India vs Zimbabwe 4th T -20 : ପଦାର୍ପଣ କଲେ ତୁଷାର ଦେଶପାଣ୍ଡେ, କିଛି ସମୟ ପରେ ହରାରେ ଖେଳାଯିବ ମ୍ୟାଚ
ଓଡିଶା ଭାସ୍କର: ଭାରତ ଓ ଜିମ୍ବାୱେ ମଧ୍ୟରେ ଆଉ କିଛି ସମୟ ପରେ ଚତୁର୍ଥ ଟ୍ୱେଣ୍ଟି ଟ୍ୱେଣ୍ଟି ମ୍ୟାଚ ଖେଳାଯିବ । ଜିମ୍ବାୱେର ହରାରେରେ ମୁହାଁମୁହିଁ ହେବେ ଏହି ଦୁଇ ଦଳ । ଭାରତ ଏହି ସିରିଜରେ ୨-୧ ରେ ଆଗୁଅ ଅଛି । ଆଜି ମ୍ୟାଚ ଜିତି ଭାରତ ସିରିଜ କବ୍ଚା କରିବା ଲକ୍ଷ୍ୟରେ ପଡିଆକୁ ଓହ୍ଲାଇବ । ଭାରତୀୟ ଦଳ ଗତ ଦୁଇ ମ୍ୟାଚରେ ଦମଦାର ପ୍ରଦର୍ଶନ କରିଛି । ପ୍ରଥମ ମ୍ୟାଚରେ କିନ୍ତୁ ଟିମ୍ ଇଣ୍ଡିଆକୁ ମାତ ଦେଇଥିଲା ଘରୋଇ ଦଳ ଜିମ୍ବାୱେ । ସେପଟେ ସିକନ୍ଧର ରାଜାଙ୍କ ଦଳ ମଧ୍ୟ ଏହି ମ୍ୟାଚରେ ନୂଆ ରଣନୀତି ନେଇ ଆସିବ ।
ସିରିଜରେ ଟିମ୍ ଇଣ୍ଡିଆର ଯୁବ ଖେଳାଳି ଅଭିଷେକ ଶର୍ମା ନିଜର ପ୍ରଦର୍ଶନ ପାଇଁ ବେଶ୍ ଚର୍ଚ୍ଚାରେ ମଧ୍ୟ ରହିଛନ୍ତି । ସେ ପ୍ରଥମ ଦୁଇଟି ମ୍ୟାଚରେ ଭାରତ ପକ୍ଷରୁ ଓପନିଂ କରିଥିଲେ । ପ୍ରଥମ ମ୍ୟାଚରେ ତାଙ୍କ ବ୍ୟାଟ ଚାଲି ନଥିଲା । ମାତ୍ର ଦ୍ୱିତୀୟ ଟ୍ୱେଣ୍ଟି ଟ୍ୱେଣ୍ଟିରେ ଦମଦାର ଶତକ ହାସଲ କରିଥିଲେ । ତୃତୀୟ ମ୍ୟାଚରେ ଟିମ ଇଣ୍ଡିଆର ନୂଆ ଷ୍ଟାର ବ୍ୟାଟର ଅଭିଷେକ ମାତ୍ର ୧୦ ରନ କରିଥିଲେ । ଏହି ମ୍ୟାଚରେ ସେ ତୃତୀୟ ସ୍ଥାନରେ ଖେଳିବାକୁ ଆସିଥିଲେ । ଯଶସ୍ୱୀ ଜୟସ୍ୱାଲ ଆସିବା ପରେ ତାଙ୍କ ବ୍ୟାଟିଂ ଅର୍ଡରରେ ପରିବର୍ତ୍ତନ କରାଯାଇଥିଲା । ଚତୁର୍ଥ ମ୍ୟାଚରେ ପୁଣି ଥରେ ସେ ଓପନର ଭାବରେ ପଡିଆକୁ ଓହ୍ଲାଇ ପାରନ୍ତି । ଋତୁରାଜ ଗାୟକୱାଡ ମଧ୍ୟ ଏହି ମ୍ୟାଚରେ ଖେଳୁଛନ୍ତି । କାରଣ ତାଙ୍କ ପ୍ରଦର୍ଶନ ଏବେ ପର୍ଯ୍ୟନ୍ତ ଠିକ ଚାଲିଛି । ସେପଟେ ଶିବମ ଦୁବେ ଓ ସଞ୍ଜୁ ସାମସନ ଚତୁର୍ଥ ମ୍ୟାଚ ଖେଳିଛନ୍ତି । ରବି ବିଷ୍ଣୋଇଙ୍କ ଯାଦୁକରୀ ସ୍ପିନରେ ଦଳ ଝଲସୁଛି । ସେ ଚୂଡାନ୍ତ ଏକାଦଶରେ ନିଜସ୍ଥାନ ପକ୍କା କରିଛନ୍ତି । ସେପଟେ ତୁଷାର ଦେଶପାଣ୍ଡେ ନିଜର ପଦାର୍ପଣ ମ୍ୟାଚ ଖେଳିବେ ହରାରେରେ ।
ଭାରତର ଚୂଡାନ୍ତ ଏକାଦଶ: ଅଭିଷେକ ଶର୍ମା, ଶୁଭମନ ଗିଲ (ଅଧିନାୟକ), ଯଶସ୍ୱୀ ଜୟସ୍ୱାଲ, ଋତୁରାଜ ଗାୟକୱାଡ, ଶିବମ ଦୁବେ, ସଞ୍ଜୁ ସାମସନ (ୱିକେଟରକ୍ଷକ), ରିଙ୍କୁ ସିଂ, ୱାଶିଂଗଟନ ସୁନ୍ଦର, ରବି ବିଷ୍ଣୋଇ, ତୁଷାର ଦେଶପାଣ୍ଡେ, ଖଲିଲ ଅହମଦ
ଜିମ୍ବାୱେର ଚୂଡାନ୍ତ ଏକାଦଶ: ବେସ୍ଲି ମଧେବର, ତାଦିମାନଶେ ମାରୁମାନୀ/ଇନୋସେଣ୍ଟ କାଇୟା, ବ୍ରାଇନ ବେନେଟ, ସିକନ୍ଧର ରଜା (ଅଧିନାୟକ), ଡାୟୋନ ମାୟର୍ସ, ଜାଁନାଥନ କୈମ୍ପବେଲ, କ୍ଲାଇବ ମନ୍ଦାଣ୍ଡେ (ୱିକେଟ ରକ୍ଷକ ), ଫରାଜ ଆକ୍ରମ, ରିଚର୍ଡ ନଗାରୱା, ବ୍ଲେସିଙ୍ଗ ମୁଜରବାନୀ, ତେନ୍ଦଇ ଚତାରା