Breaking: ପୁଣି ସ୍କୁଲରେ ରାଗିଂ, ଷଷ୍ଠ ପିଲାର ଦେହକୁ ବ୍ଲେଡରେ କାଟିଲେ, କଟା ସ୍ଥାନରେ ଲୁଣ ଘସି ନିର୍ଯ୍ୟାତନା ଦେଲେ

ଉଦଳା: ଛୋଟ ଛୋଟ ପିଲାଙ୍କ ବର୍ବରୋଚିତ ମାନସିକତା। ସ୍କୁଲରେ ଜୀବନ ଗଢ଼ିବା ବଦଳରେ ଅପରାଧ ଦିଗରେ ପାଦ ଦେଉଛନ୍ତି। ପୂର୍ବରୁ କଲେଜରେ ରାଗିଂ ଘଟଣା ଦେଖିବାକୁ ମିଳୁଥିବା ବେଳେ, ଏବେ ଦିନକୁ ଦିନ ସ୍କୁଲରେ ରାଗିଂ ଘଟଣା ବଢ଼ିବାରେ ଲାଗିଛି।

ଠିକ୍ ଏବେ ଯେମିତି ଜଣେ ଷଷ୍ଠ ଶ୍ରେଣୀ ପିଲା ଉପରେ ନବମ ଶ୍ରେଣୀ ପିଲା ଅତି ବର୍ବରତାର ସହ ରାଗିଂ କରିଛନ୍ତି। ଏପରିକି ଛୋଟ ପିଲାଟିକୁ ନିସ୍ତୁକ ମାଡ ମାରିବା ସହ, ବ୍ଲେଡରେ ଆକ୍ରମଣ କରିଛନ୍ତି। ଏବଂ ଖଣ୍ଡିଆ ଜାଗାରେ ଲୁଣ ଘସି ଆହୁରି ଅଧିକ ନିର୍ଯ୍ୟାତନା ଦେଇଥିବା ଅଭିଯୋଗ ହୋଇଛି।

ସ୍କୁଲରେ ରାଗିଂ:  ଏପରି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି ଉଦଳାର ଖୁଣ୍ଟା ଥାନା ବାସିପିଠା ସ୍ଥିତ ଏକ ଉଚ୍ଚ ବିଦ୍ୟାଳୟରେ। ଜଣେ ଷଷ୍ଠ ଶ୍ରେଣୀ ପିଲାକୁ କିଛି ନବମ ଶ୍ରେଣୀ ପିଲା ଅକଥନୀୟ ନିର୍ଯ୍ୟାତନା ଦେଇଥିବା ଘଟଣା ସାମ୍ନାକୁ ଆସିଛି।

ଯାହାକି ଅତି ବର୍ବରତାର ଘଟଣା। ଦେଖିବାକୁ ଗଲେ ଏବେ କଲେଜ ଅପେକ୍ଷା ସ୍କୁଲରେ ରାଗିଂ ଘଟଣା ଅଧିକ ଦେଖିବାକୁ ମିଳୁଛି। ଦୁଇ ଦିନ ମଧ୍ୟରେ ରାଜ୍ୟର ତିନି ତିନୋଟି ସ୍କୁଲ ରାଗିଂ ଘଟଣା ସାମ୍ନାକୁ ଆସିଲାଣି।

କେଉଁଠି ଛୋଟ ଛୋଟ ପିଲାଙ୍କୁ ମାଡ ମରା ଯାଇ ଲହୁ ଲୁହାଣ କରାଯାଉଛି ତ ଆଉ କେଉଁଠି ଧାରୁଆ ଅସ୍ତ୍ରରେ ଆକ୍ରମଣ କରାଯାଉଛି। ଯାହାକି ଅତ୍ୟନ୍ତ ଚିନ୍ତାଜନକ ବିଷୟ।

କଟା ଘା’ରେ ଲୁଣ ଛିଟା: ଆଜି ସାମ୍ନାକୁ ଆସିଥିବା ଖୁଣ୍ଟା ଥାନା ବାସିପିଠା ସ୍ଥିତ ଏକ ଉଚ୍ଚ ବିଦ୍ୟାଳୟରେ ନିର୍ଯ୍ୟାତନା ଘଟଣା ଯିଏ ଶୁଣୁଛି ତା ଦେହ ଶିହିରି ଉଠୁଛି। କାରଣ ଘଟଣାଟି ହିଁ ସେପରି ହୃଦୟ ବିଦାରକ।

କାରଣ ଉକ୍ତ ସ୍କୁଲର ଜଣେ ଷଷ୍ଠ ଛାତ୍ରଙ୍କୁ ମାଡ଼ ମାରିବା ସହ ବ୍ଲେଡରେ ଆକ୍ରମଣ କରିଛନ୍ତି କିଛି ନବମ ଛାତ୍ର। ଏପରିକି ଆକ୍ରମଣ ପରେ ଖଣ୍ଡିଆ ସ୍ଥାନରେ ଲୁଣ ମଧ୍ୟ ଘସି ଆହୁରି ନିର୍ଯ୍ୟାତନା ଦେଇଥିବା ଅଭିଯୋଗ ହୋଇଛି।

କାହିଁକି ଦେଲେ ନିର୍ଯ୍ୟାତନା: ଆଉ ଏହାର ମୁଖ୍ୟ କାରଣ ହେଉଛି ନବମ ପିଲା ମଦ ପିଇବା ବେଳେ ଷଷ୍ଠ ଛାତ୍ରଟି ଦେଖିଦେଇଥିଲା। ତେଣୁ ଏହି ଘଟଣାକୁ ଲୁଚାଇବା ପାଇଁ ନବମ ପିଲା ଆକ୍ରମଣ କରିଥିଲେ। ବାହାରେ କହିଲେ ଛୁରୀ ମାରିବାକୁ ଧମକାଇଥିବା ଅଭିଯୋଗ ହୋଇଛି।

ଛାତ୍ରଙ୍କ ଦେହରେ ଶତାଧିକ କଟା ଦାଗ ଥିବା ଦେଖିବାକୁ ମିଳିଛି। କଠୋର କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ପରିବାର। ତେବେ ଘଟଣାଟି ହେଉଛି ଗତ ଫେବୃଆରୀ ମାସର ଘଟଣା। ପିଲାଟି ଡରରେ ଘଟଣା ସମ୍ପର୍କରେ କାହାରିକୁ କିଛି ଜଣାଇ ନଥିଲା।

ଆଉ ଘଟଣା ଜଣା ପଡିବା ପରେ ଥାନାରେ ଅଭିଯୋଗ ହୋଇଛି। ତଦନ୍ତ ମଧ୍ୟ ଚାଲିଛି। ଆଉ ଏହି ଅଭିଯୋଗକୁ ସ୍ୱୀକାର କରିଛନ୍ତି ସ୍କୁଲ କର୍ତ୍ତୃପକ୍ଷ। ଏହାସହ ପଦକ୍ଷେପ ନେବା ପାଇଁ ମଧ୍ୟ କହିଛନ୍ତି।