(Video) ତିରୁପତି ଲଡୁ ବିବାଦ; ତପସ୍ୟା କରିବେ ଉପ-ମୁଖ୍ୟମନ୍ତ୍ରୀ: ୧୧ ଦିନ ପର୍ଯ୍ୟନ୍ତ ଅନ୍ନ-ଜଳ ତ୍ୟାଗ କରି କରିବେ ପ୍ରାୟଶ୍ଚିତ
ଓଡ଼ିଶା ଭାସ୍କର: ଆଜିଠାରୁ ଆସନ୍ତା ୧୧ ଦିନ ପର୍ଯ୍ୟନ୍ତ ଧ୍ୟାନରେ ବସିବା ପାଇଁ ନିଷ୍ପତ୍ତି ନେଇଛନ୍ତି ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ପୱନ କଲ୍ୟାଣ । ସାଉଥ ସିନେମାର ସୁପରଷ୍ଟାର ତଥା ଆନ୍ଧ୍ରପ୍ରଦେଶର ଉପ-ମୁଖ୍ୟମନ୍ତ୍ରୀ ପୱନ କଲ୍ୟାଣ ନିଜର ଅୟସ ଆରାମ ଜୀବନକୁ ତ୍ୟାଗ କରି ଜଣେ ତପସ୍ୱୀ ଭାବରେ ଜୀବନ ଯାପନ କରିବା ପାଇଁ ନିଷ୍ପତ୍ତି ନେଇଛନ୍ତି । ଜଣେ ସନ୍ନ୍ୟାସୀଙ୍କ ପରି ଧ୍ୟାନରେ ବସି ରହିଛନ୍ତି ପୱନ କଲ୍ୟାଣ । ତିରୁପତି ମନ୍ଦିରର ଲଡ୍ଡୁ ଭୋଗରେ ବାହାରିଥିବା ଚର୍ବି ମାମଲାର ପ୍ରାୟଶ୍ଚିତ ପାଇଁ ପୁରା ରାତି ଦିନ ଏମିତି ଭଗବାନଙ୍କ ପାଖରେ ଧ୍ୟାନରେ ବସିବେ ବୋଲି କହିଛନ୍ତି ପଓବନ କଲ୍ୟାଣ ।
ଆନ୍ଧ୍ରପ୍ରଦେଶର ତିରୁପତି ବାଲାଜୀ ମନ୍ଦିରର ପ୍ରସାଦକୁ ନେଇ ବିବାଦ ବଢିବାରେ ଲାଗିଛି । ଏହି ପ୍ରସଙ୍ଗକୁ ନେଇ ସାରା ଦେଶରେ ଖୁବ୍ ଆଲୋଚନା ଲାଗି ରହିଛି । ଏଠାରେ ପ୍ରସାଦ ରୂପେ ଦିଆଯାଉଥିବା ଲଡୁରେ ପଶୁ ଚର୍ବି ଓ ମାଛ ତେଲ ମିଶୁଥିବା ନେଇ ଅଭିଯୋଗ ପରେ ଏହାକୁ ନେଇ ରାଜନୀତି ଜୋର ଧରିଛି । ଏହାଭିତରେ ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ପୱନ କଲ୍ୟାଣ ଶନିବାର ଏକ ବଡ଼ ଘୋଷଣା କରିଛନ୍ତି । ଏଭଳି ଏକ ଘଟଣାର ପ୍ରାୟଶ୍ଚିତ ସ୍ୱରୂପ ଆସନ୍ତା ୧୧ ଦିନ ପର୍ଯ୍ୟନ୍ତ ଉପବାସ ପାଳନ କରିବା ନେଇ କହିଛନ୍ତି ଉପ-ମୁଖ୍ୟମନ୍ତ୍ରୀ ପୱନ କଲ୍ୟାଣ । ଏ ନେଇ ସେ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ ସେୟାର କରି ସୂଚନା ଦେଇଛନ୍ତି । ଆଜି ଠାରୁ ୧୧ ଦିନ ପର୍ଯ୍ୟନ୍ତ ଉପବାସ ରହିବେ ପବନ କଲ୍ୟାଣ । ନାମ୍ବୁରର ଶ୍ରୀ ଦଶାବତାର ଭେଙ୍କଟେଶ୍ୱର ସ୍ୱାମୀ ମନ୍ଦିରରେ ସେ ୧୧ ଦିନିଆ ‘ପ୍ରାୟଶ୍ଚିତ ଦିକ୍ଷା’ ଗ୍ରହଣ କରିବେ । ‘ତିରୁପତି ପ୍ରସାଦମ’ ପ୍ରତି ହୋଇଥିବା ଅପମାନକୁ ନେଇ ସେ ଗଭୀର ଦୁଃଖ ପ୍ରକାଶ କରିଛନ୍ତି । ସେ କହିଛନ୍ତି ଯେ, ଜଗନ୍ ମୋହନ ରେଡ୍ଡୀଙ୍କ ସରକାର ସମୟରେ ଘଟିଥିବା ଏହି ଘଟଣା ତାଙ୍କୁ ଆଘାତ ପହଞ୍ଚାଇଛି ।
ପବନ କଲ୍ୟାଣ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି କହିଛନ୍ତି, ହେ ପ୍ରଭୁ ବାଲାଜୀ! ମୋତେ କ୍ଷମା କର । ‘ବ୍ୟକ୍ତିଗତ ସ୍ତରରେ ଆମ ସଂସ୍କୃତି, ଆସ୍ଥା, ବିଶ୍ୱାସ ଏବଂ ସମ୍ମାନର କେନ୍ଦ୍ରସ୍ଥଳ ଶ୍ରୀ ତିରୁପତି ବାଲାଜୀ ଧାମର ପ୍ରସାଦକୁ ଭ୍ରଷ୍ଟ କରିବା ପାଇଁ କରାଯାଇଥିବା ମନ୍ଦ ଉଦ୍ୟମ ଦ୍ୱାରା ମୁଁ ଅତ୍ୟଧିକ ଯନ୍ତ୍ରଣା ଅନୁଭବ କରୁଛି । ସତ କହିବାକୁ ଗଲେ, ମୁଁ ଭିତରୁ ଅତ୍ୟଧିକ କ୍ଷତ ଅନୁଭବ କରୁଛି । ବର୍ତ୍ତମାନ, ଏହି ମୁହୂର୍ତ୍ତରେ, ମୁଁ ଭଗବାନଙ୍କ ନିକଟରେ କ୍ଷମା ପ୍ରାର୍ଥନା କରୁଛି ଏବଂ ପ୍ରାୟଶ୍ଚିତର ଶପଥ ନେଉଛି । ୧୧ ଦିନ ଉପବାସ କରିବାକୁ ଏକ ଧାର୍ମିକ ସଂକଳ୍ପ ନେଉଛି । ୧୧ ଦିନ ପରେ ମୁଁ ତିରୁପତି ଯାଇ ପ୍ରଭୁଙ୍କୁ ଦର୍ଶନ କରି କ୍ଷମା ପ୍ରାର୍ଥନା କରିବା ପରେ ହିଁ ଭଗବାନଙ୍କ ନିକଟରେ ମୋର ପ୍ରାୟଶ୍ଚିତ କାର୍ଯ୍ୟ ସମାପ୍ତ ହେବ ।’