ଟ୍ରମ୍ପଙ୍କୁ କିମ ଜୋଙ୍ଗ ଉନଙ୍କ ବଡ଼ ଧମକ, କହିଲେ ନିଷ୍ପତ୍ତି ଫେରାଇ ନିଅ, ନଚେତ୍ ପଡ଼ିବ ପରମାଣୁ ବୋମା
ୱାଶିଂଟନ/ପ୍ୟୋଙ୍ଗୟାଙ୍ଗ୍,୨୭ା୫: ସାରା ବିଶ୍ୱରେ ଚାଲିଥିବା ଅଶାନ୍ତି ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏକ ନିଷ୍ପତ୍ତି ଉପରେ ଉତ୍ତରକୋରିଆ ଅସନ୍ତୋଷ ପ୍ରକାଶ କରିଛି। ଉତ୍ତରକୋରିଆ ସରକାର ଏକ ବିବୃତ୍ତିରେ କହିଛନ୍ତି, ଆମେରିକା ଯୁଦ୍ଧ ଭଳି ପରିସ୍ଥିତି ସୃଷ୍ଟି କରିବାକୁ ଚେଷ୍ଟା କରୁଛି। ଯଦି ଆମେରିକା ନିଜକୁପରିବର୍ତ୍ତନ ନକରେ ବା ନ ସୁଧାରେ ତେବେ ପରମାଣୁ ଯୁଦ୍ଧକୁ କେହି ରୋକି ପାରିବେ ନାହିଁ।
କିମ୍ ଜୋଙ୍ଗ ଉନଙ୍କ ସରକାର ଗୋଲଡେନ୍ ଡୋମ ଉପରେ ରାଗିଛନ୍ତି। ଆମେରିକା ନିଜ ଅଞ୍ଚଳକୁ ସୁରକ୍ଷିତ ରଖିବା ପାଇଁ ଏକ ଗୋଲଡେନ୍ ଡମ୍ ନିର୍ମାଣ କରିବା ବିଷୟରେ କଥା ହୋଇଛି। ଏହାକୁ ମହାକାଶରେ ନିୟୋଜିତ କରାଯିବ ଯାହା ଦ୍ୱାରା ଭବିଷ୍ୟତରେ ଏହାର ଅଞ୍ଚଳରେ କୌଣସି କ୍ଷେପଣାସ୍ତ୍ର ଆକ୍ରମଣ ହୋଇପାରିବ ନାହିଁ।
ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳ ସମୟରେ କିମ୍ ଜୋଙ୍ଗ ଉନ ପ୍ରଥମ ବଡ଼ ଧମକ ଦେଇଥିଲେ। କିମ୍ଙ୍କ ସରକାର ଆମେରିକାକୁ ଏହାକୁ ତୁରନ୍ତ ପ୍ରତ୍ୟାହାର କରିବାକୁ କହିଛି। ଉତ୍ତରକୋରିଆ କହିଛି ଯେ ଆମେରିକା ନିଜର ପ୍ରାଧାନ୍ୟ ବୃଦ୍ଧି କରିବା ପାଇଁ ବିଶ୍ୱକୁ ବିପଦରେ ପକାଉଛି।
କିମ୍ଙ୍କ କ୍ରୋଧର ସବୁଠାରୁ ବଡ଼ କାରଣ ହେଉଛି ଜାପାନ ଏବଂ ଦକ୍ଷିଣ କୋରିଆ ସହିତ ଆମେରିକାର ସମ୍ପର୍କ। କିମ୍ ବିଶ୍ୱାସ କରନ୍ତି ଯଦି ଆମେରିକାରେ ଗୋଲଡେନ୍ ଡୋମ୍ ଅଭିଯାନ ସଫଳ ହୁଏ, ତେବେ ଏହି ବ୍ୟବସ୍ଥା ଦକ୍ଷିଣ କୋରିଆ ଏବଂ ଜାପାନରେ ମଧ୍ୟ କାର୍ଯ୍ୟକାରୀ ହେବ। ଜାପାନ ଏବଂ ଦକ୍ଷିଣ କୋରିଆକୁ ଉତ୍ତରକୋରିଆର ଶତ୍ରୁ ବୋଲି ବିବେଚନା କରାଯାଏ।
ଆମେରିକାର ସହଯୋଗ ସତ୍ତ୍ୱେ, ଉତ୍ତରକୋରିଆ ସମୟ ସମୟରେ ଉଭୟ ଦେଶକୁ ଧମକ ଦେଇ ଚାଲିଥାଏ। ଉତ୍ତରକୋରିଆ ପାଖରେ ଆଧୁନିକ ଅସ୍ତ୍ରଶସ୍ତ୍ରର ଭଣ୍ଡାର ଅଛି, କିନ୍ତୁ ଗୋଲଡେନ୍ ଡୋମ୍ ସ୍ଥାପନ ଏହାକୁ କ୍ଷତି ପହଞ୍ଚାଇପାରେ।
ଉତ୍ତରକୋରିଆ ବିଶ୍ୱାସ କରେ ଯେ, ଗୋଲଡେନ୍ ଡୋମ୍ ସ୍ଥାପନ ଦ୍ୱାରା ଦକ୍ଷିଣକୋରିଆ ଏବଂ ଜାପାନ କ୍ଷେପଣାସ୍ତ୍ର ଏବଂ ବୋମା ଆକ୍ରମଣରୁ ରକ୍ଷା ପାଇବ, ଯାହା ଏହାର ସ୍ଥିତିକୁ ଦୁର୍ବଳ କରିବ।
ଏହି କାରଣରୁ କିମ୍ ଜୋଙ୍ଗ ଉନଙ୍କ ସରକାର ତାଙ୍କ ବିବୃତ୍ତିରେ ପରମାଣୁ ଆକ୍ରମଣ କଥା ଉଲ୍ଲେଖ କରିଛନ୍ତି। କିମ୍ ଜଙ୍ଗ ଉନଙ୍କ ସରକାର କହିଛି ଯେ, ଯଦି ଏପରି ପରିସ୍ଥିତି ଉପୁଜେ ତେବେ ସାରା ବିଶ୍ୱରେ ପରମାଣୁ ଯୁଦ୍ଧ ଆରମ୍ଭ ହୋଇପାରେ।
କିମ୍ଙ୍କ ପାଖରେ ଅଛି ୫୦ଟି ପରମାଣୁ ବୋମା
କିମ୍ ଜୋଙ୍ଗ ଉନଙ୍କ ଉତ୍ତରକୋରିଆ ପାଖରେ ବର୍ତ୍ତମାନ ୫୦ଟି ପରମାଣୁ ଅସ୍ତ୍ର ଅଛି। କିମ୍ ଏହାକୁ ଲୁଚାଇ ରଖିଛନ୍ତି। ଉତ୍ତରକୋରିଆ ଆହୁରି ୯୦ଟି ଅସ୍ତ୍ରଶସ୍ତ୍ର ତିଆରି କରିବାକୁ ଚେଷ୍ଟା କରୁଛି। ନିକଟରେ, ଯେତେବେଳେ ଆମେରିକା ଦକ୍ଷିଣକୋରିଆ ସହିତ ସାମରିକ ଅଭ୍ୟାସ କରିଥିଲା, କିମ୍ଙ୍କ ଭଉଣୀ ଏକ ଧମକ ଦେଇଥିଲେ। କିମ୍ଙ୍କ ଭଉଣୀ କହିଥିଲେ ଯେ, ଆମେ ପ୍ରଦର୍ଶନୀ ପାଇଁ ଅସ୍ତ୍ରଶସ୍ତ୍ର ତିଆରି କରିନାହୁଁ।