ଚାମ୍ପିଅନ୍ସ ଟ୍ରଫି ପାଇଁ ଦଳ ଘୋଷଣା ଆଜି, ରୋହିତ ନେତୃତ୍ବ ନେବେ

ମୁମ୍ବାଇ: ଆଗାମୀ ଇଂଲଣ୍ଡ ବିପକ୍ଷ ଘରୋଇ ଦିନିକିଆ ସିରିଜ ଓ ଚାମ୍ପିଅନ୍ସ ଟ୍ରଫି ପାଇଁ ଶନିବାର ଭାରତୀୟ ଦଳ ଘୋଷଣା ହେବ। ରୋହିତ ଶର୍ମା ଉଭୟ ସିରିଜର ନେତୃତ୍ବ ନେବା ନିଶ୍ଚିତ। ଶନିବାର ରୋହିତ ଓ ଚୟନ କମିଟି ଅଧ୍ୟକ୍ଷ ଅଜିତ ଅଗରକର ମିଳିତ ଭାବେ ଗଣମାଧ୍ୟମ ସମ୍ମୁଖରେ ଦଳ ଘୋଷଣା କରିବେ ବୋଲି ବିସିସିଆଇ ପ୍ରକାଶ କରିଛି।

ଗତ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜର ଅନ୍ତିମ ମ୍ୟାଚ୍ ରେ ରୋହିତ ଖେଳି ନଥିଲେ। ଅଧିନାୟକ ଥିବା ସତ୍ତ୍ୱେ ଖରାପ ଫର୍ମ ଦର୍ଶାଇ ସେ ନିଜେ ଓହରି ଯାଇଥିଲେ। ରୋହିତଙ୍କ ଏହି ନିଷ୍ପଭିକୁ ପ୍ରଶଂସା କରାଯାଇଥିଲେ ହେଁ ଅନେକ କ୍ରିକେଟ୍ ସମୀକ୍ଷକ ସମାଲୋଚନା ମଧ୍ୟ କରିଥିଲେ।

ଆଗାମୀ ଦିନରେ ତାଙ୍କୁ ଆଉ ଅଧିନାୟକ ଭାବେ ଦେଖିବାକୁ ମିଳିବ କି ନାହିଁ, ଜାଣିବା ପାଇଁ କ୍ରିକେଟ୍ ପ୍ରେମୀ ଉତ୍ସୁକତାର ସହ ଅପେକ୍ଷା କରିଥିଲେ। ରୋହିତ ଓ ଅଗରକର ମିଳିତ ଭାବେ ଦଳ ଘୋଷଣା କରିବେ ବୋଲି ଦର୍ଶାଇ ବିସିସିଆଇ ସବୁ ଆଶଙ୍କାର ଅନ୍ତ ଘଟାଇଛି।