(Video) ‘ହସ ଭାଇ, ଏପରି ସବୁ …’ ଏପରି ଟିମ୍ ଇଣ୍ଡିଆକୁ ଉତ୍ସାହିତ କଲେ ପ୍ରଧାନମନ୍ତ୍ରୀ ମୋଦୀ, ଦେଖନ୍ତୁ ଭିଡିଓ
ନୂଆଦିଲ୍ଲୀ: ୱାର୍ଲଡ କପ ଫାଇନାଲରେ ଭାରତୀୟ କ୍ରିକେଟ୍ ଦଳଙ୍କୁ ଅଷ୍ଟ୍ରେଲିଆ ବିପକ୍ଷରେ ପରାଜୟର ସମ୍ମୁଖୀନ ହେବାକୁ ପଡିଥିଲା। କ୍ରମାଗତ ୧୦ ଟି ମ୍ୟାଚ ଜିତି ଟିମ ଇଣ୍ଡିଆ ଫାଇନାଲରେ ପ୍ରବେଶ କରିଥିଲା କିନ୍ତୁ କଙ୍ଗାରୁ ଦଳ ଷଷ୍ଠ ଥର ପାଇଁ ଆୟୋଜକଙ୍କୁ ୬ ୱିକେଟରେ ପରାସ୍ତ କରି ଟ୍ରଫିକୁ ହାସଲ କରିଥିଲା। ପରାଜୟ ପରେ ଭାରତୀୟ ଖେଳାଳିମାନେ ବହୁତ ନିରାଶ ହୋଇଥିଲେ। ମହମ୍ମଦ ସିରାଜ ତାଙ୍କ ଭାବନାକୁ ନିୟନ୍ତ୍ରଣ କରିପାରୁ ନ ଥିବାବେଳେ ରୋହିତ ଶର୍ମା ଆଖିରୁ ଲୁହ ଝରାଇଥିଲେ। ବିରାଟ କୋହଲି ତାଙ୍କ ଲୁହ ଲୁଚାଇବା ପାଇଁ ତାଙ୍କ କ୍ୟାପ ବ୍ୟବହାର କରୁଥିବା ଦେଖିବାକୁ ମିଳିଥିଲା। ଏସବୁ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତୀୟ ଖେଳାଳିଙ୍କୁ ଉତ୍ସାହିତ କରିଛନ୍ତି। ରବିବାର ମ୍ୟାଚ୍ ପରେ ପ୍ରଧାନମନ୍ତ୍ରୀ ମୋଦୀ ଭାରତୀୟ ଡ୍ରେସିଂ ରୁମରେ ପହଞ୍ଚି କ୍ୟାପଟେନ ରୋହିତ ଶର୍ମା ଏବଂ ବିରାଟ କୋହଲିଙ୍କ ପିଠି ବାଡେଇ ସେମାନଙ୍କୁ ଉତ୍ସାହିତ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡଙ୍କ ସହ ରୋହିତ ଶର୍ମା, ବିରାଟ କୋହଲି ଏବଂ ଦଳର ଅନ୍ୟ ଖେଳାଳିଙ୍କୁ ସାନ୍ତ୍ୱନା ଦେଇଛନ୍ତି। ଯେତେବେଳେ ପ୍ରଧାନମନ୍ତ୍ରୀ ଟିମ୍ ଇଣ୍ଡିଆର ଡ୍ରେସିଂ ରୁମରେ ସେ ପହଞ୍ଚିଲେ ସେତେବେଳେ ସମସ୍ତ ଖେଳାଳିଙ୍କ ମୁହଁ ଶୁଖିଯାଇଥିଲା। ତେବେ ସେ ସେହି ପରିବେଶକୁ ଟିକେ ହାଲୁକା କରିବାକୁ ଚେଷ୍ଟା କରିଥିଲେ। ପ୍ରଧାନମନ୍ତ୍ରୀ ବିରାଟ ଏବଂ ରୋହିତଙ୍କ ପିଠି ବାଡେଇ କହିଛନ୍ତି ଯେ, ‘ଆପଣମାନେ ୧୦ ଟି ମ୍ୟାଚ୍ ଜିତିଛନ୍ତି। ଏହି ସବୁ ଖେଳରେ ଘଟେ, ହସ ଭାଇ, ଦେଶ ତୁମ ସମସ୍ତଙ୍କୁ ଦେଖୁଛି। ମୁଁ ଭାବିଲି ମୁଁ ତୁମ ସମସ୍ତଙ୍କୁ ଭେଟିବି। ଏପରି ସବୁ ଘଟେ। ‘
ବିରାଟ ଏବଂ ରୋହିତଙ୍କୁ ଭେଟିବା ପରେ ପ୍ରଧାନମନ୍ତ୍ରୀ ଟିମ୍ ଇଣ୍ଡିଆର ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡଙ୍କ ସହ ହାତ ମିଳାଇ ପଚାରିଥିଲେ, ‘ରାହୁଲ କେମିତି ଅଛନ୍ତି? ଆପଣମାନେ ସବୁ କଠିନ ପରିଶ୍ରମ କରିଛନ୍ତି କିନ୍ତୁ… ‘ଏହା ପରେ ପ୍ରଧାନମନ୍ତ୍ରୀ ରବିନ୍ଦ୍ର ଜାଡେଜାଙ୍କ ସହ ହାତ ମିଳାଇ ଗୁଜରାଟୀରେ କଥା ହୋଇଥିଲେ। ସେହିଭଳି ସେ ଶୁଭମାନ ଗିଲ, ସୂର୍ଯ୍ୟକୁମାର ଯାଦବ, ଜସପ୍ରୀତ ବୁମ୍ରା ଇତ୍ୟାଦିଙ୍କୁ ଭେଟିଥିଲେ।
PM with Team India pic.twitter.com/UJ1gYVd8Jv
— Aman Sharma (@AmanKayamHai_) November 21, 2023
