ଷ୍ଟାର୍ଟ ହେଲାନି ବାଇକ୍, ମାଚିସ୍ ମାଗି ନିଆଁ ଲଗାଇ ଦେଲେ ଯୁବକ

ଓଡ଼ିଶା ଭାସ୍କର: ଦିନ ପ୍ରତିଦିନ କିଛି ଅଜବଗଜବ ଘଟଣା ଆମ ଚାରିପାଖରେ ଘଟିଥାଏ। ଏମିତି ଏକ ଘଟଣା ଘଟିଛି, ଜମ୍ମୁ-କଶ୍ମୀର ଶ୍ରୀନଗର ଯିବା ବାଟରେ। ଜଣେ ଯୁବକ ନିଜ ବାଇକରେ ନିଆଁ ଲଗେଇ ଜାଳି ଦେଇଛନ୍ତି।

ଖାଲି ସେତିକି ନୁହେଁ ଯୁବକ ଜଣକ ବାଇକକୁ ପୋଡ଼ି ପାଉଁଶ କରିବା ପୂର୍ବରୁ ସେଥିରେ ନିଆଁ ପୁଆଁଇଥିବା ସ୍ଥାନୀୟ ଲୋକେ କହିଛନ୍ତି। ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ, ଯୁବକ ଜଣକ ରାସ୍ତା କଡ଼ରେ ବାଇକ୍ ପାର୍କ କରି ତାକୁ ଷ୍ଟାର୍ଟ କରିବାକୁ ଲାଗିଲେ।

କିନ୍ତୁ ବହୁଥର କିକ୍ ମାରିବା ପରେ ମଧ୍ୟ ବାଇକ୍ ଷ୍ଟାର୍ଟ ହୋଇ ନ ଥିଲା। ଏହାପରେ ରାସ୍ତା କଡ଼ରେ ଛିଡ଼ା ହୋଇ ସିଗାରେଟ୍ ଟାଣୁଥିବା ଜଣେ ବ୍ୟକ୍ତିଙ୍କ ପାଖରୁ ଉକ୍ତ ଯୁବକ ମାଚିସ୍ ମାଗିଆଣିଥିଲେ।

ଏହାପରେ ବାଇକରୁ ପେଟ୍ରୋଲ ବାହାର କରି ଗାଡ଼ିରେ ନିଆଁ ଲଗେଇ ଦେଇଥିଲେ। କିଛି ସମୟ ତା’ ପାଖରେ ରହି ନିଆଁ ମଧ୍ୟ ପୁଆଁଇଥିଲେ ଯୁବକ। ଏହାପରେ ସେଠାରୁ କେଉଁଆଡ଼େ ଚାଲିଯାଇଥିଲେ।

ଏ ଘଟଣାର ଭିଡିଓ ସୋସିଆଲ ମଡିଆରେ ଭାଇରାଲ ମଧ୍ୟ ହୋଇଛି। ଏହାପୂର୍ବରୁ ଗତ ୩ ତାରିଖରେ ଉତ୍ତର ପ୍ରଦେଶ କାନପୁରସ୍ଥିତ ଗୋବିନ୍ଦ ନଗରରେ ଜଣେ ଯୁବକ ସ୍କୁଟିରେ ନିଆଁ ଲଗେଇ ପୋଡ଼ି ଦେଇଛନ୍ତି।

ସ୍କୁଟି ଷ୍ଟାର୍ଟ ନ ହେବା କାରଣରୁ ଯୁବକ ରାଗିଯାଇ ଏପରି କରିଥିବା ସ୍ଥାନୀୟ ଲୋକେ କହିଛନ୍ତି। ପୋଲିସ ଘଟଣାର ସୂଚନା ପାଇ ସେଠାରେ ପହଞ୍ଚିଥିବାବେଳେ ବର୍ତ୍ତମାନ ସୁଦ୍ଧା ଉକ୍ତ ଯୁବକଙ୍କୁ ଖୋଜି ପାଉନାହିଁ।