୍ୟ ପକ୍ଷରେ ମାଲକାନାଗିରିର ୨ଟି ଏବଂ ଅନୁଗୁଳର ଗୋଟିଏ ସ୍କୁଲରେ ଏହି ହାର ଶୂନ ପ୍ରତିଶତ ରହିଛି । ଏହି ତିନୋଟି ସ୍କୁଲର କୌଣସି ଛାତ୍ରଛାତ୍ରୀ ପାସ କରିନାହାନ୍ତି । ଅନୁଗୁଳର ଏହି ସ୍କୁଲରେ ମାତ୍ର ୨ ଜଣ ପିଲା ପାଠ ପଢୁଥିଲେ ବୋଲି ଜାଣିବାକୁ ମିଳିଛି ।
ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ଚଳିତ ବର୍ଷର ହାଇସ୍କୁଲ ସାର୍ଟିଫିକେଟ୍(ମାଟ୍ରିକ) ସହ ମଧ୍ୟମା, ରାଜ୍ୟ ମୁକ୍ତ ବିଦ୍ୟାଳୟ ସାର୍ଟିଫିକେଟ୍ ପରୀକ୍ଷାଫଳ ପ୍ରକାଶ ପାଇଛି । ବୁଧବାର ଦିନ ବୋର୍ଡ କାର୍ଯ୍ୟାଳୟ ଠାରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ , ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ସ୍ୱତନ୍ତ୍ର ଅତିଥି ଭାବେ ଯୋଗ ଦେଇ ମାଟ୍ରିକ୍, ମଧ୍ୟମା, ମୁକ୍ତ ବିଦ୍ୟାଳୟ-୨୦୨୨ ପରୀକ୍ଷା ଫଳ ପୁସ୍ତିକାକୁ ଲୋକାର୍ପଣ କରିଛନ୍ତି । http://bseodisha.ac.in, http://bseodisha.nic.in ରେଜଲ୍ଟ ଉପଲବ୍ଧ । ଅପରାହ୍ଣ ୨ଟା ପରେ ୱେବ୍ସାଇଟ୍ରେ ଉପଲବ୍ଧ ହେବ ରେଜଲ୍ଟ । SMS ଜରିଆରେ ମଧ୍ୟ ଆପଣ ପାଇପାରିବେ ମାଟ୍ରିକ୍ ପରୀକ୍ଷା ଫଳ । OR10 SPACE ରୋଲ ନମ୍ବର ଲେଖି ୫୬୭୬୭୫୦ ନମ୍ବରକୁ SMS କଲେ ଫଳ ପାଇହେବ ।
