ଲୋକସଭାରେ ଆଜି ଆଗତ ହେବ ସଂଶୋଧିତ ୱାକଫ ବିଲ୍, ୮ ଘଣ୍ଟା ଚାଲିବ ଚର୍ଚ୍ଚା
ଆଜି ସଂସଦରେ ଆଗତ ହେବ ସଂଶୋଧିତ ୱାକଫ ବିଲ୍
ନୂଆଦିଲ୍ଲୀ: ଲୋକସଭାରେ ଆଜି ଦ୍ୱିପ୍ରହର ୧୨ଟାରେ ୱାକଫ ବିଲ୍ ଆଗତ କରାଯିବ । ସଂସଦୀୟ କାର୍ଯ୍ୟମନ୍ତ୍ରୀ କିରେନ ରିଜିଜୁ ଏହି ବିଲକୁ ଲୋକସଭାରେ ଜାରି କରିବେ ।
ଏହି ବିଲ ଉପରେ ଚର୍ଚ୍ଚା ପାଇଁ ୮ ଘଣ୍ଟା ସମୟ ଧାର୍ଯ୍ୟ କରାଯାଇଛି । ସରକାର କହିଛନ୍ତି ଯେ, ଯଦି ସଂସଦର ସହମତି ରୁହେ ତେବେ ଏହି ଚର୍ଚ୍ଚାର ସମୟକୁ ବଢାଯିବ ।
ବିଜେପି ନିଜ ସମସ୍ତ ସାଂସଦଙ୍କ ପାଇଁ ହ୍ୱିପ୍ ଜାରି କରି, ଆଜି ସଂସଦରେ ଉପସ୍ଥିତ ରହିବାକୁ କହିଛି । ସେହିଭଳି ଟିଡିପି ଏବଂ ଜେଡିୟୁ ନିଜ ସାଂସଦମାନଙ୍କୁ ହ୍ୱିପ ଜାରି କରିଛି । ସେହିପରି ବିଲ୍କୁ ବିରୋଧ କରିବା ଲାଗି ବିରୋଧୀ ଦଳ ମଧ୍ୟ ବଳ ଗୋଟାଇଛି ।
୯ ମାସ ପରେ ଦ୍ୱିତୀୟ ଥର ଆଗତ ହେବ ୱାକଫ ବିଲ୍: ୱାକଫ ସଂଶୋଧିତ ବିଲ୍କୁ ଗତ ବର୍ଷ ୮ ଅଗଷ୍ଟରେ ସଂସଦରେ ଆଗତ କରାଯାଇଥିଲା । ଏହାକୁ ଜେପିସି ପଠାଯାଇଥିଲା ।
୨୨ ଅଗଷ୍ଟରୁ ହିଁ ଜେପିସି ନିଜର କାମ ଆରମ୍ଭ କରିଦେଇଥିଲା, ଏହାପରେ ଏହି ରିପୋର୍ଟ ଉପସ୍ଥାପିତ ହୋଇଥିଲା ଏବଂ ସଂଶୋଧିତ ଡ୍ରାଫ୍ଟ ଫେବୃଆରୀ ୨୭ରେ ଅନୁମୋଦନ କରାଯାଇଥିଲା ।